1 Ab'e Korintho 9 - Baibuli Ekibono kya Katonda 2014

Emirimo gy'omutume ni by'agwaine okukolerwa

¹ Tiri wa idembe? Tiri mutume? Tyabona Yesu Musengwa waife? Imwe timwava mu mulimo gwe nakolera Musengwa waife?

² Waire abandi tibantwala ng'omutume, aye ndi mutume ye muli, kuba imwe beene niimwe akamanhiso akakakasa obutume bwange mu Musengwa.

³ Abo abantakania mbairamu nti:

⁴ Titugwanira kugheebwa bya kulya olw'omulimo gwe tukola?

⁵ Titugwanira kukola ng'Abatume abandi, era nga baganda ba Musengwa, era nga Petero, abatambula ni bakazi baibwe?

⁶ Barunaba ninze, niife twenka abali n'okukola okweyemerezaagho?

⁷ Mwisirukale ki eyeesasulira mwene ng'ali mu igye? Naani asimba enimiro y'emizabbibu n'atalya ku bibala byayo? Mwayi ki atanhwa ku mata ga mu kyayo kye?

⁸ Ni bwentakoma ku bya kuboneraku bino byonka ebyabuliidho, Amateeka ga Musa goona bwe gakoba.

⁹ Kyaghandiikibwa mu Mateeka ga Musa kiti: “Tosibanga nte munwa bw'eba ng'emulungula engaano.” Obwo agho Katonda aba alumirwa nte?

¹⁰ Bwene yali tategeeza ife? Kyaghandiikibwa ku lwaife, kuba alima agwana okulima ng'asuubira, ate asekula agwana okusekula nga asuubira okugheebwa ku by'asekula.

¹¹ Kale oba mu kubakobera ekibono twabasigamu ebibaganhula omwoyo, kiba kibi ife okubakungulamu ebituganhula omubiri?

¹² Oba abandi bagwaniire okusuubira bino okuva ye imwe, ife titugwaniire inho n'okubasinga ni tubasinga? Aye tukaali kubasaba kintu kyonakyona nga bwe tugwaine. Tuguminkiriza buli kintu olw'obutenda kutaagho kirobera Mawulire Malungi aga Kurisito kusansaana.

¹³ Timwidhi ng'abo abakola mu isinzizo balya ku bya mu ndhu ya Katonda, era n'abo abagheereza ku alutaari ya Katonda bafuna omugabo gwaibwe okuva ku bigheebwayo ku alutaari?

¹⁴ Mu nsambo n'endala Musengwa yalagira ati abo abakobera abantu Amawulire Amalungi bateekwa okwemerezebwagho olw'omulimo ogwo.

¹⁵ Aye nkaali kubasaba kintu kyonakyona, era waire mperaano tiri kubaghandiikira lwa kubasaba kintu kyonakyona. Kasinga mmala gafa ntaganhie muntu yeenayeena kuntoolaku ekyo ekindeetera okwenhumiriza.

¹⁶ Bwe nkobera abantu Amawulire Amalungi ekyo tikindeetera kwenhumiriza, kuba era nteekwa buteekwe okubakobera, era mba nga nkagwireku bwentakobera bantu Mawulire Amalungi.

¹⁷ Ekyo bwe nkikola olw'okwenda kwange mba ndi n'okugheebwa empeera, aye olw'okuba Katonda yakingemya, nteekwa buteekwe okukikola.

¹⁸ Kale mpeera ki ye nfuna? N'eno: okukobera abantu Amawulire Amalungi ku bwereere nga tisaba kusasulwa olw'omulimo ogwo.

¹⁹ Waire nga tiri mwiru wa muntu yeenayeena, nafuuka omwiru wa boonaboona nsobole okuleetera Kurisito abantu kamaala.

²⁰ Mu Bayudaaya, nafuuka ng'Omuyudaaya nsobole okuleeta Abayudaaya. Mu abo abafugibwa Amateeka, nafuuka ng'afugibwa Amateeka nsobole okuleeta abo abafugibwa Amateeka, waire nga nze tifugibwa Mateeka.

²¹ Mu bamaghanga agandi nafuuka ng'abamaghanga agandi abatafugibwa Mateeka, nsobole okuleeta abamaghanga agandi. Kino tikitegeeza kiti tigondera mateeka ga Katonda. Mu butuufu ngondera eiteeka lya Kurisito.

²² Mu banafu mu kwikiriza, nafuuka ng'omunafu nsobole okuleeta abanafu. Kale nafuuka ebintu byonabyona mu bantu boonaboona, bwe kiba nga kisoboka mbeeku ni be ndokola.

²³ Olw'okwenda okugabana ku bikalamu ebiva mu Mawulire Amalungi, kyenva nkola ebyo byonabyona.

²⁴ Bwenebwene mukiidhi ng'ababa mu ntaka edh'okulumuka baba kamaala, aye aghangula ekirabo aba mulala. Kale mulumuke mu nsambo ebasobozesa okughangula ekirabo.

²⁵ Buli muzaanhi azaanha emizaanho egy'entaka, yeegendereza inho asobole okufuna ekirabo eky'ekiseera obuseera, aye ife twegendereza inho tufune ekirabo ekitawaagho.

²⁶ Nze kyenva numuka butereevu ku kagugha, tiri ng'oti n'omukubi w'ebifunsi akuba eibanga.

²⁷ Nfuntira irala omubiri gwange era naagufugira irala, nze ndobe kutoolebwa mu ntaka nga mmaze okukobera abandi Amawulire Amalungi.