1 Yoanne 2 - Baibuli Ekibono kya Katonda 2014

Kurisito Omubeezi waife

¹ Baana bange, mbaghandiikira ebintu bino mulobe kwonoona. Aye omuntu yeenayeena bw'akola ekibi, tuli n'omubeezi ye Lata, ni Yesu Kurisito omutuufu.

² Oyo n'omutango ogw'ebibi byaife, ate ti bibi byaife byonka aye n'ebibi eby'abantu abandi boonaboona.

³ Bwe tugema ebiragiro bya Katonda tuba tukakasa nga tumwidhi.

⁴ Oyo akoba ati mmwidhi aye nga tagema biragiro bye, omuntu oyo aba muguya era taba wa mazima.

⁵ Aye kiisi awulira ekibono kye, bwenebwene, mu oyo okugonza kwa Katonda kuba kutuukiriire. Okwo kwe tumanhira nga tuli mu oyo.

⁶ Oyo akoba ati ali mu Kurisito awoomye okwebisa ng'oti ni Kurisito bwe yeebisa.

Ekiragiro ekiyaaka

⁷ Bakagwa, tibaghandiikira kiragiro kiyaaka, aye ekiragiro eky'eira kye mwagheebwa ku kwinhama kwene. Ekiragiro eky'eira n'ekibono kye mwawulira.

⁸ Aye era ekiragiro kye ndi kubaghandiikira kiyaaka. N'ekyo ekiri n'obutuufu mu oyo ni mu imwe, kuba enzikiiza eri kuwaagho era mperaano obutangaavu bwidha.

⁹ Ole akoba ati ali mu butangaavu aye ng'akyagha muganda we oyo aba akaali mu nzikiiza.

¹⁰ Ole agonza muganda we aba mu butangaavu era mu oyo muzira kitimuguunha.

¹¹ Aye oyo akyagha muganda we aba mu nzikiiza era atambulira mu nzikiiza, era tamanha y'alaga; kuba enzikiiza eba emuzibye amaiso.

¹² Mbaghandiikira, baana bange, kuba ebibi byaimwe bisoniyiibwa olw'eriina lye.

¹³ Mbaghandiikira, imwe abasaadha abakulu, kuba mumwidhi oyo eyaligho okuviira irala ku kwinhama. Mbaghandiikira imwe abaisuka, kuba mughangwire omubi.

¹⁴ Mbaghandiikira, baana bange kuba mwidhi Lata. Mbaghandiikira imwe abasaadha abakulu kuba mwidhi oyo eyaligho okuviira irala ku kwinhama. Mbaghandiikira imwe abaisuka kuba muli ba maani, ekibono kya Katonda, kiba mu imwe ate mughangwire omubi.

¹⁵ Mutagonzanga nsi oba ebintu by'ensi. Omuntu yeenayeena bw'agonza ensi, tabaamu kugonza kwa Lata.

¹⁶ Kuba ebintu byonabyona ebiri mu nsi ng'okwegomba okw'omubiri, okwegomba okw'amaiso n'okwekuza okw'omu bulamu buno, ti biva wa Lata aye bya nsi.

¹⁷ Ensi ewaagho, n'okwegomba kwayo, aye oyo akola Katonda by'ayenda asigalagho ebyanda n'ebyanda.

Omuzigu wa Kurisito

¹⁸ Baana bange, ekiseera eky'enkomerero kituuse! Era nga bwe mwawulira muti Omuzigu wa Kurisito aidha, era ni mperaano abazigu ba Kurisito kamaala baidha. Kuno kwe tumanhira ng'ekiseera eky'enkomerero kituuse.

¹⁹ Abantu abo baava mu ife, aye tibaali baife, kuba nguli baali baife bandibaire nga bakaali n'ife. Aye baatuvaamu, kimanhikanire irala nga boonaboona ti baife.

²⁰ Aye imwe, Omutukuvu yabagha Mwoyo kale mwenamwena muli n'amagezi.

²¹ Mbaghandiikira ti lwa kuba nga timwidhi mazima aye lwa kuba mugaidhi, era mwidhi ng'ezira kusubagha kuva mu mazima.

²² Naani omuguya, okutoolaku oyo akoba ati Yesu ti ni Kurisito? Omuzigu wa Kurisito n'oyo ataikiriza Lata ni Mwana.

²³ Kiisi aloba okwikiriza Mwana aloba ni Lata aye aikiriza Mwana aba ni Lata yeena.

²⁴ Ekyo kye mwawulira okuva ku kwinhama kwene kitabavangamu, era bwe munaabanga nga mukaali n'ekyo kye mwawulira okuva ku kwinhama mwidha kusigala nga mukaali mu Mwana ni mu Lata.

²⁵ Era ekisuubizo kye yatusuubiza, n'obulamu obutawaagho.

²⁶ Mbaghandiikira ebintu bino olw'abo abagezaaku okubadaaliimya.

²⁷ Aye imwe Mwoyo eyabagheebwa Ole, asigala n'imwe era ti mwetaaga na muntu yeenayeena kubeegeresa. Aye nga Mwoyo eyabagheebwa bw'abeegeresa byonabyona, ate nga by'ayegeresa bituufu muzira kusubagha naire, mukole bukole oti n'oyo bw'abeegeresa, mube mu oyo.

Abaana ba Katonda

²⁸ Kale baana bange, musigale nga mukaali naye, bw'alyeyoleka tube bagumu tulobe kugemebwa nsoni mu maiso ge.

²⁹ Oba nga mwidhi muti oyo mutuufu, era mumanhe muti kiisi akola eby'obutuufu aba mwana we.