1 Ab'e Korintho 7 - Baibuli Ekibono kya Katonda 2014

Ebigema ku bufumbo

¹ Mperaano nga ndhira mu ebyo bye mwampandiikiraku, kiba kikalamu omusaadha obutaba na mukazi.

² Aye olw'okweghala obwenzi, buli musaadha abenga n'omukazi we, ate buli mukazi abenga n'iba.

³ Omusaadha atuukirizenga ebimusabibwa mu bufumbo era n'omukazi akolenga atyo.

⁴ Omukazi ti n'afuga omubiri gwe mwene, aye iba n'agufuga. N'omusaadha ti n'afuga mubiri gwe mukazi we n'agufuga.

⁵ Ole atalobanga mwine, okutoolaku nga musoose kwisania mwataagho ekiseera eky'okusabiramu Katonda. Aye ekiseera ekyo nga kiwoireku mwirengamu nga buliidho, kuba Sitaani asobola okubasendasenda mwaloba kwekuuma.

⁶ Kino ti kiragiro aye mbagha bwa magezi.

⁷ Abantu boonaboona nguli baba oti ninze kyandibaire kikalamu, aye buli muntu ali n'ekitone kye eky'endhawulo Katonda ky'amugha. Ono amugha kino, ole yaamugha kire.

⁸ Kale abo abakaali kubayiza oba kubayira, ni banamwandu, mbakoba nti kiba kikalamu bwe basigala abalangasa ng'oti ninze bwendi.

⁹ Aye bwe baba nga tibasobola kwekuuma babayire oba babayize, kuba okubaiza oba okubayira kusinga okusiriira n'amairu.

¹⁰ Eri abafumbo, ndi n'ekiragiro, ekitali kyange, aye ekya Musengwa, ekiragira omukazi obutanobanga.

¹¹ Aye bw'anobanga, asigalenga nga mulangasa. Bwe kitaba kityo airengayo ewa iba baisanie, era omusaadha atabinganga mukazi we.

¹² Abandi nze mbakoba, aye ti ni Musengwa abakoba, nti owoluganda omusaadha bw'aba n'omukazi atali mwikiriza, omukazi oyo n'aganha okuba naye aghalala, atamubinganga.

¹³ Era owoluganda omukazi bw'aba n'omusaadha atali mwikiriza, aye n'aganha okuba naye aghalala, atanobanga.

¹⁴ Omusaadha atali mwikiriza aba muntu wa Katonda ku lwa mukazi we, ate omukazi atali mwikiriza yeena yaaba muntu wa Katonda ku lwa iba. Nguli tikyali kityo abaana baibwe bandibairenga ng'abataidhi Katonda. Aye nga bwekiri kityo, boona baba bantu ba Katonda.

¹⁵ Aye atali mwikiriza bw'aba nga ayenda okuleka owoluganda, aje. Agho owoluganda omusaadha oba omukazi ghazira kimusiba, kuba Katonda yatweta tube n'eidembe.

¹⁶ Iwe owoluganda omukazi, oidhi otya oba niiwe olikyusa balo? Oba iwe owoluganda omusaadha, oidhi otya oba niiwe olikyusa mukazi wo?

Sigala nga Katonda bwe yakweta

¹⁷ Buli muntu asigale mu bulamu Musengwa bwe yamugha, Katonda mwe yamwetera. Ntyo bwe ndhegeresa mu Bikunsu eby'Abaikiriza mu Kurisito byonabyona.

¹⁸ Oyo eyayetebwa nga mukekete atagezangaku kwetoolaku nkovu dha bukekete, n'oyo eyayetebwa nga ti mukekete atakeketebwanga.

¹⁹ Ekikulu tikukeketa oba butakeketa, aye kugondera mateeka ga Katonda.

²⁰ Buli muntu agwaine asigale nga bwe yali ng'akaali kwetebwa.

²¹ Wali mwiru nga Katonda akaali kukweta? Tofaayo. Aye oba nga ghaligho omukisa ogw'okufuuka ow'eidembe, gukozese.

