1 Ab'e Korintho 6 - Baibuli Ekibono kya Katonda 2014

Abakurisito okughaghabiragana ku mbuga

¹ Owundi ku imwe bw'aba n'ensonga ku woluganda, akana atya okutwala ensonga ye eri abalamuzi abatali baikiriza, mu kifo eky'okugitwala eri abantu ba Katonda?

² Timwidhi ng'abantu ba Katonda n'abalisalira ensi omusango? Kale oba nga niimwe abalisalira ensi omusango, timusobola kusala busango butono obwo?

³ Timwidhi nga niife abaja okusalira bamalaika omusango? Memale tulemwa tutya okusala emisango egy'omu bulamu buno?

⁴ Lwaki bwe muba n'emisango oti ni gino mugitwalira abantu abanhoomebwa Ekikunsu ky'Abaikiriza mu Kurisito okugisala?

⁵ Timuswala? Bwenebwene mu imwe muzira muntu mugezi asobola kusala musango ghagati gh'aboluganda?

⁶ Owoluganda yaawoza n'owoluganda mwine, era yaaganha abataikiriza okubasalira omusango?

⁷ Okughaghabiragana ku mbuga beene na beene, kwoleka ng'okwebisa ng'Abakurisito kubalemye. Lwaki timumala gaguminkiriza bisobyo bya banaimwe? Lwaki timumala gaganha banaimwe kubatwalaku byaimwe?

⁸ Aye imwe beene musobya, era mwatwala ebitali byaimwe ni bwekuba ku boluganda beene.

⁹ Timwidhi ng'abakozi b'ebibi tibalingira mu Bwakyabazinga bwa Katonda? Mulobe kwerimba ghazira badankaanu, waire abasinza ebitali Katonda, waire abenzi, waire abatamiivu, waire abasaadha abadankaana ni basaadha banaibwe, oba abakazi abadankaana ni bakazi banaibwe, abalingira mu Bwakyabazinga bwa Katonda.

¹⁰ Era ghazira baibi, oba ab'amairu, oba abatamiivu, oba abavumagani, oba abanhazi, abalingira mu Bwakyabazinga bwa Katonda.

¹¹ Era abandi ku imwe mutyo bwe mwali, aye mwanaazibwa mwafuulibwa bantu ba Katonda era abatuufu eri Katonda, mu liina lya Musengwa waife Yesu Kurisito, ni mu Mwoyo wa Katonda.

Mukozese emibiri gyaimwe okugheesa Katonda ekitiisa

¹² Owundi akoba ati: “Ndhikirizibwa okukola buli kintu kyonakyona.” Aye ti kiri nti buli kintu kikuyamba. Nsobola okukoba nti: “Ndhikirizibwa okukola buli kintu kyonakyona,” aye tija kuganha kuba mwiru afugibwa kintu kyonakyona.

¹³ Owundi yaakoba ati: “Emere yakolerwa mabunda, ate amabunda gaakolerwa mere.” Aye Katonda alibitoolagho byombi. Omubiri tigwakolerwa bwenzi aye gwakolerwa okugheereza Musengwa, era Musengwa ni mwene mubiri.

¹⁴ Era Katonda eyazuukiza Musengwa twena alituzuukiza mu maani ge.

¹⁵ Timwidhi ng'emibiri gyaimwe bitundu bya mubiri gwa Kurisito? Memale obwo ntoole ebitundu by'omubiri gwa Kurisito mbifuule ebitundu eby'omubiri gw'omwenzi? Busa naire!

¹⁶ Oba timwidhi nga eyeeyimba n'omwenzi bafuuka mubiri mulala naye? Ebyaghandiikibwa bikoba biti: “Ababiri banaafuukanga mubiri mulala.”

¹⁷ Aye oyo eyeeyimba ku Musengwa afuuka mulala naye mu mwoyo.

¹⁸ Mweghalenga obwenzi. Ebibi ebindi omuntu by'akola tabikola ku mubiri gwe, aye omwenzi ayonoona ku mubiri gwe gwene.

¹⁹ Timwidhi ng'emibiri gyaimwe n'eisinzizo lya Mwoyo Mutukuvu ali mu imwe era eyabagheebwa Katonda? Timuli baimwe ku bwaimwe, aye muli ba Katonda.

²⁰ Katonda yamala okubagula, kale mugheese Katonda ekitiisa n'emibiri gyaimwe.