1 Ab'e Thessalonika 4 - Baibuli Ekibono kya Katonda 2014

Obulamu Katonda bw'asiima

¹ Aboluganda, mwatwegeraku nga bwe mugwaine okwebisa memale musobole okusiimya Katonda, era ekyo kye mubaire mukola. Mperaano tubeeghembye era tubakubiriza mu liina lya Musengwa Yesu, mukole mutyo ate era mwongeremu n'amaani,

² kuba mwidhi bye twabagalagira ku lwa Musengwa Yesu.

³ Katonda ayenda, mube batukuvu, era mulekere irala obwenzi.

⁴ Kiisi mulala ku imwe amanhe okwebisanga mu butukuvu era ni mu kitiisa ye mukazi we.

⁵ Mutafugibwanga mairu ga mubiri ng'oti n'abantu ab'ensi abatatya Katonda bwe bakola.

⁶ Ku nsonga eno ey'okwebisa mu butukuvu, ghatabangagho muntu akola Mukurisito mwine bubi. Kuba nga bwe twabalabuliragho, Katonda abonereza abakola ebintu ng'oti n'ebyo.

⁷ Katonda atweta tube batukuvu aye ti kuba badankaanu.

⁸ Kale, aloba bino aba talobye bya bantu buntu, aye aba alobye bya Katonda oyo abagha Mwoyo we Omutukuvu.

⁹ Tikyetaagisa muntu kubaghandiikira ku bigema ku kugonzania ng'abaikiriza. Katonda mwene n'eyabeegesa okugonza.

¹⁰ Era kino kye mubaire mukola, nga mugonza aboluganda boonaboona abali mu Makedonia mwonamwona. Aye era aboluganda, tubeeghembye mweyongere bweyongere.

¹¹ Mufubenga okuba emiraala nga timwengiza mu bya bandi, era mufubenga okweyemerezaagho n'emikono gyaimwe nga bwe twabakoba.

¹² Olwo abatali baikiriza balibataamu ekinhagansi, era timulyetaaga muntu yeenayeena kubeemerezaagho.

Okwidha kwa Musengwa

¹³ Aboluganda, twenda mumanhe ebigema ku abo abaafa, mulobe kunakughala kwagayaga n'abo abazira isuubi.

¹⁴ Nga bwe twikiriza nga Yesu yafa memale yaazuukira, era tutyo bwe twikiriza nga Katonda aliiza ghalala ni Yesu abo abaafa nga bamwikiriza.

¹⁵ Kino kye tuli kubakobera n'ekibono kya Musengwa tuti: Ife abalamu, Musengwa b'alyagaana nga tukaasigairegho lw'aliidha, titulyesooka abo abaafa.

¹⁶ Musengwa mwene aliika ng'ava mu igulu, ekiragiro kyawulirwa mu iroboozi ery'amaani, isebamalaika yaayeta era endeka ya Katonda yaavuga. Abo abaafa nga baikiriza mu Kurisito n'abalisooka okuzuukira,

¹⁷ memale ife abalamu, abaliba bakaasigairegho twatwalibwa ghalala nabo mu bire okwagaanana ni Musengwa mu ibbanga. Era olwo tubenga eyo ni Musengwa buliidho.

¹⁸ Agho ni buli muntu agumye mwine n'ebibono ebyo.