1 Samueli 21 - Baibuli Ekibono kya Katonda 2014

Daudi alumuka Saulo

¹ Agho Daudi yaaja, yaatuuka e Nobu ye Ahimeleki kabona. Ahimeleki yaidha okumusangaaza ng'adhugumira, yaamubuuza ati: “Lwaki oli wenka nga ghazira akugherekeireku?”

² Daudi yairamu Ahimeleki kabona ati: “Kyabazinga ali ni ky'antumye okukola, era yankoba ati, ‘Ghatabaagho muntu yeenayeena amanha kye nkutumye, waire kye nkulagiire.’ Aye abasaadha bange ghaligho ghe tulagaine okwagaanana nabo.

³ Buti kya kulya ki ky'oli nakyo agho? Nfuniraayo emigaati etaanu oba ekirigho kyonakyona.”

⁴ Kabona oyo yairamu Daudi ati: “Nziragho ghano migaati gyabuliidho. Emigaati gye ndi nagyo n'emitukuvu. Nsobola okugikugha, abasaadha bo bwe baba nga beekuumye obutaba na bakazi.”

⁵ Daudi yaamwiramu ati: “Mu butuufu, buli lwe tuja okukola kye batutumye, tituganha bakazi kuseeta ye tuli. Ate oba abasaadha bange beekuuma nga balongoofu nga tuli kuja mu lugendo ni bwe luba olwabuliidho, memale luno tibaasinzeegho inho?”

⁶ Kale kabona oyo yaagha Daudi emigaati emitukuvu, kuba tighaali migaati gindi okutoolaku egyo egigheereibwayo eri Katonda, gye baatoolanga mu maiso ga Musengwa Katonda, era ku lunaku lwene olwo lwe baagitoolangagho, ni baizaagho egindi egyakafumbibwa.

⁷ Ku lunaku olwo, ghaaligho owundi ku bagheereza ba Saulo, ng'ali n'ensonga emusigaiza mu maiso ga Musengwa Katonda. Eriina lye nga ni Doegi, eyava mu Edomu era ng'akulira abaayi ba Saulo.

⁸ Daudi yaabuuza Ahimeleki ati: “Oziraku ghano ifumo oba mpiima? Titambwire na mpiima waire eby'okulwanisa ebindi, kuba kyabazinga ky'antumye okukola kibaire kya mangu.”

⁹ Agho kabona oyo yairamu ati: “Ghaligho ghano empiima ya Goliathi Omufilisiti ye waitira mu kiiko ky'e Ela. Empiima eyo eri einhuma w'ekivaalo eky'obwakabona, nga nzingirire mu lugoye. Oba oyenda okutwala eyo, gitwale, kuba ghaziragho yindi okutoolaku eyo.” Daudi yaamukoba ati: “Mpa eyo, ezirayo yindi eri ng'oti n'eyo.”

¹⁰ Kale Daudi yaasitula ku lunaku olwo, yaalumuka Saulo. Yaaja ye Akishi kyabazinga w'e Gathi.

¹¹ Abagheereza ba Akishi baakoba bati: “Ono ti ni Daudi kyabazinga ow'ensi eyo? Oyo ti ye baayembanga mu lwembo bwe bakina, nga bakoba bati, ‘Saulo aise nkumi na nkumi, Daudi yaita mitwalo na mitwalo.’ ”

¹² Daudi yeeraliikirira olw'ebibono ebyo, yaatya inho Akishi kyabazinga w'e Gathi.

¹³ Agho yaakyusanga eneebisa ye ng'abalimu, yeegwisanga eiralu nga bamugemye, yaakwadulakwadulanga ku ndhigi edh'omulyango gw'ekibuga. Era yaalekanga amatanta gaakuuluulira mu kirevu.

¹⁴ Agho Akishi yaakoba abagheereza be ati: “Mubone, ono omusaadha agwire iralu, kale lwaki mumundeeteire?

¹⁵ Abalalu n'abambuze, memale mundeetere omusaadha ono akolere ghano eiralu mu maiso gange? Obwo mudhuuba muti omusaadha oyo anaingira mu ndhu yange?”