Ipaziman 9 - Seysyo No Tao

¹ Avyotan no ikalalima no tinsi o zapa am macita ko o asa ka mata no hanit a makas do teyrahem a kahap na so kagi no abo so takadan a gazawagaw a jyatenngi so karaherahem.

² Iwangan na no mata no hanit o gazawagaw am mamsot o rako a aob. So ikakedep na rana no araw a bonbonan no rako a aob,

³ a keyyan no zozon a makowbot do aob a makas do teyrahem. So icyakma dey alilipwan a manongit so tao,

⁴ a keyyan no ciring a manci nya jira so kaji da mapeycyaraherahetan so tamek a kano kayo a kano makakaday a mowamowa. Am apya o kasongit da so jya nitovilan so zozogwan a tao, do kapakatovil da jira a omanop ji Ama ta do to.

⁵ Am marahet o kato da na patoposan sira, ta kapeyingen da sira so kataotao so kalima vehan. O pakaliliwan da sya am akman rana so nisongit no alilipwan a maninicin.

⁶ Apyapyahen da pa o kato da na wakwakan do makalima vehan am ji sira wakwak.

⁷ O kamamagenan da no zozon am akma raney omarap a baka. O sakop da am akma raney vowawan. O moing da am akma raney tao.

⁸ O avok da am akmey avok no mavakes. O ngepen da am akmey ngepen no kokoman so tao.

⁹ O asot da am akma raney vahalang. No somalap sira am akma raney komsoz a baka a zomaigezeg.

¹⁰ Meyyanenbek o ipos da a icyakma dey alilipwan. O ipos da am ori tey rahet a mapeyrarahet so tao so makalima vehan.

¹¹ Amyan so asa ka panirsirngen a tomalamozong nira. Iya rana am tinsi a tomalamozong no abo so takadan a gazawagaw a jyatenngi so karaherahem. O ingaran da jya no Sipolay am Apaton. O ingaran da jya no tao do Sila am Apolon. O peypeypangayan no nang am Manbalinas.

¹² Mavitos o ney manma na alalaw am amyan pa so meykadwa alalaw a mai.

¹³ Avyotan no ikananem no tinsi am makamizing ko so meyzezyak do livolivon no vowawan a patanatanangan so nakem do tangain ni Ama ta do to.

¹⁴ Maniring do ikananem no tinsi a meyzapa am, “Pasaway rana o yapapat a ka tinsi a nipteng do ayo a yameyngaran so Yovalati.”

¹⁵ Karahan am pasawain na rana sira o papat a ka tinsi. Am amyan rana akman sang a nakenakem da a ambalinas so icyakatlo no tao do karawan do awan eya, do vehan eya, do araw eya a sicyacitwai.

¹⁶ O nimamizing ko pa macihza do apat a ka tinsi am yadwa ranaw so kalatolatos (200,000,000) sira o tao a maoran do baka itaysang.

¹⁷ O nimacita ko pa do tateynep ko am aro a baka kano maoran do baka itaysang. O asot da no maoran do baka itaysang am akmey vangkoro a kano mazaponay so keyteytawan a kano akmey kawarey no manok so keyteytawan. O oo no baka am akmey oo no kokoman so tao a keyyan no apoy a kano aob a mamsot do ngoso da.

¹⁸ Icyakatlo no tao do karawan o nimawakwak no mamsot do ngongoy no aro a baka apoy a kano aob.

¹⁹ O oyowyat da no baka am amyan do ngongoy da kano ipos da. So icyakma ney volay no ipos da a pacitolangan no oo da a mapeyzaza so tao.

²⁰ O karwan no tao do karawan a jya nimawakwak no apo do ngongoy no baka am ji da macimazai o kararalay da no kalamsoyan ni Satan a kano ovay a kano gizit a kano vato a kano kayokayo a nyamaog da a ji makacita, ji makamizing, ji makalam.

²¹ Ji da nazidan kapanwakwak da so tao a mangalalas no oyowyat ni Satan, mapeyzavozavoz so tao na a kapanakaw da. So ikabo no pamlimlisan da.