1 Samueli 3 - Baibuli Ekibono kya Katonda 2014

Musengwa Katonda abonekera Samueli

¹ Agho mu biseera ebyo, omulenzi Samueli yali agheereza Musengwa Katonda nga Eli n'amulabirira. Era Musengwa Katonda yali tatera kwogera na bantu, waire okubabonekera.

² Lwali lulala obwire, Eli ng'alambaire mu kifo kye, aye yali takaabona bukalamu olw'ekifu ekyali kitooleire okumwidha ku maiso.

³ Eitaala lya Katonda lyali likaali kuzikira era nga Samueli alambaire mu isinzizo lya Musengwa Katonda omwali Esanduuku ya Katonda.

⁴ Agho Musengwa Katonda yaayeta ati: “Samueli, Samueli!” Samueli yaavugira ati: “Wangi.”

⁵ Yaalumuka yaaja ye Eli, yaamukoba ati: “Ndi ghano ndidhie isebo, kuba ondhese.” Aye Eli yaamukoba ati: “Tikwese, irayo olambaale.” Kale Samueli yairayo, yaalambaala.

⁶ Kabiri Musengwa Katonda yaayeta ati: “Samueli.” Era Samueli yaasituka, yaaja ye Eli yaamukoba ati: “Ndi ghano ndidhie isebo, kuba ondhese.” Aye Eli yaamukoba ati: “Mwana wange, tikwese. Irayo olambaale.”

⁷ Samueli yali akaali kumanha Musengwa Katonda, era Musengwa Katonda yali tayogerangaku na Samueli oyo.

⁸ Musengwa Katonda yaayeta Samueli kabiri omukuzi ogwokusatu. Era yaasituka yaaja ye Eli yaamukoba ati: “Ndi ghano ndidhie isebo kuba ondhese.” Olwo Eli yaakitegeera nga Musengwa Katonda n'eyali ali kweta omulenzi.

⁹ Kale yaakoba Samueli ati: “Ja olambaale. Bw'anaakweta oidha kumukoba oti, ‘Wo Musengwa Katonda, yogera, omwiru wo ali kuwulira.’ ” Kale Samueli yairayo yaalambaala mu kifo kye.

¹⁰ Agho Musengwa Katonda yaidha yaayemerera agho, yaayeta nga bwe yakola ku mikuzi gire egindi, ati: “Samueli, Samueli.” Samueli yaamukoba ati: “Musengwa Katonda yogera, omwiru wo ali kuwulira.”

¹¹ Agho Musengwa Katonda yaakoba Samueli ati: “Bona eno, ndi kumpi okukola ekintu mu Isiraeli muno, ekiriwaawaaza amatu ga buli muntu alikiwulira.

¹² Ku lunaku olwo nja kutuukiriza byonabyona bye neesoomera okukola Eli n'ab'endhu ye, okuva ku kisooka okutuuka ku kisembayo.

¹³ Era nakobera Eli oyo nti nja kubonereza ab'endhu ye ebyanda n'ebyanda, olw'ebibi bye yamanha obukalamu kuba batabane be baavuma Katonda aye yaaloba kubaloberanga.

¹⁴ Olw'ekyo neerayiriire eri endhu ya Eli, nti mu byanda byonabyona ebiriiragho, ezira musengo oba kigheebwayo kirisobola kubatoolaku kibi kyaibwe ekyo.”

¹⁵ Samueli yaasigala mu buliri okutuusa bwe bwakya. Agho yaasituka, yaigula endhigi edh'endhu ya Musengwa Katonda. Yali ali kutya okukobera Eli ebyali mu kubonekerwa okwo.

¹⁶ Aye Eli yaamweta ati: “Mwana wange, Samueli.” Samueli yaavugira ati: “Wangi isebo.”

¹⁷ Eli yaamubuuza ati: “Kiki Musengwa Katonda kye yakukobye? Otakingisa. Katonda k'akubonereze inho, bw'ongisa ekintu kyonakyona ku ebyo bye yakukobye.”

¹⁸ Kale Samueli yaamukobera byonabyona nga ghazira ky'amugisiisa naire. Eli yaakoba ati: “Oyo ni Musengwa Katonda, k'akole mwene ky'abona nga n'ekirungi.”

¹⁹ Samueli yaakula, era Musengwa Katonda yaabanga ghalala naye. Musengwa Katonda yaaloba kuganhanga Samueli oyo ky'akobye ni kiroba kutuukirira.

²⁰ Agho Abaisiraeli boonaboona, okuva e Dani okutuuka e Beerisheba, baamanha bati Samueli akakasiibwa okuba omulanzi wa Musengwa Katonda.

²¹ Musengwa Katonda yaayongeranga okubonekera mu Shilo, ye yeeyolekera Samueli, era yaayogeranga naye. Era buli Samueli kye yayogeranga, ng'Abaisiraeli boonaboona bakiwulirisa.