2 Ab'e Korintho 10 - Baibuli Ekibono kya Katonda 2014

Paulo ayogerera obutume bwe

¹ Ninze Paulo mwene, abandi mu imwe ye bakoba okuba omugonvu nga ndi n'imwe, aye abakambughalira nga tiri n'imwe. Olw'obuguminkiriza n'obwikaikamu bwa Kurisito,

² mbeeghembye nti bwe ndiba nga ndidhie eyo mutandeetera kubakambughalira, kuba nkakasa nti nsobola okukambughalira abo abakoba bati tujiira ku bya nsi.

³ Kituufu tuli mu nsi, aye olutalo lwe tuliku ti lwa nsi.

⁴ Eby'okulwanisa mu lutalo lwaife ti bya nsi, aye n'ebyo ebiri n'amaani ga Katonda okuzikiriza amaani ag'omuzigu.

⁵ Tuzikiriza buli kutakana kwonakwona, n'ebitimuguunha ebyekudumbaza mu ngira okulobera Katonda okumanhibwa, era twakyusa buli ndowooza ey'ekidheemu yaagondera Kurisito.

⁶ Era nga mumaze okulaga obuwulize obutuukiriire, tuli beetegefu okubonereza buli kikolwa kyonakyona eky'obudheemu.

⁷ Mubone ebintu nga bwe biri. Omuntu yeenayeena bwe yeekakasa nga wa Kurisito, aidhukire nga twena tuli ba Kurisito nga oyo bw'ali.

⁸ Tikingemya nsoni kwesaaka okusingaku bwe ngwaine, olw'obukumu bwe tuli nabwo. Musengwa n'eyabutugha olw'okubazimba, nga ti bwa kubazikiriza.

⁹ Tyenda kuboneka ng'abatiisa n'embaluwa dhange

¹⁰ kuba bakoba bati: “Embaluwa dhe nkambwe era dha maani, aye bw'aba n'ife aba munafu era ataidhi na kwogera!”

¹¹ Abantu ng'oti n'abo bateekwa okumanha nga bye tukoba mu mbaluwa nga tituli n'imwe, bye tukola nga tuli n'imwe.

¹² Ife titughanga kweta, oba okwegeza ku abo abeesuuta. Bwe baba nga beegeza, beegeza ku beene na beene nga bwe bafaanana. Baziramu magezi.

¹³ Aye ife titwidha kwesaaka kuswisa agho ghe tuteekwa kukanga. Twesaaka lwa mulimo Katonda gwe yatugha gwonka, nga mw'otwaliire n'okukola mu imwe.

¹⁴ Kuba era, mu kusookera irala nga twidha ye muli okubaleetera Amawulire Amalungi aga Kurisito, twali tituli kutuumagho agho ghe twagererwa.

¹⁵ Kale titwesaaka kusinga ghaatugererwa, ni twingira na mu mulimo gwa bandi, aye tusuubira tuti ng'okwikiriza kwaimwe bwe kuja nga kweyongera, era n'omulimo gwaife mu imwe bwe gunaaja nga gweyongera okugazigha, nga buliidho twekuumira agho aghaatugererwa.

¹⁶ Olwo tulighanga okukobera abantu Amawulire Amalungi abali mu biketezo ebindi eby'eghalaku okusinga imwe, aghazira kwesaaka olw'omulimo ogwawa okukolebwa mu kiketezo eky'owundi.

¹⁷ Nga ebyaghandiikibwa bwe bikoba: “Oyo eyeesuuta, yeesuutenga ku lwa Musengwa.”

¹⁸ Omuntu eyeesaaka ti n'aikirizibwa Katonda, aye oyo Katonda y'asaaka.