Locya 4 - Seysyo No Tao

Niharag na ni Yeso o nimlita jya Satan

¹ Meysinaoli si Yeso a nimapo do Yotan a ayo am oyatan no Seyzi. So nipalolwan na sya no Seyzi a yangay do kabwan no nihakawan no tao,

² a kasikapat na ngarnan (40) so araraw do dang a littan ni Satan. So ji na nikomani do araraw. Am ori o nikakcin na.

³ Maniring jya si Satan am, “No ka manoyong a Anak no Tao do to am pancyan pala o vato eya a kapeyvaliw na myanpaw.”

⁴ Tovisan ni Yeso am, “Maniring do Seysyo am, ‘Beken a kanehen o ikavyay no tao an.’ ”

⁵ Am ori o nitanggahan na ni Yeso ni Satan do makarang a tokon a kapacita na nya jya so peykamahamahatawan na,

⁶ a kapanci na nya jya so, “O yamo macita rana eya aro a peymasaodan no karawan eya am mamimin a monganay jyaken. Am cyaha, ta itoro ko jimo.

⁷ Am si ilogod mo yaken a iraralay am to ko rana mimina ori a itoro jimo.”

⁸ Tovisan na ni Yeso am, “Yamaniring do Seysyo am, ‘Iraralay nyo o Panirsirngen a Tao do to nyo. So ika iya na no iraralay nyo. Ta abo o ikararwa na a iraralay nyo an.’ ”

⁹ So niraran na pa sya yangay do Yelosaleng a kangay na nya do toktok na no rako a panaralayan da kapanci na nya jya so, “No ka manoyong a Anak no Tao do to am okso pala do teyrahem ito.

¹⁰ Ta maniring do Seysyo am, ‘Manovoy o Tao do to so tinsi a mangay omzat jimo.

¹¹ So tazapyan da jimo no lima da kaji na meyzazan no ai mo do vato.’ ”

¹² Maniring si Yeso jya am, “Maniring do Seysyo am, ‘Ji nyo to ngileylamdama o Panirsirngen a Tao do to nyo an.’ ”

¹³ Tana to na ngakadaya ni Satan o ilita na jya am jyalitai si Yeso. Am ori o nikarwan na pa jya ni Satan.

Papwen na rana ni Yeso o kapangnanao na do Cyadidi

¹⁴ Meysinaoli si Yeso a mangay do Cyadidi am oyatan no Seyzi na ni Ama ta do to. Am ori o nipeylimwang na rana no ngaran na do dang.

¹⁵ So nipangnanao na rana so aro a tao do peyneynozyan da. Ori o nisarayan da nya.

Ikaoya da no keylyan da si Yeso do Nasale

¹⁶ Makaranes si Yeso do nikarakwan na ili a meyngaran so Nasale am pangozayan na o iwawalam da. Ori o nisdep na do peyneynozyan da do araw na no ipeywalam no tao a kapeytatanek na omvilang do Seysyo.

¹⁷ Am ori o nitorwan da nya no tao so vakong ni Isayya a panoyonoywan na so ciring ni Ama ta do to a kavezay na rana sya. So nipakakala na so asa ka ciring. O domket do dang am,

¹⁸ “Yanimeygegcin jyaken o Seyzi na ni Ama ta do to. Ta yana nipamnekan yaken a mangay meylimwang no Mapasaray a Ciriciring na ni Ama ta do to do makasi a tao. Nitovoy na yaken a meylimwang no kasaway da rana no akmey kaneban a tao a kapakacita da rana no mavota tao a kasaliway da rana no peylamlamsoin da tao.

¹⁹ Ipanci ko pa jira o araraw na no karilawan na nira ni Ama ta do to.”

²⁰ Kakookoo na rana so vakong a katoro na rana ya do tomalamozong no peyneynozyan da tao a kalisna na rana ni Yeso. So ji da meykazyazyaki no myan do sahad na tomita sya.

²¹ Am ori o iyan na rana no ciriciring na ni Yeso. Maniring jira am, “O nyo nimamizing rana nivatvatkan da do Seysyo am yamina to mangononong rana sicyaraw eya.”

²² Abo tao a ji ngyak no tey yapya ciring na. So pancyan da no, “Beken a oya asyo o anak ni Yoseyvo an?”

²³ Maniring si Yeso jira am, “Ko katenngan inyo a yamapaing so ciring nyo do kamanrarakehan no kakwa a manci no, ‘No ka manoyong a koysang am avavaw pala o kataotao mo.’ Ta ko nimamizing do ciriciring nyo jyaken a yamanci no, ‘Peyvazay pala do jya o mina vazay mo do Cyapaynong.’

