1 Ab'e Korintho 8 - Baibuli Ekibono kya Katonda 2014

Eby'okulya ebigheebwayo eri ebisinzibwa ebitali Katonda

¹ Mperaano nga ndhira mu ebyo bye mwampandiikiraku ebigema ku by'okulya ebigheebwayo eri ebisinzibwa ebitali Katonda, twidhi nga “twenatwena tuli n'okumanha”. “Okumanha” okwo kuleetera omuntu okwebona nga wa ghaigulu, aye okugonza kuzimba omuntu.

² Ole bw'alowooza ati ali ni ky'aidhi, aba akaali kumanha nga bw'agwaine kumanha.

³ Aye omuntu bw'agonza Katonda, Katonda amumanha.

⁴ Kale ku bigema ku by'okulya ebigheebwayo eri ebisinzibwa ebitali Katonda, twidhi nga mu butuufu ebisinzibwa ebitali Katonda biziramu makulu, era nga Katonda ali mulala ati, ezira wundi.

⁵ Waire ebaayo ebyetebwa “bakatonda” mu igulu oba mu nsi, era nga bw'eriyo “bakatonda” ni “basengwa” abangi,

⁶ ife tuli ni Katonda mulala, Lata, eyatonda ebintu byonabyona, era tuligho ku lw'oyo. Era ghaligho Musengwa mulala, Yesu Kurisito, ebintu byonabyona mwe byabita okutondebwa, era mwe tubita okuba abalamu.

⁷ Aye okumanha kuno tikwa bantu boonaboona. Abandi olw'okumanhirira ebisinzibwa ebitali Katonda, ni ye buli eno bwe balya eby'okulya oti n'ebyo, bawulirira irala mule nga bigheereibwayo eri ebisinzibwa ebitali Katonda. Era olw'omwoyo gwaibwe okuba omunafu, bawulira nga eby'okulya ebyo biboonoine.

⁸ Aye eby'okulya ghazira kye bitwongereku mu maiso ga Katonda. Katonda tatubona ng'abalungi, bwe tulya, oba okutubona ng'ababi, bwe tutalya.

⁹ Aye mwegendereze eidembe lino lirobe kusuula banafu mu kibi.

¹⁰ Omuntu ali n'omwoyo omunafu bw'akubona iwe oli n'okumanha ng'otyaime okulya mu isabo, kino tikireetera muntu oyo kufuna maani kulya eby'okulya ebigheebwayo eri ebisinzibwa ebitali Katonda?

¹¹ Kale olw'okumanha kwo oba ozikiriiza owoluganda oyo omunafu, Kurisito ye yafiirira.

¹² Kale bwe mukola ekibi ku boluganda ni mukosa emyoyo gyaibwe eminafu, muba mukoze ekibi ku Kurisito.

¹³ Kale oba nga eby'okulya bireetera muganda wange okugwa mu kibi, tiireyo kubirya ndobe kuleetera muganda wange kugwa.