2 Ab'e Korintho 6 - Baibuli Ekibono kya Katonda 2014

¹ Nga tukolera ghalala ni Katonda, tubeeghembye ekisa Katonda kye yabagemerwa mutakireka kufa busa.

² Katonda akoba ati: “Nakuwulira mu kiseera kyange eky'okukugemerwa ekisa, era naakubeera ku lunaku lwange olw'okukulokola.” Bona eno! Kino n'ekiseera eky'okugemerwaku ekisa, olwaleero n'olunaku olw'okulokolebwa.

³ Titwenda kuta kitimuguunha mu ngira ya muntu yeenayeena, olwo ghalobe kubaagho muntu ayagaana kisobu mu mulimo gwaife.

⁴ Aye mu byonabyona bye tukola twoleka nga tuli bagheereza ba Katonda nga tugumira n'obuguminkiriza okudaazibwadaazibwa, ebizibu, ebibamba,

⁵ okukubibwa, okusibibwa mu makomera, obwegugungo, okufaabiikana, okusula nga tumoga, n'okulumwa endhala.

⁶ Era twoleka nga tuli bagheereza ba Katonda, mu bwamufu, mu kumanha, mu kuguminkiriza, mu kuba ab'ekisa, mu kuba ni Mwoyo Mutukuvu, era ni mu kugonza kwenekwene.

⁷ Twogera amazima n'amaani ga Katonda, era twakozesa obutuufu ng'eky'okulwanisa kyaife mu kulumba ni mu kwetaasa.

⁸ Abandi batutaamu ekinhagansi, abandi baatunhooma, abandi batwogeraku bubi, abandi baatwogeraku bukalamu. Tutwalibwa okuba abasubayi, waire nga twogera mazima.

⁹ Tutwalibwa ng'abatamanhiibwa se nga boonaboona batwidhi, tuli ng'abafu aye nga tuli balamu. Tubonerezebwa aye titwitibwa.

¹⁰ Tunakughazibwa aye tuba basangaavu buliidho, tuboneka ng'abaavu ate nga tukombaghaza abantu kamaala, tutwalibwa ng'abazira kantu ate nga bwenebwene byonabyona tuli nabyo.

¹¹ Bakagwa baife ab'e Korintho, tubakobeire byonabyona nga bwe biri, ghazira kiri mu myoyo gyaife kye tubagisiisa.

¹² Ife tukaali kukendeezaaku ku kugonza kwe tubagonzaamu, aye niimwe abakendeeziiza ku kutugonza.

¹³ Mperaano ndhogera n'imwe ng'abaana bange, mwena mutugonzenga.

¹⁴ Timweyimbanga kukola kintu na bataikiriza Kurisito, kuba obutuufu n'obubi busobola butya okwisania? Oba obutangaavu bwisania butya n'enzikiiza?

¹⁵ Kurisito aisania atya ni Beliali? Oba omwikiriza aisania atya n'atali mwikiriza?

¹⁶ Eisinzizo lya Katonda liisania litya n'ebyo ebisinzibwa ebitali Katonda? Kuba ife, niife eisinzizo lya Katonda Omulamu, era nga Katonda mwene bw'akoba ati: “Ndidha kubanga mu bantu bange, era mu abo mwe naatambuliranga Ndidha kubanga Katonda waibwe, boona baidha kubanga bantu bange.”

¹⁷ Kale Musengwa akoba ati: “Mweyawule ku bataikiriza Kurisito, mubaveemu. Era mutagemanga ku kitali kirongoofu, memale olwo zeena mbasangaaze.

¹⁸ Ndiba lata waimwe, era mwena muliba batabane bange ni baghala bange. Atyo Musengwa Aghanga Ebintu Byonabyona bw'akoba.”