²⁴ Am ko pakoyokoin pa jinyo am yabwata o yasa ka panoyonoywan na so ciring ni Ama ta do to do macikeylyan a yada amizngan so ciriciring.

²⁵ So amizngan nyo sya an. Ta no keyyan na pa ni Idiya panoyonoywan na so ciring ni Ama ta do to am aro do Isedi o vao a mavakes. No kanang rana am kakteb no awan o ikapat na kawan (3½) a ji nimacimoy. Am ori o nipeykabcil na.

²⁶ Am ji na novoya ni Ama ta do to si Idiya mangay do kadwan jira ang. Ta asa ka vao do Saleva a ili a macinapnap do Siton o nyangayan na.

²⁷ No keyyan na pa ni Idisa a panoyonoywan na so ciring ni Ama ta do to am aro do Isedi o omlabyab so kolit. Am o meyngaran so Naman a tao do Sidiya am ori o nikeywakwakan so kataotao.”

²⁸ Mamizing da no aro a tao do sahad no peyneynozyan am maoya sira so aktokto.

²⁹ Am ori o nyalakan da sya a ji ngeypeypepzaci a yangay do alalasyas a vovwan a padondonen. Ta o ili da rana am amyan do toktok no tokon.

³⁰ Am kanimasabsab na ni Yeso a nikomaro do aro a tao.

Nivozwaw na ni Yeso o kalamsoyan ni Satan a nikomovot do tao.

³¹ Makaranes si Yeso do Cyapaynong a macinapnap do Cyadidi am mangnanao do dang so tao do araraw no ipeywalam no tao.

³² Abo ji meyzokab no ipangnanao na ciriciring. Ta o ciring na am tey mowyat.

³³ Amyan do peyneynozyan da so asa ka tao amlololos a kovotan no kalamsoyan ni Satan. Maniring am,

³⁴ “Mo Yeso, tao do Nasale, ikongo vazay mo jyamen. Mo yamen balinasen an? Ko katenngan imo, ta imo rana am nitovoy na no Tao do to a tey yapya so nakenakem a tao.”

³⁵ Am ori o nioyyan na nya ni Yeso. Maniring am, “Ji ka meyzezyak. Pakowbot rana do kataotao na.” Ori o mina to na pazsii sya no kalamsoyan ni Satan a kazyazikaz na no kovotan a tao ang do tangain da no aro a tao. So nipakowbot na rana no kalamsoyan ni Satan am abwata o nipeyzazan na sya.

³⁶ Abo tao ji meyzokab nya. So nipancyan da no, “Asyosyo o ciriciring na ang. A ikongo ori a tao, yana katey rako no oyowyat na yamamozwaw so kalamsoyan ni Satan.”

³⁷ Am ori o nipeylimwangan na rana do dang no ngaran ni Yeso.

Niwakwakan ni Yeso o aro a meykeyngeyngen a tao

³⁸ Karwan na ni Yeso o peyneynozyan da am mangay do vahay da no meyngaran so Simong. O mavakes a icyarwa ni Simong am nipadpes na. So nipasyasyan da ji Yeso.

³⁹ Am ori o nyangay na tomita sya. So nipeytatanek na do katangked na kasirisiring na so ingingnen na am ji na rana nipaingwat. So nipeyvangon na rana tomaotao sira.

⁴⁰ Somipsip o araw do makoyab am yai da no aro a tao o meykeyngeyngen ji Yeso kapaopta na so lima na jira ni Yeso a kapya da rana.

⁴¹ Meyratateng am to ngyan pa so kalamsoyan ni Satan a nimapo do kataotao da no aro a tao a omlololos a manci no, “Imo rana am Anak ka no Tao do to an.” So nioyyan na nira ni Yeso a ji na mya sira meyzezyak. Ta da katenngan o ka Misayya na.

⁴² Meyzengazengang am makowbot si Yeso a kangay na do kabwan no tao. Am ori o nikalan da sya no aro a tao. So nyangay da jya, do kaji da myan sya a komaro jira.

⁴³ Maniring si Yeso jira am, “Beken a inyoo an, ta pasaklangen ko o kadwan no ili a pancyan ko no Mapasaray a Ciriciring na ni Ama ta do to, do kakeykai na rana tomalamozong ninyo ni Ama ta do to. Ta ori o peypeypangayan no na nitovoyan jyaken.”

⁴⁴ Am ori o nyangay na mangnanao do peyneynozyan da do peycyeylilyan na do Yotay.