1 Ab'e Thessalonika 3 - Baibuli Ekibono kya Katonda 2014

¹ Kale twabona nga titukaaghanga kuguminkiriza, twasalagho okusigala mu Athene twenka.

² Twatuma muganda waife Timotheo, omugheereza wa Katonda mu kukobera abantu Amawulire Amalungi aga Kurisito, aidhe abalambe era abagumye mu kwikiriza kwaimwe,

³ ghalobe kubaagho awaamu maani olw'okukirigibwa. Mukiidhi bukalamu ng'ebyo bye tuli n'okubitamu.

⁴ Kuba lwe twali n'imwe twabakobereragho nga bwe tuli n'okudaazibwadaazibwa era nga bwe mwidhi obukalamu ebyo ni byenebyene ebibairegho.

⁵ Kyova bwe nabona nga tikaasobola kuguminkiriza, natuma Timotheo mmanhe okwikiriza kwaimwe bwe kuli, nga ntya nti tomanha mulebi bw'aba nga yabaleba, okufaabiikana kwaife ni kufa busa.

⁶ Mperaano Timotheo aize ng'ava eyo, yaatuleetera amawulire amalungi agagema ku kwikiriza kwaimwe n'okugonza kwaimwe. Era atukobeire nga buliidho bwe mutwidhukira einho, era nga bwe mwegomba okutubonaku oti niife bwe twegomba okubabonaku.

⁷ Kale ni aboluganda okwikiriza kwaimwe kutwiziizaamu amaani waire nga tuli mu buzibu n'okudaazibwadaazibwa,

⁸ kuba mperaano tuba balamu bwe mwekalangula ku Musengwa.

⁹ Ye tunaakola ki, okwoleka Katonda nga bwe tuli abasiimu olwa imwe n'olw'okusagamba kwe tuwulira mule olwa imwe mu maiso ge?

¹⁰ Tumweghemba omusana n'obwire atuganhe okubonaganaku n'imwe maiso ku maiso, olwo twidhuulirize ebikaabulaku mu kwikiriza kwaimwe.

¹¹ Tusaba Katonda waife era Lata waife, mwene ni Musengwa waife Yesu, atusobozese okwidha ye muli.

¹² Era Musengwa abongeremu okugonzanianga beene na beene, n'okugonzanga abantu boonaboona oti niife bwe tubagonza.

¹³ Olwo abagumye emyoyo gyaimwe, mube nga muziraku musango, era mube abatukuvu mu maiso ga Katonda waife era Lata, ku lule Musengwa waife Yesu lw'aliidha n'abatuukirivu be boonaboona.