1 Ab'e Thessalonika 2 - Baibuli Ekibono kya Katonda 2014

Paulo bye yakola mu Thessalonika

¹ Aboluganda, imwe beene mwidhi ng'okwidha kwaife ye muli ti kwafa busa.

² Waire twali tumaze okudaazibwadaazibwa era n'okuswazibwaswazibwa bwe twali e Filippi, nga bwe mwidhi, twaguma ku lwa Katonda waife twabakobera Amawulire ge Amalungi mu kutakanizibwa okunene.

³ Bye tubakoba ti biva mu buguya, oba mu mwoyo mubi, oba okwenda okubawubisa.

⁴ Aye nga Katonda bwe yatwesiga n'atugemya Amawulire Amalungi, era twena tugakobera abantu nga bw'ayenda. Titugezaaku kusiimya bantu aye tusiimya Katonda akebera emyoyo gyaife,

⁵ kuba nga bwe mwidhi, titukozesangaku bibono bya kusuutiriza waire ebibono ebighemba ku mairu ag'eby'okufuna, Katonda nga n'omudhulirwa.

⁶ Era titukolererangaku kusaakibwa bantu, ka babe imwe oba abandi, waire nga twandisoboire okubakaluubiriza ng'Abatume ba Kurisito.

⁷ Aye twegendereza nga tuli mu imwe, twaba ng'oti n'omulezi ow'abaana nga alera abaana be.

⁸ Kale nga bwe twabagonza einho, nga titusobola kukanga ku kubagha Mawulire Malungi aga Katonda gonka, aye era n'okubeegha ife beene, kuba mwali badingu ye tuli.

⁹ Aboluganda, mwidhukira bwe twakolanga nga tufaabiikana omusana n'obwire, tulobe kukaluubiriza muntu yeenayeena ku imwe nga tubakobera Amawulire Amalungi aga Katonda.

¹⁰ Imwe abaikiriza muli badhulirwa baife era ni Katonda atudhulira, nga twebisanga eri mwe ng'abatukuvu, abatuufu era abaziraku musango.

¹¹ Mwidhi nga buli muntu ku imwe twamubisanga ng'omuzaire bw'abisa abaana be. Twabaizaamu amaani, twabagumya era twaloba kulekera agho kubakubiriza

¹² okuba mu bulamu Katonda bw'asiima, oyo abeeta okwingira mu Bwakyabazinga bwe era mu kitiisa kye.

¹³ Era titulekera kweyanza Katonda kuba bwe mwawulira ekibono kye, kye twabakobera mwakisangaalira ti ng'ekibono eky'abantu aye ng'ekibono ekya Katonda, nga era bwenebwene bwekiri ekibono kya Katonda ekikolera mu imwe abaikiriza.

¹⁴ Aboluganda, mwaba oti n'ab'omu Bikunsu eby'Abaikiriza mu Kurisito Yesu ebya Katonda eby'omu Buyudaaya. Mwena mwadaazibwadaazibwa ab'eighanga lyaimwe nga bale bwe badaazibwadaazibwa Bayudaaya banaibwe.

¹⁵ Abayudaaya abo n'abaita Musengwa Yesu n'abalanzi, era n'ife baatubingira ku luya. Baleetera Katonda okudhuunia era bazigu ba buli muntu,

¹⁶ nga batwekiika emberi tulobe kukobera abamaghanga agandi ebibono eby'okubalokola. Ekyo buliidho kyaidhuuliriza ebibi bye bakola. Aye ekiviire mu ebyo ni Katonda okubamaliraku ekiruyi kye.

Paulo ayenda inho okwirayo kabiri okubabona

¹⁷ Aboluganda, akaseera akatono ako kasookanga tukakibwa kuva eyo, waire nga timutuvanga mu myoyo gyaife, tubaire nga twegomba inho era nga tugezaaku inho okwidha okubabona maiso ku maiso.

¹⁸ Twayenda inho twire tubaboneku, era nze mwene Paulo nagezaaku emikuzi kamaala aye nga Sitaani tatuganha.

¹⁹ Kuba eisuubi lyaife, eisanhu lyaife, n'okwesaaka olw'obughanguzi mu maiso ga Musengwa waife Yesu lw'aliira, biri mu ani? Tibiri mu imwe?

²⁰ Bwenebwene okwesaaka kwaife n'eisanhu lyaife biri mu imwe.