1 Ab'e Korintho 10 - Baibuli Ekibono kya Katonda 2014

Okulabula ku butasinza bitali Katonda

¹ Aboluganda, nhenda mwidhukire ebyatuuka ku badhaadha baife abaanonereza Musa, boonaboona ekire kyabakulemberamu, era boonaboona baabita mu nhandha.

² Boonaboona mu kire, era ni mu nhandha baabatizibwa mu kwisa ekirala ni Musa.

³ Boonaboona baalyanga ku mere ndala ey'omwoyo,

⁴ era baanhwanga eky'okunhwa kirala eky'omwoyo. Baanhwanga ku lubaale olw'omwoyo olwatambulanga nabo, era olubaale olwo ni Kurisito.

⁵ Aye waire kyali kityo abasinga obungi ku abo, Katonda tiyabasiima, era baafiira mu irungu.

⁶ Mperaano ebintu bino bya kutulabula tulobe okwegomba ebintu ebibi ng'abo bwe baakola.

⁷ Mutasinzanga bitali Katonda ng'abandi ku abo bwe baakola, era nga bwe kyaghandiikibwa kiti: “Abantu baatyama okulya n'okunhwa era baira mu makina amabi.”

⁸ Tulobenga kukola bikolwa bya bwenzi ng'abandi ku abo bwe baakola, ni bafa emitwalo ebiri n'enkumi eisatu (23,000) ku lunaku olulala.

⁹ Tulobenga kuleba Musengwa ng'abandi ku abo bwe baakola, emisota ni gibaita.

¹⁰ Era tutaduuduumanga ng'abandi ku abo bwe baakola, Malaika ow'okufa n'abaita.

¹¹ Bino byonabyona byabatuukaku bibe eby'okuboneraku eri abandi, era byaghandiikibwa olw'okutwegeresa ife abaligho mu biseera bino ng'ensi eri kumpi okutuuka ku nkomerero.

¹² Kale buli adhuuba ng'ali n'okwikiriza okugumu yeegendereze alobe kugwa.

¹³ Ghazira kulebwa kubatuukaku, okutatuuka ku bantu bandi. Aye Katonda tasubagha, taja kuganha kulebwa kwe mutasobola kubatuukaku. Mu kiseera eky'okulebwa aidha kubaghanga amaani ag'okubigumira era n'amagezi ag'okubighangula.

¹⁴ Kale bakagwa mutaseetanga ya kusinza bintu ebisinzibwa ebitali Katonda.

¹⁵ Ndi kwogera n'imwe ng'ayogera n'abantu abategeera, mwesaliregho beene ku bye ndi kwogera.

¹⁶ Ekikopo ekyo kye twebalizaaku Katonda ti n'okwisa ekirala mu musaayi gwa Kurisito? Era omugaati gwe tumegulamegulamu ti n'okwisa ekirala mu mubiri gwa Kurisito?

¹⁷ Kuba waire tuli kamaala, tuli mubiri mulala, kuba tulya omugaati mulala.

¹⁸ Kale mubonere ku Baisiraeli abo abalya ebigheebwayo eri Katonda baba tibagabaniire ghalala mu kugheereza Katonda ku alutaari?

¹⁹ Ndi kukoba ki? Nti ebisinzibwa ebitali Katonda, oba eby'okulya ebigheebwayo, birimu amakulu?

²⁰ Busa! Kye ndi kukoba ni kino nti, ebyo ebigheebwayo mu masabo, ebyo babigha mizimu mibi aye ti Katonda, era tyenda imwe mwise kirala na mizimu mibi.

²¹ Timusobola kunhwa ku kikopo kya Musengwa, era ni munhwa na ku kikopo kya mizimu mibi. Timusobola kulya ku kiiwulo kya Musengwa era ni mulya na ku kiiwulo kya mizimu mibi.

²² Twenda kuleetera Katonda kuba wa nkikidi? Niife tumusinga amaani?

²³ Abandi bakoba mbu: “Twikirizibwa okukola buli kintu,” aye omuganhulo ti guli mu byonabyona “Twikirizibwa okukola buli kintu,” aye tikiri nti buli kintu kizimba.

²⁴ Omuntu atakoleranga lwa bulungi bwe mwene, aye akolerenga lwa bulungi bwa bandi.

²⁵ Kiisi mamba etundibwa mu kiya, mulyenga bulye na mwoyo mulala aghazira kubuuliriza

²⁶ kuba ebyaghandiikibwa bikoba biti: “Ensi n'ebigirimu byonabyona bya Musengwa.”

²⁷ Atali mwikiriza bw'abeetanga ku kiiwulo ni muganha okuja, mulyenga buli ky'abagha nga timubuuziiza kibuuzo kyonakyona ekiva mu kudhuubiriza okw'omu myoyo gyaimwe.

²⁸ Aye ole bw'akukobera ati: “Kino kyagheebwayo eri ekisinzibwa ekitali Katonda,” otakiryanga ku lw'oyo akukobeire, ni ku lw'omwoyo.

²⁹ Nkoba omwoyo gwe, aye ti ogugwo. Kale lwaki okudhuuba okw'omuntu owundi kundobera okukola nze kye ndidhi nga kituufu?

³⁰ Bwe mba nga mpaireyo okusaba kwange okw'okwebaza olw'emere, lwaki omuntu annenia olw'okulya emere ye neebaliiza Katonda?

³¹ Kale buli kye mukolanga, oba kulya oba kunhwa, mukikolenga olw'okugheesa Katonda ekitiisa.

³² Mutakolanga kintu ekireetera Abayudaaya, oba abamaghanga agandi, oba Ekikunsu eky'Abaikiriza mu Kurisito ekya Katonda okugwa mu kibi.

³³ Mukole nga nze bwenkola ngezaaku okusiimya abantu boonaboona mu buli kye nkola nga tikolera lwa bulungi bwange mwene, aye lwa boonaboona basobole okulokolebwa.