1 Ab'e Korintho 14 - Baibuli Ekibono kya Katonda 2014

Ebindi ebigema ku birabo Mwoyo by'agha

¹ Munuyirirenga okugonza banaimwe, era mufubenga okufuna ebirabo Mwoyo by'agha, era nga ekisinga bukulu n'eky'obulanzi.

² Ayogera mu nnimi tayogera na bantu aye ayogera na Katonda, kuba by'ayogera ghazira abiteegera, aye ayogera ebyama bya Katonda n'amaani ga Mwoyo.

³ Aye oyo ayogera eby'obulanzi ayogera na bantu, abakobera ebibazimba, abagumya era abaizaamu amaani.

⁴ Oyo ayogera mu nnimi yeezimba yenka, aye oyo ayogera eby'obulanzi azimba Ekikunsu eky'Abaikiriza mu Kurisito kyonakyona.

⁵ Nandyenze mwenamwena mwogere mu nnimi, aye okusingira irala nandyenze mwogere eby'obulanzi. Kuba oyo ayogera eby'obulanzi asinga oyo ayogera mu nnimi, okutoolaku nga ghaligho aghanga okuvuunula, memale Ekikunsu eky'Abaikiriza mu Kurisito kyaganhulwa.

⁶ Kale aboluganda bwe ndidha ye muli nga ndhogera mu nnimi muganhulwamu ki? Ghazira naire, okutoolaku nga mbakoberayooku Katonda by'andholeike, oba okumanha, oba obulanzi oba okugalaga.

⁷ Ni bwe biba ebivuga ebizira bulamu, ka tukobe ng'endere oba entongooli, bwe bitavuga bukalamu naani aghanga okumanha ekifuuyiibwa oba ekikubiibwa?

⁸ Era oyo afuuwa endeka bw'atafuuwa bukalamu, naani aghanga okwetegekera olutalo?

⁹ N'ekirala n'imwe mwena. Bwe mwogera mu nnimi ebitategeerekeka, omuntu owundi yeenayeena alimanha atya ekikobwa? Kuba muba muli kwogerera bwereere.

¹⁰ Ghaligho enimi kamaala mu nsi, aye ghazira lulimi luzira makulu.

¹¹ Aye bwe mba tiidhi lulimi muntu lw'ayogera, mba mugwira y'ali, era yeena aba mugwira ye ndi.

¹² Mwena nga bwe mwegomba okufuna ebirabo ebya Mwoyo, mufubenga inho okukozesa ebyo ebizimba Ekikunsu eky'Abaikiriza mu Kurisito.

¹³ Agho ni, oyo ayogera mu nnimi, asabenga Katonda amughenga n'ekirabo eky'okudhivuunula,

¹⁴ kuba bwe nsaba mu nnimi edhitategeerekeka omwoyo gwange guba gusabye aye okumanha kwange kuba kuzirayo.

¹⁵ Olwo ndi na kukola ki? Ndidha kusabanga n'omwoyo gwange, era nsabenga n'okumanha kwange kwona. Ndidha kwembanga n'omwoyo gwange, era nhembenga n'okumanha kwange kwona.

¹⁶ Kuba bw'osiima Katonda mu mwoyo, omuntu atategeera ky'okoba aghanga atya okwiramu ati, “Amiina” ng'omaze okusaba?

¹⁷ Ni bw'oba ng'osiimye bukalamu otya, omuntu oyo taganhulwa.

¹⁸ Nsiima Katonda kuba mwenamwena mbasinga okwogera mu nnimi.

¹⁹ Aye nga ndi mu Kikunsu eky'Abaikiriza mu Kurisito, mmala googera bibono bitaanu ebitegeerekeka naayegeresa abandi, okusinga okwogera ebibono olukumi (1,000) mu nnimi edhitategeerekeka.

²⁰ Aboluganda, mutabanga na bidhuubo ng'oti bya baana bato. Bwe kuba mu bya kukola bubi, mube ng'oti baana bato abaziraku musango. Aye mu kudhuuba mube bakulu.

