1 Ab'e Korintho 11 - Baibuli Ekibono kya Katonda 2014

¹ Mukolenga nga nze, era nga zeena bwe nkola nga Kurisito bye yakola.

Okweghemba emitwe mu kusaba

² Mukola bukalamu kuba buliidho mundidhukira, era mwagema butiribiri ebyo bye nabeegeresa.

³ Aye nhenda mumanhe nga Kurisito n'afuga buli musaadha, omusaadha n'afuga mukazi we, era Katonda n'afuga Kurisito.

⁴ Kale omusaadha asaba, oba akobera abantu ekibono kya Katonda nga yeeghembye ku mutwe aswaza Kurisito.

⁵ Aye omukazi yeenayeena asaba oba akobera abantu ekibono kya Katonda nga tiyeeghembye ku mutwe aswaza iba kuba omukazi oyo azira ndhawulo na mukazi amweireku nviiri.

⁶ Omukazi bw'ateeghemba ku mutwe kiba kikalamu okusalaku enviiri dhe. Aye nga bwe kiswaza omukazi okusalaku, oba okughalagata omutwe, ateekwa okweghemba ku mutwe.

⁷ Omusaadha tikimwetaagisa kweghemba ku mutwe, kuba omusaadha n'ekifaananie era n'ekitiisa kya Katonda, aye omukazi n'ekitiisa ky'omusaadha.

⁸ Kuba omusaadha tiyatondebwa ng'ava mu mukazi, aye omukazi n'eyava mu musaadha.

⁹ Era omusaadha tiyatondebwa ku lwa mukazi, aye omukazi n'eyatondebwa ku lw'omusaadha.

¹⁰ Ku lwa bamalaika omukazi agwaine okweghembanga ku mutwe kyoleke ng'afugibwa iba.

¹¹ Aye mu Musengwa omukazi tabaagho yenka nga ghazira musaadha, n'omusaadha tabaagho yenka nga ghazira mukazi.

¹² Ng'omukazi bwe yatondebwa ng'ava mu musaadha, mu nsambo n'endala omusaadha azaalibwa mukazi, era ebintu byonabyona biva ye Katonda.

¹³ Imwe beene mukibone. Kikalamu omukazi okusaba Katonda nga tiyeeghembye ku mutwe?

¹⁴ Obutonde bwonka tibubalaga ng'omusaadha okupiita enviiri kimuswaza,

¹⁵ aye ng'omukazi okupiita enviiri kimubonesa bukalamu? Kuba omukazi dhaamugheebwa ng'ebyokweghemba.

¹⁶ Aye omuntu yeenayeena bw'ayenda okukitakania, akimanhe nga ife n'Ebikunsu eby'Abaikiriza mu Kurisito ebya Katonda, tuzira ngeri yindi mu kusaba okutoolaku eno.

Ekyeigulo kya Musengwa

¹⁷ Mu kino kye nja okubeegeresa nhenda okubakobera nti timukola bukalamu mu kwesoloza kwaimwe, kuba ebivaamu ti biba bikalamu aye bibi.

¹⁸ Okusookera irala, mpulira mbu bwe mwesoloza ng'Ekikunsu eky'Abaikiriza mu Kurisito, mwekutulakutulamu obukunsu, era zeena kino ndi oti nkikakasa.

¹⁹ Aye era okwekutulakutulamu kuli n'okubaagho, memale abatuufu mu imwe bamanhike.

²⁰ Bwe mwesoloza, bye mulya ti n'ekyeigulo kya Musengwa.

²¹ Kuba bwe muba nga mulya buli muntu atoolera bwa kulya mere ye nga tateeze bandi, abandi baasigala ndhala, ate nga abandi batamiire.

²² Ki? Muzira maka gaimwe mwe musobola kuliira na kunhwera? Oba munhooma bunhoome Ekikunsu eky'Abaikiriza mu Kurisito ekya Katonda, na kuswaza abo abazira ke bali nako? Munsuubira kubakoba ki ku nsonga eno? Munsuubira kubasiima? Bbe, tiidha kubasiima.

²³ Okwegeresebwa kwe nafuna okuva ye Musengwa zeena kwe nabagha. Obwire Musengwa Yesu bwe baamugheerayo, yagema omugaati,

²⁴ era bwe yamala okusiima Katonda, yaagumegulamu era yaakoba ati: “Guno n'omubiri gwange oguligho ku lwaimwe. Mukolenga kino olw'okundidhukiranga.”

²⁵ Mu nsambo n'endala, bwe baamala okulya ekyeigulo yaagema ekikopo yakoba ati: “Ekikopo kino n'endagaano empyaka ekakasibwa n'omusaayi gwange. Buli lwe munaakinhwangaku, mukikolenga olw'okundidhukira.”

²⁶ Kino kitegeeza kiti buli lwe mulya ku mugaati guno, era ni munhwa ku kikopo kino, munaabanga muli kumanhisa okufa kwa Musengwa okutuusa lw'aliira.

²⁷ Kale buli alya omugaati oba anhwa ku kikopo mu nsambo etagheesa Musengwa kitiisa, aiza omusango ku mubiri n'omusaayi gwa Musengwa.

²⁸ Agho ni, buli muntu ateekwa kwebona oba nga agwaine, memale yaalya ku mugaati, era yaanhwa ku kikopo

²⁹ kuba buli alya ku mugaati, era n'anhwa ku kikopo nga tategeire makulu ga mubiri gwa Musengwa, yeereetera mwene omusango okumusinga.

³⁰ Eno n'ensonga lwaki bangi ku imwe muli balwaire, era banafu, era n'abandi baafa.

³¹ Aye ife beene nkuli tusooka twebona oba nga tugwaine, Katonda tiyanditusaliire musango.

³² Aye Musengwa bw'atusalira omusango n'atukangaivula, atwegeresa tulobe kusalirwa musango kutusinga aghalala n'ensi.

³³ Kale aboluganda, bwe mwesolozanga okuliira aghalala, mulindengaku banaimwe.

³⁴ Bwe ghabangagho endhala y'eruma, asookenga kulya ka ewuwe memale olwo okwesoloza kwaimwe kulobe kubaviirangamu Katonda kubasalira musango. Ebindi ndibibakobera nga ndidhie.