²² Omwiru eyayetebwa Musengwa, aba muntu wa Musengwa ow'eidembe eyatoolebwa mu bwiru, mu nsambo n'endala ow'eidembe atabangaku mwiru eyayetebwa Musengwa, aba mwiru wa Kurisito.

²³ Katonda yamala okubagula, kale mutafuuka bairu ba bantu.

²⁴ Kale aboluganda, buli muntu agheerezenga Katonda mu bulamu bwe yalimu, Katonda bwe yali ng'akaali kumweta.

Abatali bafumbo ni banamwandu

²⁵ Mperaano nga ndhira mu ebyo ebigema ku batafumbirwangaku, nzira kiragiro kiva wa Musengwa, aye mpa bwa magezi ng'omuntu asobola okwesigibwa olw'ekisa kya Musengwa.

²⁶ Ndhuuba nti olw'ebiseera ebizibu ebirigho, kikalamu omuntu okusigala nga bw'ali.

²⁷ Oli ni mukazi wo? Kale otagezangaku kumwetoolaku. Okaali kubayiza? Kale otagezangaku kubayiza.

²⁸ Aye bw'obayiza oba tokoze kibi, era n'omughala omwegha bw'abayira aba takoze kibi. Aye abafumbo baba n'ebizibu kamaala, era nandyenze okubawonia ebizibu oti n'ebyo.

²⁹ Aboluganda, kye nkoba ni kino nti ekiseera kisigaireyo kitono, era okuva ni mperaano abali n'abakazi beebise ng'oti bazira

³⁰ ate abo abali n'enaku, babe ng'oti bazira nnaku, abo abaseka babe ng'oti tiibasangaavu abo abagula babe ng'oti bye bagula ti byaibwe.

³¹ Abo abajiira ku bintu eby'omu nsi, babe ng'oti tibabijiiraku. Kuba ensi eno nga bw'eri mperaano, eri kumpi kukoma.

³² Nhenda mulobe kweraliikirira. Omusaadha atali mufumbo yeeraliikirira bya Musengwa, kuba ky'agezaaku n'okumusiimya.

³³ Aye omusaadha omufumbo yeeraliikirira eby'ensi eno, kuba afuba okusiimya mukazi we,

³⁴ omwoyo gwe guba ghano ni ghale. Omukazi atali mufumbo oba omughala omwegha yeeraliikirira bya Musengwa, kuba ayenda okwegha Musengwa yeenayeena mu mubiri ni mu mwoyo. Aye omukazi ali mu bufumbo yeeraliikirira eby'omu nsi, kuba ayenda okusiimya iba.

³⁵ Kino ndi kukikoba olw'obulungi bwaimwe. Tirikugezaaku kubakaluubiriza, aye nhenda mukole ekintu ekituufu era ekikalamu, era mwegheereyo irala okukola omulimo gwa Musengwa n'omwoyo omulala.

³⁶ Oyo eyamala okwandhula bw'akibona nga tikikola bukalamu omughala ye yamala okwandhula, ng'amairu ali na mangi, era ng'awulira ng'ateekwa okubayiza omughala oyo, akole nga bw'ayenda, amubayize aba takoze kibi.

³⁷ Aye oyo atakakiibwa bukakibwe era amaliriire mu mwoyo gwe obutabayiza, era ng'asobola bukalamu okufuga amairu ge, era ng'amaze okusalagho mu mwoyo gwe eky'okukola, kiba kikalamu obutabayiza mughala oyo.

³⁸ Kale oyo abayiza mwine ye yamala okwandhula akola bukalamu, aye asinga n'oyo atabayiriza irala.

³⁹ Omukazi omufumbo tasobola kuba wa busa iba bw'aba ng'akaali mulamu. Aye iba bw'afa asobola okubayira omusaadha owundi, aye omusaadha oyo ateekwa kuba nga Mukurisito.

⁴⁰ Aye mu kubona okwange, okusigala nga bw'ali mwe yandisinze kwesiimira, era ndowooza nga zeena ndi ni Mwoyo wa Katonda.