2 Ab'e Korintho 2 - Baibuli Ekibono kya Katonda 2014

¹ Olw'obutenda kubalumya nasalagho obutabakyalira kabiri.

² Kuba bwe mbalumya naani owundi alinsangaaza, okutoolaku imwe beene be mba nga numiiza?

³ Eyo n'ensonga lwaki nabaghandiikira embaluwa eyo. Tyayenda kwidha kulumizibwa abo abandinsangaaziiza. Kuba ndidhi nga bwe nsangaala mwenamwena musangaala.

⁴ Nabaghandiikira nga ndi n'enaku nnene inho ku mwoyo, era nga ndi bwa mu maziga. Ekigendererwa kyange tikyali kubalumya, aye kubooleka nga bwe mbagonza einho.

Okusonigha eyasobya

⁵ Oba nga ghaligho omuntu eyaleetagho okulumwa, tiyakuleetera nze, aye mu nsambo eyindi yakuleetera imwe mwenamwena. Kino nkikobye olw'obutenda kumumalamu.

⁶ Ng'omuntu oyo bwe yabonerezebwa abantu kamaala batyo, kimala.

⁷ Kale mperaano mugwaine mumusonighe era mumugumye, alobe kunakughala bujiiririire, na kuwaamu maani.

⁸ Mbeeghembye mumwoleke nga bwe mumugonza einho.

⁹ Nabaghandiikira embaluwa eyo lwa kubaleba, era na lwa kumanha oba nga muli bawulize mu buli kye mbalagira.

¹⁰ Buli ye musonigha zeena mmusonigha. Buli kye nsonigha, oba nga bwene ghaligho kyonakyona kye nasonigha, nakisonigha ku lwaimwe mu maiso ga Kurisito

¹¹ Olwo Sitaani alobe kutuzingiza, kuba twidhi entegeka ye yoonayoona.

Obweraliikirivu bwa Paulo mu Turoa

¹² Bwe natuuka mu Turoa okukobera abantu Amawulire Amalungi aga Kurisito, nayagaana nga Musengwa ampaire omukisa ogw'okumukolerayo omulimo.

¹³ Aye nali mweraliikirivu inho, kuba tyayagaanayo waluganda Tito. Kale naasiibula mangu ab'eyo naaja e Makedonia.

Kurisito atugha obughanguzi

¹⁴ Aye Katonda yeekaza kuba buliidho ng'abita mu Kurisito atutuusa ku kugabana ku bughanguzi bwa Kurisito oyo, era yaatukozesa mu kubunisa amawulire ga Kurisito woonawoona, ng'oti n'akawoowo bwe kabuna woonawoona.

¹⁵ Kuba ife tuli ng'oti n'obubbaani Kurisito bw'aniosa, Katonda awulire akawoowo akabuna mu b'okulokolebwa n'ab'okuzikirira.

¹⁶ Eri abo ab'okuzikirira tuli kivundu ekiita, aye eri abo ab'okulokolebwa tuli kawoowo akaleeta obulamu. Kale naani asobola omulimo oti ni guno?

¹⁷ Tituli oti n'abantu abandi kamaala abakozesa ekibono kya Katonda okufunamu kye banaalya, aye tuli bantu Katonda be yatuma, era twogera mazima mu maiso ge, ng'abagheereza mu Kurisito.