2 Ab'e Korintho 11 - Baibuli Ekibono kya Katonda 2014

Paulo n'abatume ab'obuguya

¹ Nandyegombye munguminkirize ni bwemba nga ndimuuku obusiru. Bwenebwene munguminkirize.

² Mbawubira era nga Katonda bw'abawubira, kuba nabandhula ye Kurisito ng'omughala omwegha ye baja okugha iba omulala ati.

³ Aye ntya nti ng'omusota bwe gwakozesa olugezigezi lwagwo ni gusubagha Eva, ebirowoozo byaimwe bisobola okudaaliimizibwa, mwaloba kwegheerayo irala ye Kurisito mu mazima.

⁴ Kuba muganha mangu omuntu bw'aidha n'abakobera Yesu owundi ife ye tutabakoberangaku, oba bwe mufuna mwoyo owundi atali Mwoyo Mutukuvu ye mwafuna, oba ole bw'abakobera amawulire amalungi agandi agatali ago ge twabakobera.

⁵ Tirowooza nti abo be mweta okuba abatume abakulu einho ghaligho kye bansinga naire.

⁶ Waire nga tiri mwogezi mulungi, ghazira kye ntaidhi, era ekyo mwakibona bukalamu mu byonabyona ni mu buli nsambo.

⁷ Bwe nabakobera Amawulire Amalungi aga Katonda tyabasasuza kintu kyonakyona. Neefeebya imwe mugheebwe ekifo ekya ghaigulu. Ekyo nakola kibi?

⁸ Bwe nali mu imwe, Ebikunsu ebindi eby'Abaikiriza mu Kurisito n'ebyangemerera mu byetaago nsobole okubagheereza. Mu kino naba ng'oti ndi kunhaga bale, nhambe imwe.

⁹ Bwe nali n'imwe, ni mba ni bye nhenda, tyakaluubiriza muntu yeenayeena, kuba aboluganda abaava e Makedonia bandeetera buli kye nali nhenda. Neekuuma era ndidha kwekuumanga, ndobe kubakaluubiriza mu nsambo yoonayoona.

¹⁰ Olw'amazima ga Kurisito agali mu nze ghazira muntu alighanga kundobera kwesaaka mu biketezo byonabyona eby'omu Akaia.

¹¹ Kino nkyogera lwa kuba nga tibagonza? Katonda aidhi nga mbagonza.

¹² Kye nkola buti ndidha kweyongera okukikola, nsobole okulemya abo abeesaaka nga bakoba mbu bye bakola n'ife bye tukola biri ku musingi mulala.

¹³ Abantu oti n'abo ti batume beene, aye batume ba buguya, era abakolera mu buguya ni beefuula abatume ba Kurisito.

¹⁴ Era ekyo tikyewuunhisa, kuba ni Sitaani yeefuula okuba malaika ow'obutangaavu.

¹⁵ Kale tikyewuunhisa n'abagheereza be bwe beefuula okuba abagheereza ab'obutuufu. Ku nkomerero balifuna ekituukana n'ebikolwa byaibwe.

Okudaagadaaga kwa Paulo ng'omutume

¹⁶ Ndhiramu okukoba nti ghatabangagho muntu yeenayeena adhuuba ati ndi musiru. Aye ni bwe muba nga mudhuuba mutyo, mumale gandekera agho ng'omusiru, zeena nsobole okwesaakaku akatono.

¹⁷ Kye ndi kwogera buti, ti ni Musengwa kye yandyenze ndhogere, aye ndi kwogera ng'omusiru mu bino eby'okwesaaka.

¹⁸ Aye nga bwe ghaligho abantu kamaala abeesaaka olw'eby'ensi, zeena ka neesaake.

¹⁹ Nga imwe bwe muli abagezi einho, muguminkiriza abasiru n'eisanhu.

²⁰ Muguminkiriza omuntu bw'abatwala okuba abairu, oba bw'abanhaga, oba bw'abatega, oba bwe yeekudumbaza, oba bw'abakuba mu maiso.

²¹ Mu buswavu nganha nga ife twali bati inho okukola ekyo. Aye omuntu yeenayeena bw'akana ni yeesaaka olw'ekintu kyonakyona, zeena ndidha kukana neesaake olw'ekintu ekyo, ng'omusiru bwe yandikoze.

²² Abo Baheburayi? Zeena bwendi. Abo Baisiraeli? Zeena bwendi. Abo baidhukulu ba Aburahamu? Zeena bwendi.

²³ Abo bagheereza ba Kurisito? Nze mbasinga. Nga ndhogera ng'omulalu, mbasinga okukola einho. Nsibiibwa mu ikomera emikuzi kamaala okubasinga. Nkubiibwa emikuzi kamaala okubasinga, era emikuzi mingi naabulaku katono n'okufa.

²⁴ Emikuzi etaanu Abayudaaya bankuba embooko amakumi asatu n'omwenda (39).

²⁵ Emikuzi esatu nakubwa emiigo olundi bankuba amabaale. Emikuzi esatu eryato lyatudimiraku, naasula era naasiiba mu nhandha.

²⁶ Mu ngendo dhange kamaala nfunie obuzibu obw'emiigo, obw'abanhazi, obuva mu Bayudaaya banange n'obuva mu bamaghanga agandi. Mbaire mu buzibu mu bibuga ni mu malungu, ku nhandha, era n'okuva y'abo abeeyeta aboluganda ate nga tibali.

²⁷ Mbaire n'okukola einho n'amaani era emikuzi kamaala nga nsula titendwike, ndi ndhala, n'endigho enuma ate nga nzira na mere ya kulya, naaba mu mpewo nga nzira na kya kwebwika.

²⁸ Era ku ebyo, naataaku buli lunaku obuzito obw'okweraliikirira olw'Ebikunsu eby'Abaikiriza mu Kurisito byonabyona.

²⁹ Bwe ghabaagho anafughaire, zeena nnafughala bweghabaagho agwisiibwa mu kibi, nsiriira omwoyo.

³⁰ Bwe mba nga ndi wa kwesaaka ndidha kwesaaka olw'ebyo ebyoleka obunafu bwange.

³¹ Katonda era Lata wa Musengwa waife Yesu, asaakibwa ebyanda n'ebyanda, aidhi nga tiri kuguya.

³² Bwe nali mu Damasiko, omufuzi eyateebwagho kyabazinga Areta, yakuuma ekibuga Damasiko angeme.

³³ Aye bambisa mu dinisa nga bantaire mu kiibo bandhikiza ku kisenge naamuwona.