1 Ab'e Korintho 12 - Baibuli Ekibono kya Katonda 2014

Ebirabo Mwoyo Mutukuvu by'agha

¹ Aboluganda, nhenda mumanhe bukalamu ebigema ku birabo Mwoyo Mutukuvu by'agha.

² Mwidhi nga bwe mwali nga mukaali kufuuka ba Kurisito, mwabuzibwabuzibwanga, mwajanga okusinza ebintu ebisinzibwa ebitali Katonda ebitoogera.

³ Kale nhenda mukimanhe nga ghazira muntu ayogera ng'ali ni Mwoyo wa Katonda, n'akoba ati: “Yesu akolimirwe!” Era ghazira asobola kukoba ati: “Yesu ni Musengwa,” okutoolaku ng'ali ni Mwoyo Mutukuvu.

⁴ Ghaligho ebika kamaala eby'ebitone, aye Mwoyo ali mulala abigaba.

⁵ Era ghaligho ensambo edh'okugheereza kamaala, aye Musengwa agheerezebwa ali mulala.

⁶ Ghaligho ensambo kamaala edh'okukoleramu emirimo, aye era Katonda n'asobozesa buli muntu okugikola.

⁷ Mwoyo abonekera mu buli muntu olw'obukalamu bwa boonaboona.

⁸ Mwoyo agha owundi okwogera ebiidhwire amagezi, ate owundi yaamugha okwogera ebiidhwire okumanha.

⁹ Mwoyo n'omulala agha owundi okwikiriza, ate owundi n'amugha amaani ag'okuwonia.

¹⁰ Owundi Mwoyo amugha okukolanga ebyewuunhio, owundi obulanzi, ate owundi okwawulanga ebirabo ebya Mwoyo Mutukuvu n'ebitali bya Mwoyo Mutukuvu. Owundi amugha okwogeranga mu nnimi, ate owundi yaamugha okuvuunulanga enimi.

¹¹ Aye akola bino byonabyona, ni Mwoyo omulala ati era n'agha buli muntu ekikye nga Mwoyo mwene bw'aba ng'ayenze.

Omubiri guli mulala n'ebitundu kamaala

¹² Kurisito ali ng'oti n'omubiri gw'omuntu oguba n'ebitundu kamaala. Aye waire nga guli n'ebitundu kamaala, gusigala nga guli mulala.

¹³ Mu nsambo n'endala twenatwena, ka tube Bayudaaya, oba bamaghanga gandi, oba bairu, oba abatali bairu, Mwoyo yatubatiza mu mubiri mulala, era twenatwena twagheebwa Mwoyo mulala oyo.

¹⁴ Kuba omubiri tiguba kitundu kirala, aye guba ebitundu kamaala.

¹⁵ Ekigere bwe kikoba kiti, “Olw'okuba tiri mukono, n'olw'ekyo tiri kitundu kya mubiri”, ekyo tikikitoolaku kusigala nga kikaali kitundu kya mubiri.

¹⁶ Era ni kutu bw'akoba ati, “Olw'okuba tiri liiso n'olw'ekyo tiri kitundu kya mubiri,” ekyo tikimutoolaku kusigala ng'akaali kitundu kya mubiri.

¹⁷ Nguli omubiri gwonagwona gwali liiso, gwandiwuliire gutya? Era nguli gwonagwona gwali kutu, gwandiwunhiiza gutya?

¹⁸ Aye nga bwekiri, Katonda yata mu mubiri ebitundu eby'endhawulo nga bwe yayenda.

¹⁹ Omubiri tigwandibairegho nguli ebitundu byonabyona byali kitundu kirala.

²⁰ Aye nga bwekiri, ebitundu biri kamaala aye omubiri guli mulala.

²¹ Kale, eriiso tirisobola kukoba mukono liti, “Tikwetaaga”, waire omutwe okukoba ebigere guti, “Imwe tibeetaaga.”

²² Aye ate ebitundu eby'omubiri ebiboneka oti binafu n'ebyetaagibwa einho,

²³ era ebitundu ebyo eby'omubiri bye tutwala obutaba bya kitiisa inho, bye tusinga kutaamu kitiisa. Ebyo ebitagwaine kwolekebwa bye tusinga okwegendereza einho, mu nsambo ye tuteegenderezaamu

²⁴ ebyo ebirungi. Atyo Katonda bwe yakola omubiri, yaagha ekitiisa ekinene bitundu ebisinga kunhoomebwa.

²⁵ Memale olwo omubiri gulobe kwekutulakutulamu, aye ghabeegho okulumirwagana mu bitundu byagwo.

²⁶ Bwe ghabaagho ekitundu eky'omubiri ekirumizibwa, ebitundu ebindi birumizibwa ghalala nakyo. Era bweghabaagho ekitundu ekigheebwa ekitiisa, ebitundu ebindi bisagambira ghalala nakyo.

²⁷ Imwe mwenamwena muli mubiri gwa Kurisito, era buli muntu kitundu kyagwo

²⁸ era mu Kikunsu ky'Abaikiriza mu Kurisito, Katonda yategeka emirimo ng'asookera ku batume, yaizaaku abalanzi, abokusatu n'abeegeresa olwo yaizaaku abakola ebyewuunhio, yaizaaku abawonia, ababeezi, abafuzi, n'aboogera mu nnimi.

²⁹ Tikiri nti boonaboona batume, oba balanzi, waire boonaboona okuba abeegeresa. Era ti boonaboona abakola ebyewuunhio.

³⁰ Ti boonaboona abali n'ekirabo eky'okuwonia, oba eky'okwogera mu nnimi, oba eky'okudhivuunula.

³¹ Kale mufubenga okufuna ebirabo ebisinga obukulu, era nja kubooleka engira esingira irala bukalamu.