2 Ab'e Korintho 5 - Baibuli Ekibono kya Katonda 2014

¹ Kuba twidhi ng'entindi yaife eno ey'oku nsi ye tulimu, omubiri guno gwe tulimu, bw'erisansulwa, Katonda alitugha endhu mu igulu etawaagho etaazimbwa bantu.

² Mperaano tusinda era twegomba okuvaazibwa endhu eyo ey'omu igulu.

³ Bwe tuligivaala tulobe kwagaanibwa nga tuli kidu.

⁴ Bwe tuba nga tukaali mu ntindi eno ey'oku nsi tusinda olw'okuzitooghererwa, ti lwa kuba nga twenda okwetoolaku omubiri guno, aye lwa kuba twenda okuvaazibwa omubiri ogw'omu igulu, olwo omubiri ogutafa gumire ogufa.

⁵ Katonda n'eyatutegekera kino, era yaatugha Mwoyo ng'omusingo.

⁶ Kale ni buliidho tuba bagumu kuba twidhi nga bwe tuba mu mubiri guno, tituba ghalala ni Musengwa.

⁷ Tubaagho lwa kwikiriza se ti lwa kubona.

⁸ Tuli bagumu era kasinga tulekayo okuba mu mubiri guno aye twaba ni Musengwa.

⁹ Kale ni oba tuba mu mubiri guno oba tuguvaamu, kye twenda n'okumusangaaza.

¹⁰ Kuba twenatwena tuteekwa okuboneka mu maiso ga Kurisito atusalire omusango. Buli muntu alimusasula ng'ajiira ku bikalamu, oba ku bibi bye yakola ng'ali mu mubiri guno.

Okwisania ni Katonda mu Kurisito

¹¹ Nga bwe twidhi nga kituufu okutya Musengwa, abantu tugezaaku okubaghangula. Katonda atwidhi bukalamu era ndhuuba nga mu myoyo gyaimwe mwena mutwidhi bukalamu.

¹² Ti tuli kwesuuta ye muli kabiri, aye tuli kubagha kye munaavangaku okwesiima ku lwaife, memale olwo mughange okwirangamu abo abeesuutiriza mu by'oku ngulu okw'omuntu aghazira kulinga ku bya mu mwoyo.

¹³ Oba tuli ng'oti balalu, tuli tutyo ku bwa Katonda, aye oba ti tuli balalu, ti tuli tutyo ku lwaimwe.

¹⁴ Ife tufugibwa kugonza kwa Kurisito, era twidhi nga yafiirira boonaboona, ekikoba nti boonaboona bagabana ku kufa kwe.

¹⁵ Yafiirira boonaboona, olwo abalamu babe nga tibakaali balamu ku lwaibwe, aye babenga balamu ku lulwe oyo eyabafiirira era n'azuukizibwa.

¹⁶ Mperaano titukaabonera muntu yeenayeena mu magezi ga buntu. Waire nga ghaaligho ghe twaboneranga Kurisito mu magezi ag'obuntu, mperaano titukaamubona tutyo.

¹⁷ Agho ni buli muntu aba mu Kurisito aba kitonde kiyaaka, ekikaire kivaagho ekiyaaka kyaidha.

¹⁸ Akola bino byonabyona ni Katonda eyabita mu Kurisito n'atuleetera okwisania naye, era n'atugha omulimo ogw'okuleetera abantu abandi boona okwisania naye.

¹⁹ Kye tukoba ni kino nti Katonda yaleetera abantu boonaboona okwisania naye ng'abita mu Kurisito, nga tababalira bibi bye baakola naire. Era twena yatugemya obukwenda obubaleetera okwisania naye.

²⁰ Kale tuli bakwenda ba Kurisito, Katonda b'abitamu okubeeta. Tubeeghembye mu liina lya Kurisito muganhe Katonda abaghe okwisania naye.

²¹ Kurisito tiyali na kibi, aye ku lwaife Katonda yamutaaku ebibi byaife tusobole okubita mu oyo okugabana ku butuufu bwa Katonda.