²¹ Mu mateeka kyaghandiikibwa kiti: “Ndyogera n'abantu bange, nga nkozesa abantu aboogera enimi edhindi, era nga nkozesa eminwa egy'abagwira, aye era abantu bange tibalimpulira. Atyo Musengwa bw'akoba.”

²² Agho ni okwogera mu nnimi kamanhiso ka bataikiriza aye ti ka baikiriza, ate obulanzi kamanhiso ka baikiriza aye ti ka bataikiriza.

²³ Ekikunsu eky'Abaikiriza mu Kurisito kyonakyona bwe kyesoloza, boonaboona ni batoolera okwogera mu nnimi, memale ni ghaidhagho ab'endha oba abataikiriza, tibabeeta bwa balalu?

²⁴ Aye boonaboona bwe baba nga bali kulanga, memale ataikiriza oba ow'endha naingira, by'awulira byonabyona bimulumiriza olw'ebibi bye, era byamusalira omusango.

²⁵ Ebyo by'adhuuba mu mwoyo gwe eby'engiso byerulwa, yaakuba amakiryaivu, yaasinza Katonda ng'akoba ati: “Bwenebwene Katonda ali mu imwe.”

Entegeka ey'omu Kikunsu eky'Abaikiriza mu Kurisito

²⁶ Kye nkoba ni kino aboluganda: Bwe mwesoloza okusinza, owundi aba n'olwembo olusaaka Katonda, ole yaaba ni ky'ayegeresa. Ole yaaba ni Katonda ky'amwoleike, ole yaaba n'okwogera mu nnimi, ate ole owundi yaaba n'okuvuunula ebyogerwa. Buli ekikolebwa kibe nga kigasa Ekikunsu eky'Abaikiriza mu Kurisito.

²⁷ Bwe ghabaagho aboogera mu nnimi, babenga babiri oba obutaswika basatu. Boogerenga mulala mulala, era ghabengagho avuunula.

²⁸ Aye bweghaba nga ghazira aghanga kuvuunula, oyo ayogera mu nnimi, atayogeranga mu kusinza, koodhi ayogerenga bibye yenka, na kwogera na Katonda.

²⁹ Ghabengagho babiri oba basatu abali n'obulanzi babwogerenga, abandi nga bwe bagerangerania ebyo ebyogeirwa.

³⁰ Aye bweghabaagho atyaime agho, Katonda n'amwoleka ekintu, oyo abaire ali kwogera asookenga alekere.

³¹ Kuba mwenamwena musobola okulanga omulala omulala, memale boonaboona baasobola okwega era bairamu amaani.

³² Abo abali n'ekirabo eky'obulanzi bateekwa okukifuga,

³³ kuba Katonda tayenda tube mu kudoobaana, aye ayenda tube miraala, nga bwekiri mu Bikunsu eby'Abaikiriza mu Kurisito byonabyona.

³⁴ Bwe mwesolozanga mu Kikunsu eky'Abaikiriza mu Kurisito, abakazi basirikenga busirike. Kuba tibaikirizibwa kwogera, era ng'Amateeka bwe gakoba babenga bawulize.

³⁵ Bwe ghabangagho ekintu kyonakyona kye benda okumanha, babuuzenga baibaibwe eka kuba kiswaza omukazi okwogera mu Kikunsu eky'Abaikiriza mu Kurisito nga beesoloiza.

³⁶ Ki! Mudhuuba muti ekibono kya Katonda kyava mu imwe, oba muti kyatuuka ku imwe mwenka?

³⁷ Omuntu yeenayeena bwe yeetwala okuba omulanzi, era n'okuba ng'ali n'ekirabo Mwoyo ky'agha, amanhe nga bye ndi kubaghandiikira, kiragiro kya Musengwa.

³⁸ Atakiisaaku mwoyo yeena balobenga kumwisaaku mwoyo.

³⁹ Kale aboluganda mwemalirenga ku kya kulanga, aye mutaloberanga bantu kwogera mu nnimi.

⁴⁰ Byonabyona bikolebwenga bukalamu era nga bisengeke.