Ipaziman 20 - Seysyo No Tao

Asa zivo (1000) a awawan a ipeypanirsirngen na ni Kizisto

¹ Makarahan am makacita ko so asa ka tinsi a meygegcin a apo do teyngato a meypinan so kagi no abo so takadan a gazawagaw a jyatenngi so karaherahem a kano rako a ipamamaod a vahalang.

² So nirakpan na no tinsi so kamolay. Iya rana ori o volay do Ityan no kakwa pa a meyngaran so Satan. So nivaodan na sya so asa zivo (1000) so awawan.

³ Meyratateng am iwalit na no tinsi si Satan do abo so takadan a gazawagaw a jyatenngi so karaherahem a kaneb na rana jya a patodwan a kaji na ranay mapeykawadan so peycyamahamahatawan so ipakazivo na (1000) so awawan a ji meytotwaw. Manet rana o asa zivo (1000) so awawan am powboten na rana. Am ji meyyonownay a kaneb na rana jya.

⁴ Macita ko o aro a lilisnan no panirsirngen a lisnan no tao. Sira rana am mamimin sira nipanta na so oyowyat da a mapacici a mapeykapyapinpin so tao. So nipakacittan ko so pahad da no niwakwak da a meylimwang no nanao ni Yeso a kano ciriciring na ni Ama ta do to a tao. Sira rana am ji da niraralay o omalalam a kano kamamagenan na. Jidket do zozogwan da kado lima da o ngaran no omalalam. Sira rana am nimamimin sira nimirwa a mavyay a kapacizanod da ji Yeso a meypanirsirngen do asa zivo (1000) a awawan.

⁵ Ori rana am ipisa pa o kapeyvangon. Karwan da no nimawakwak a tao am panalahen da pa o asa zivo (1000) a awawan a kapeyvangon da rana.

⁶ O nimacizanod do ipisa pa kapeyvangon a tao am manoyong sira akma ney anak ni Ama ta do to a tey yapya. Ta ji na rana nalamozongan sira no ipirwa kawakwak. Ta sira rana am abneken na rana sira ni Ama ta do to a kani Kizisto a to ngonongonong do kangay da do tangain na ni Ama ta do to a amraralay nya. So ipacizanod da ji Kizisto a meypanirsirngen so asa zivo (1000) a awawan.

Haragen na si Satan

⁷ Hatasen na o asa zivo (1000) so awawan am pasawain na rana si Satan.

⁸ So yangay na rana mapeykawad so nakenakem da no tao do Keke a kano Make a pacyangayan da no peycyamahamahatawan. So mangay na peylovolovotan sira ni Satan a mangay omarap. O karwaro no tao am akma raney anay do pasalan so karwaro.

⁹ Makakaday sira o tao do peycyamahamahatawan a omlimot so yanan da ili no omanop ji Ama ta do to a tao. Am amyan so apoy a nipeyhekas ni Ama ta do to a itemtem na sira.

¹⁰ Si Satan rana a nimapeykawad sira am iwalit na do akman so awa so karakorako a lila no apoy. Am nimanmanma rana o makahaw a tao a kano omalalam do dang. Sira rana am abo maraw a abo mahep a ipeyrarahet da a mangay do kaidan no karawan.

Imanowji rana ipacici

¹¹ Meyratateng am makacita ko so malavang a rako a lilisnan no panirsirngen a kano amlisna do dang. Ji rana cita o hanit a kano teyrahem a tomayo do tangain na.

¹² Makacita ko pa so nimawakwak a tao. Tana meynakem a tana jyeynakem am abo ji nanek do tangain na. So nikawasak na rana no vakong. O asa ka vakong a adketan no ngarangaran no yanan na rana no to meyyonong a inawan da am akman sang a mawasak. O nimawakwak rana tao am to macilocilolo do mina iwawalam da no keyyan da pa do karawan o domket do aro a vakong ang a ipacici na sira.

¹³ Makarahan am patwawen na no awa o nimawakwak a tao. Akman sang o kacyan a mapatwaw so nimawakwak a tao so pahad. Sira rana am to macilocilolo do mina raraten da no keyyan da pa do karawan o pacicyan na sira.

¹⁴ Karahan am balinasen na o kawakwakan a iwalit do akman so awa so karakorako a lila no apoy. O apoy rana am ipirwa kawakwak.

¹⁵ O abo so ngaran do vakong a adketan no ngarangaran da no yanan na rana no to meyyonong a ikavyay no pahad da am iwalit na sira do akman so awa so karakorako a lila no apoy.