Yowani 13 - Seysyo No Tao

Oyasan na ni Yeso o ai no macinanao jya

¹ Kasaraw pa kapamaring da na so kanen do ngaranan da Iyeci am katenngan na rana ni Yeso o kakeykai na rana meysinaoli ji Ama na do to. Na tey karilaw o omanoyong jya tao do karawan. Tana marateng rana o ikawakwak na am ji namtadan o karilaw na nira.

² Moyab sira do araraw no ipamaring da so kanen ni Yeso a kano macinanao jya am amyan rana si Satan do onowned no anak ni Simong a meyngaran so Yota a tao do Isecyadi. So nipamnekan na rana do kapanazang na ni Yeso.

³ Katenngan na ni Yeso o kanitomoro na nya jya ni Ama ta do to so oyowyat na. Katenngan na o kanimapo na ji Ama ta do to. So ipakateneng na do kapeysinaoli na ji Ama ta do to.

⁴ Am ori o peytatanek na do yanan na kapakaro na so magorogod na a mahap so asa ka veynget a pabteken do kawakan na.

⁵ Karahan am mapaglo so ranom do simingki a kaoyas na rana do ai no macinanao jya a kalinas na do ai da no veynget.

⁶ Oyasan na o ai ni Simong Pite am maniring si Pite am, “Mo Panirsirngen, mo oyasan o ai ko?”

⁷ Maniring si Yeso am, “Mo jyatenngi pa o vazay ko sicyaikwaya. Am no kadadayan no araw am katenngan mo na.”

⁸ Maniring si Pite am, “Ji ko amya imo a omoyas do ai ko.” Maniring si Yeso am, “No si ji ko ngoyasi o ai mo am ji ko imo abneka a macinanao jyaken.”

⁹ Maniring si Simong Pite am, “Mo Panirsirngen, no komwan am oyasi ai ko a kano lima ko a kano oo ko.”

¹⁰ Maniring si Yeso am, “O nimarios rana tao am todamimin rana o kataotao na manownaw. Am ori o ika ai na rana no oyasan. Inyo rana am kamo manonownaw am beken a kamo todamimin.”

¹¹ Katenngan na rana ni Yeso o manazang nya. Am ori o pancyan na no, “Beken a kamo todamimin a yamanownaw.”

¹² Mateyka na rana oyasan o ai da am peyyayoben na rana o magorogod na a kahezsad na rana. Maniring do macinanao jya am, “Manngwa, nyo katenngan o peypeypangayan no ko nioyasan do ai nyo an?

¹³ Kamo manoyong a manci nyaken a Mangnanao a Panirsirngen nyo. Manoyong ori.

¹⁴ Yaken am Panirsirngen nyo, yamnanao jinyo a yaniomoyas do ai nyo. Akman kamo sang a omoyas do ai no kadwan jinyo.

¹⁵ Yamyan rana so yako nipacita jinyo. So to nyo vangovangoni sya peyvazain an.

¹⁶ To ko na macitangayan jinyo am ji na meyhavasi no pavahain da tao o mapavahay sya an. Jyakarakarang o pahanhanen da kano mapahanhan sya an.

¹⁷ No nyo na katenngan o akman sya nanao am no si pangononongan nyo am tey rako o sarasaray nyo an.

Pazimanen na o keyyan no manazang nya

¹⁸ “Beken a ko to zagoma inyo a yapeyciringan sya, ta ko katenngan sira o yako nitenngan a tao. Am manoyong o ciring do Seysyo an. Ta maniring am, ‘O yamacihanghang jyaken a asa ka tao am yamanazang nyaken.’ So ipangononong no ciring ang.

¹⁹ Ko na to mancyan jinyo do na ikabo pa no vazay eya. Ta no si makaranes rana o vazay am anoyngan nyo na yaken a meyngongyod a Tao do to.

²⁰ To ko na macitangayan jinyo am o tomaotao so nitovoy ko am yaken o taotawwen da. O tomaotao jyaken am si Ama ta do to o taotawwen da, ta iya o yanitomovoy jyaken.”

²¹ Iptad na o ciring na ni Yeso am meyngen o onowned na. Maniring rana am, “To ko na mancyan jinyo am yamyan jinyo so yasa ka tao a yamanazang nyaken.”

²² Karahan am meysingsingkad sira o macinanao jya, do kaji da makatenngan do peycirngan na sya.

²³ Asa do macinanao jya o ikaglaw ni Yeso a macitangked ji Yeso.

²⁴ Maniring si Simong Pite jya am, “Panahsan pala. Sino na ipanci ang.”

²⁵ Karahan am macisngen rana ori ji Yeso. Maniring ji Yeso am, “Sino mo ipanci ang, mo Panirsirngen.”

²⁶ Maniring si Yeso am, “O torwan ko no pang eya am iya ang.” Iptad na o ciring na am mangap so asa ka pang a kapatodeh na sya ji Yota a anak ni Simong a tao do Isecyadi kahap na sya.

²⁷ Meyratateng am bedbedan na ni Satan o onowned na. Maniring si Yeso jya am, “No yamyan so yamo ipeynanakem a vazay mo am peyvazain mo am.”

²⁸ Ji da tenngi o ciring ni Yeso ji Yota no karwan da amlisna do dang.

²⁹ Si Yota rana am meymatmatngeh no nizpi da. Am ori o pancyan da no, “Ala na pahanhanen ori a yamangap so yata ipamaring so kanen an. No na ipanci a yamanidong so makasi a tao.”

³⁰ Kanen na o pang ni Yota am makowbot rana a komaro jira. No kano nang am mahep rana a masari.

Vayo a inanao na sira

³¹ Makowbot si Yota am maniring si Yeso am, “Sicyaikwaya am macita nyo na o azwazway ko a Nipamnekan na ni Ama ta do to a tao. Ta pakacittan da no tao so azwazway na ni Ama ta do to do Nipamnekan na tao.

³² No yamanoyong kapakacita da no tao so azwazway na ni Ama ta do to do Nipamnekan na tao am akman sang si Ama ta do to a zomwazway so Nipamnekan na tao. So na ikakeykai rana no azwazway no Nipamnekan na ni Ama ta do to a makaranes.

³³ Yalikey rana, manga keypong, ko ipacikaop jinyo. Tana kalahen nyo yaken am ji nyo a kala yaken. Am ko to mancyan rana jinyo sicyaikwaya akman so mina ciring ko do panipanirsirngen da no tao do Yotay. O angayan ko am ji nyo makaranesi.

³⁴ O itoro ko a vayo a inanao ko jinyo am masicyakarilaw kamo. To nyo nita o aryarilaw ko jinyo. Ta akman kamo so sang a masicyakarilaw.

³⁵ No si manoyong o kapasicyakarilaw nyo am katovilan da na inyo no tao do karawan a manoyong a omanop jyaken.”

Pazimanen na ni Yeso ji Pite o kalalas na jya

³⁶ Maniring si Simong Pite ji Yeso am, “Mo Panirsirngen, do wanjin mo angayan.” Maniring si Yeso am, “O ko angayan am ji ka macihza jyaken sicyaikwaya. Am cyaha, ta no makwa am amyan ka na do yanan ko.”

³⁷ Maniring si Pite am, “Mo Panirsirngen, ikongo ikarahet na no kapacihza ko jimo sicyaikwaya. Tana yangay ko imo no inawan am ji ko manesehan.”

³⁸ Maniring si Yeso am, “Manngwa, manoyong o kangay mo nyaken so inawan an? Am to ko na macitangayan jimo am si omanam a tomazokokok o manok am ipitlo ka omalalas jyaken.”