1 Ab'e Korintho 4 - Baibuli Ekibono kya Katonda 2014

Abatume ba Kurisito

¹ Agho ni mukimanhe nga tuli bagheereza ba Kurisito abaateebwagho okuba abakuumi ab'amazima g'ekyama kya Katonda.

² Ekintu ekyendebwa ku mugheereza oti n'oyo, n'okuba omwesigwa ye Musengwa we.

³ Nze ku bwange tifaayo imwe okunsalira omusango, oba omuntu owundi yeenayeena. Ninze mwene, tyesalira musango.

⁴ Nze tiidhi ng'eriyo ekibi kye naali nkoze, aye ekyo tikitegeeza nti nziraku musango. Musengwa n'asalagho.

⁵ Kale mutasaliranga muntu yeenayeena musango nga ekiseera kikaali kutuuka ekya Musengwa waife okwidha. Oyo alita mu butangaavu ebintu ebigise mu nzikiiza, era alitoolayo ebidhuubo ebigise mu myoyo gy'abantu byamanhibwa. Olwo ni buli muntu yaasiimibwa Katonda.

⁶ Aboluganda, ku lwaimwe nkozeisa Apollo ninze nga eky'okuboneraku, musobole okumanha amakulu ag'endhogera ekoba eti: “Otaswika kyaghandiikibwa.” Memale olwo mulobe kwesuutira mu ono, na kunhooma ole.

⁷ Naani eyakufuula ow'ekitiisa okusinga abandi? Katonda ti n'eyakugha byonabyona by'oli nabyo? Kale byonabyona by'oli nabyo bwe biri birabo bulabo, ozira nsonga lwaki weesuuta.

⁸ Mwamala okufuna buli kye mwetaaga! Mwamala ira okufuuka abakombe! Mufuuse bakyabazinga, aye nga ife tukaali! Kyandibaire kikalamu nguli bwene mubaire bakyabazinga ni tufugira aghalala n'imwe.

⁹ Kimbonekera oti ife Abatume Katonda atughaire ekifo ekisembayo, okufaanana ng'oti n'abantu abasaliirwa ogw'okufa kuba tufuuse ekyerolerwa eri ensi, eri bamalaika era n'eri abantu.

¹⁰ Ku lwa Kurisito ife tuli basiru, aye imwe muli bagezi mu Kurisito oyo! Ife tuli banafu, aye imwe muli ba maani! Ife tunhoomebwa, aye imwe muteebwamu ekitiisa.

¹¹ Okutuukiza irala ku saawa ya mperaano tuja ndhala nga n'endiwo etuluma, tuvaala biziina, tukubibwa, tuzira maka tuwuunzuuma buwuunzuume,

¹² era tukola inho twakoogha. Bwe batukolimira, ife tubendeza nkabi bwe batukiriga, tuguminkiriza.

¹³ Bwe batwogeraku obubi, ife tuboogeraku bukalamu. Twafuuka era tuli ng'oti n'ebikaba eby'ensi eno mu buli kintu tuli ng'oti iseedha buseedha.

¹⁴ Bino mbighandiise ti lwa kwenda kubaswaza, aye lwa kwenda kubeegeresa ng'abaana bange abagonzi.

¹⁵ Kuba waire muli n'ababeegeresa kamaala, mu Kurisito muli ni Lata waimwe mulala. Kuba nze nafuuka Lata waimwe bwe nabakobera Amawulire Amalungi.

¹⁶ Kale mbeeghembye muntwale ng'eky'okuboneraku.

¹⁷ Olwa kino ndi kubatumira Timotheo, omwana wange omugonzi era omwesigwa, abaidhukizenga enkola yange mu bulamu buno obuyaaka mu Kurisito Yesu, era ye ndhegeresa mu Bikunsu eby'Abaikiriza mu Kurisito byonabyona.

¹⁸ Abandi ku imwe beetwala okuba aba ghaigulu, kuba balowooza bati tiriidhaku eyo.

¹⁹ Aye Musengwa bw'aliba ng'ayenze ndidha kwidha mangu, olwo mmanhe amaani ag'abantu abo abeetwala okuba aba ghaigulu, ng'otoireku bye boogera obwogere

²⁰ kuba obwakyabazinga bwa Katonda tibubonekera mu bibono bubono, aye bubonekera mu maani.

²¹ Mwenda ki ku bino? Ndidhe eyo na lwigo, oba na kugonza mu mwoyo omukalamu?