1 Ab'e Korintho 5 - Baibuli Ekibono kya Katonda 2014

Obwenzi mu bantu ba Katonda

¹ Bakoba mbu mu imwe mulimu obwenzi obubi einho obutaagaanibwa na mu bataikiriza Katonda ng'omuntu okweiriza muka ise!

² Kale musobola mutya okwetwala ng'aba ghaigulu? Mwandibaire nga munakughala bunakughale, era omusaadha eyakola ekintu oti n'ekyo abingibwe mu imwe abantu ba Katonda.

^3-4 Waire tiri n'imwe mu mubiri, ndi n'imwe mu mwoyo, era ndi ng'oti ndi n'imwe eyo, kuba mu liina lya Musengwa waife Yesu, namala ira okusalira omusango omusaadha eyakola ekibi ekyo. Bwe muliba nga mwesoloiza, zeena nga ndi n'imwe mu mwoyo, nga mukozesa amaani ga Musengwa waife Yesu,

⁵ omusaadha oyo mumugheeyo mu maani ga Sitaani omubiri gwe guzikirizibwe, memale omwoyo gwe gulokolebwe ku lunaku lwa Musengwa waife Yesu.

⁶ Timuli batuufu okwetwala okuba aba ghaigulu. Timwidhi ng'ekizimbulukusa ekitono kizimbulukusa engaano yoonayoona mwe kiteereibwa?

⁷ Mwetoolemu ekizimbulukusa ekikaire eky'ekibi, olwo mube engaano empyaka omuzira kizimbulukusa nga bwe muli bwenebwene. Kuba Kurisito, entaama yaife ey'Ekibinuko eky'Okubitizibwa yamala okwitibwa.

⁸ Kale ka tufumbe embaga, ti na mugaati ogulimu ekizimbulukusa ekikaire eky'eitima n'obubi, aye n'omugaati oguziramu kizimbulukusa, omugaati gwenegwene ogw'amazima.

⁹ Mu mbaluwa ye nabaghandiikira nabakoba obutakolagananga na benzi.

¹⁰ Tyakoba benzi ba nsi eno, oba ab'amairu, oba abanhazi, oba abasinza ebitali Katonda, kuba ekyo kyandibaire ng'okubakoba okuviira irala mu nsi.

¹¹ Kye nali nkoba n'obutakolagananga na muntu yeeyeta waluganda aye ate nga mwenzi, oba nga wa mairu, oba asinza ebitali Katonda, oba omuvumagani, oba omutamiivu, oba omwibi; omuntu ng'oti n'oyo n'okulya mutalyanga naye.

¹² Kwona ti mulimo gwange kusalira abataikiriza musango. Abo abaikiriza be mube musalire omusango.

¹³ Katonda alisalira abo abataikiriza omusango ng'ebyaghandiikibwa bwe bikoba biti: “Mubinge omuntu omubi abaveemu.”