2 Ab'e Korintho 4 - Baibuli Ekibono kya Katonda 2014

Eby'obukombe mu nsugha edh'eitosi

¹ Katonda mu kusaasira kwe yatugha omulimo guno okugukola, kale tutawaamu maani.

² Ebikolwa ebikolebwa mu ngiso era ebiswaza twabyevuma, tituguyaguya oba okufuulaniafuulania ekibono kya Katonda, aye twogera mazima gonka, twaleka buli muntu ow'omwoyo omukalamu okutulowoozaaku nga bw'atubona mu maiso ga Katonda.

³ Era oba nga Amawulire Amalungi ge tukobera abantu maghembe gaaku, gaba maghembe gaaku eri abo bonka ab'okuzikirira.

⁴ N'abo abataikiriza, kuba Sitaani omufuzi ow'ensi eno yabaghemba emyoyo, yaabalobera okubona obutangaavu obw'Amawulire Amalungi ag'ekitiisa kya Kurisito, oyo abonerwamu Katonda nga bw'afaanana.

⁵ Ife titweyogeraku beene aye tukobera abantu tuti Yesu Kurisito ni Musengwa, era nga ife tuli bagheereza baimwe olwa Yesu.

⁶ Katonda eyakoba ati, “Ekimulika kyake mu nzikiiza!” N'eyaleeta ekimulika kye okwakira mu myoyo gyaife, okutumanhisa ekitiisa kya Katonda ekyakira ku maiso ga Kurisito.

⁷ Aye ife abali oti nsugha dha itosi, niife abali n'obukombe buno, kino kisobole okwoleka ng'amaani amabitirivu ag'Amawulire Amalungi bwe gali aga Katonda se ti agaife.

⁸ Tudaazibwadaazibwa mu buli nsambo aye ti tuwaamu maani, tusoberwa aye ti tuwaamu isuubi.

⁹ Abantu batukiriga, aye Katonda tatwerabira. Tukubibwa ghansi, aye tituzikirizibwa.

¹⁰ Buli ghe tuja tuli mu kabi ak'okufa nga Yesu bwe yafa, olwo obulamu bwa Yesu bughange okubonekera mu mibiri gyaife.

¹¹ Buliidho obulamu bwaife buli mu kabi ak'okufa ku lwa Yesu, olwo obulamu bwe bubonekere mu mibiri gyaife egifa.

¹² Kale okufa kuli mu ife, aye kino kitegeeza bulamu ye muli.

¹³ Ng'ebyaghandiikibwa bwe bikoba biti: “Nayogera kuba naikiriza”, twena olw'okuba tuli n'okwikiriza n'okulala, twogera kuba twaikiriza.

¹⁴ Twidhi nga Katonda eyazuukiza Musengwa Yesu, twena alituzuukiza ni Yesu, yaatutwala mu maiso ge ghalala n'imwe.

¹⁵ Bino byonabyona birigho ku lwaimwe, olwo ekisa kya Katonda ye kinaakoma okweyongera okutuuka ku bantu, n'abamusiima ye banaakoma okweyongeraku. Olwo Katonda agheebwe ekitiisa.

Tuba balamu lwa kwikiriza

¹⁶ Kale ni tituwaamu maani. Kuba waire mu mubiri tuja nga tunafugha, mu mwoyo tuja nga twiramu amaani buli lunaku.

¹⁷ Okudaagadaaga kuno okutonioli era okw'akaseera, kuli kututegekera ekitiisa ekinene era ekitawaagho ekisinga ebintu byonabyona.

¹⁸ Tujiira ku bintu ebitaboneka, aye ti ebyo ebiboneka kuba ebyo ebiboneka bya kaseera buseera, aye ebyo ebitaboneka tibiwaagho.