1 Ab'e Korintho 13 - Baibuli Ekibono kya Katonda 2014

Okugonza

¹ Ni bwe ndhogera enimi edh'abantu n'edha bamalaika, aye nga tigonza bantu banange, mba ng'oti n'endege edhiwoloma, oba endongo edhiwaala.

² Era ni bwe mba n'amaani ag'obulanzi, ni ntegeera ebyama bya Katonda byonabyona, era ni mmanha ebintu byonabyona, era ni bwe mba n'okwikiriza okusobola okusimulagho ensozi, aye ni mba nga tigonza bantu banange, tiba na muganhulo.

³ Ni bwe mpaayo ebyange byonabyona okuliisa abanaku, era ni bwe mpaayo omubiri gwange okwokebwa ghazira kye nganhulwa, bwe mba nga tigonza bantu banange.

⁴ Omuntu agonza baine aba n'okuguminkiriza, n'ekisa, taba na nsaalwa, tiyeebona yenka era tiyeesaaka mwene,

⁵ tiyeebisa bubi, taba wa nkikidi, tasungughala mangu era tiyeegemerera.

⁶ Agonza baine tasangaalira kibi, aye asangaalira mazima.

⁷ Agonza baine agumira ebintu byonabyona, tairirira mu kusuubira, era aguminkiriza ebintu byonabyona.

⁸ Eby'obulanzi birikoma, okwogera mu nnimi kulikoma, n'okumanha kulikoma, aye okugonza tikuliwaagho.

⁹ Kuba okumanha kwaife n'obulanzi bwaife bwakitundu.

¹⁰ Era ekituukiriire bwe kiriidha, eby'ekitundu birikoma.

¹¹ Bwe nali nga ndi muto nayogeranga ng'omuto, era naalowoozanga ng'omuto, aye bwe nakula naaleka eby'ekito.

¹² Mperaano tubonera mu mbonerwamu, twaloba kubona bukalamu. Aye ku lule tulibonagana maiso ku maiso. Mperaano ndidhiku kitundu butundu, aye ku lule ndimanhira irala mu bwidhuvu, era oti ni Katonda bw'andidhi.

¹³ Mperaano ghaligho ebintu bisatu: okwikiriza, okusuubira n'okugonza aye ekisinga bino obukulu, kugonza.