1 Ab'e Korintho 16 - Baibuli Ekibono kya Katonda 2014

Okuyamba Abakurisito

¹ Mperaano nga ndhira mu ebyo bye mwampandiikira ebigema ku kwesondamu eby'okutonera abatuukirivu, mbakoba nti mwena mukole ng'oti bwe nakoba Ebikunsu eby'Abaikiriza mu Kurisito ebiri mu Galatia.

² Buli lunaku olusooka mu wiiki, buli muntu ku imwe abengaku ni ky'abiika ng'ajiira ku by'afunie, mulobe kwesondanga nga ndidhie.

³ Era bwe ndituuka, ndigha abantu abo be muliba musembye embaluwa, naabatuma okutwala ebirabo byaimwe e Yerusalemu.

⁴ Bwe kiriboneka nga kikalamu zeena okuja, balija ninze.

Engendo dha Paulo

⁵ Ndibakyalira nga mmaze okukyala e Makedonia, kuba e Makedonia ye ndibita nga ndidha.

⁶ Nsuubira okubaaku n'imwe oba katyo mu kiseera eky'ekiinhogogo kyonakyona, musobole okwanguya olugendo lwange buli ye ndija.

⁷ Kuba tyenda kubabona bubone nga mbita, aye ndhuuba okumalaku n'imwe entangama egheraku, Musengwa bw'aliba ng'aganhie.

⁸ Ndidha kuba mu Efeso okutuusa ku kibinuko kya Pentekote

⁹ kuba nfuniire irala akaghagaanhia okukolerayo omulimo ogw'omugaso, waire nga eriyo abazigu kamaala.

¹⁰ Timotheo nga aidhie, mumusangaaze bukalamu, kuba yeena akolera Musengwa ng'oti ninze.

¹¹ Ghatabangagho amunhooma, aye mumwanguyize olugendo lwe lube lukalamu aire ye ndi, kuba ndi kumusuubira okwira n'aboluganda.

¹² Aye owoluganda Apollo namukoba inho aidhe abakyalire ghalala n'aboluganda abandi, aye tiyayenda kwidha buti. Aliidha nga afunie akaghagaanhia.

Ebisembayo

¹³ Mumogenga butatemya, munhwere mu kwikiriza, mube bagumu era ba maani.

¹⁴ Byonabyona bye mukola mubikolenga n'omwoyo ogugonza.

¹⁵ Aboluganda, mwidhi nga Sitefana n'ab'omu maka ge n'abasooka okukyuka mu Akaia, era beeghaayo okugheereza.

¹⁶ Aboluganda, mbeeghemba mugonderenga abantu ng'oti n'abo, era mugonderenga n'oyo yeenayeena afuba okukolera aghalala nabo.

¹⁷ Kyansangaaza inho Sitefana ni Forutunato ni Akaiko bwe baidha, kuba baaligho mu kifo kyaimwe.

¹⁸ Bandhizaamu amaani era nga mwena bwe baabaizaamu. Abantu oti n'abo mubaisengaku inho omwoyo.

¹⁹ Ebikunsu eby'Abaikiriza mu Kurisito mu Asia bibalamwisa. Akwila ni Purisikilla aghalala n'Ekikunsu eky'Abaikiriza mu Kurisito ekyesololeza mu ndhu yaibwe babalamwisa inho mu Musengwa.

²⁰ Aboluganda boonaboona babalamwisa. Mulamusaganie nga munhwegeragana.

²¹ Ninze Paulo aghandiise okulamusa kuno n'omukono gwange gwene.

²² Oyo yeenayeena atagonza Musengwa alaamibwe. Musengwa idha!

²³ Enkabi dha Musengwa Yesu dhibe n'imwe,

²⁴ Okugonza kwange kube n'imwe mwenamwena mu Kurisito Yesu. Amiina.