Ipaziman 16 - Seysyo No Tao

Panay a kapnowan no peyoyaoyyan ni Ama ta do to

¹ Makamizing ko so ciring a amlololos a apo do sahad no panaralayan a somirisiring so papito a ka tinsi. Maniring am, “Angay kamo a kapaglo nyo do teyrahem so yamyan do yapito a ka panay a peyoyaoyyan ni Ama ta do to.”

² Mangay o ney manma na tinsi am paglowen na o panay na do teyrahem. Karahan am amlida o noka do kataotao da no yanan no yongkad no omalalam a kano nimraralay no kamamagenan na no omalalam a tao.

³ O tomonton a tinsi am paglowen na o panay na do awa. Karahan am meyvaliw o awa akmey rala no nimawakwak a tao. Ori o nikamimin no masaod no awa a mawakwak.

⁴ O ikatatlo da no tinsi am paglowen na o panay na do ayo a kado atbodan no ranom. Karahan am meyvaliw o ranom a rala.

⁵ Maniring o tomalamozong no ranom a tinsi a nimamizing ko pa am, “Imo rana yamyan sicyaikwaya kano kakwa a yaji meylimoteng so onowned am ka manoyong a yaji mapeycyakaban so tao a yamapacici.

⁶ Sira rana am nipavoyog da o rala no yaomanop jimo a tao a kano panoyonoywan mo so ciring mo. Sicyaikwa rana ya am ipanta mo sira so rala a yopen da. Ta manoyong ori a ipasingsingkad mo sira.”

⁷ Maniring o ciring a apo do patanatanangan so nakem a nimamizing ko am, “Mo Panirsirngen a tey mowyat a Tao do to, yabo mo kalalasan a yamapacici so tao, do yamo kaji mapeycyakabanan so tao.”

⁸ Paglowen no ikapapat no tinsi o panay na do araw am to rana manemtem so tao o azidangdang no araw.

⁹ O tao am kakwatan no azidangdang no araw. Am ori o nyavayan da so tey mowyat a Tao do to a tomalamozong no alalaw. So ji da ngaroi do peyraratenan da. Ji dakzan o kasaray da ni Ama ta do to.

¹⁰ O ikalalima no tinsi am paglowen na o panay na do lilisnan no omalalam ang a apo do awa. Meyratateng am masari rana o italamozong na ili. O tao rana am to da ranangta o lila da, do kateywara no pakaliliwan da so kataotao da.

¹¹ To da na ngavaya si Ama ta do to, do kateywara no pakaliliwan da so kataotao da kano noka da. Am ji da ngaroi o marahet a iwawalam da.

¹² O ikananem no tinsi am paglowen na o panay na do ayo a meyngaran so Yovalati. Meyratateng am to rana akehang do kapeypalanginan na no apo do daddan no araw a panipanirsirngen so rarahan da.

¹³ Karahan am macita ko o tatlo a ka kalamsoyan ni Satan a akmey tozatoza a nimapo do ngoso no kamolay a kado ngoso no omalalam a kado ngoso na no makahaw a tao.

¹⁴ Sira rana am kalamsoyan ni Satan a meyvazay so mapangyangyalak a vazay. Sira rana kalamsoyan ni Satan am mangay sira do peycyeylilyan na a meykala so panipanirsirngen a kalovot da sira a omarap si Ama ta do to no marateng rana o araraw ni Ama ta do to a tey mowyat a Tao do to.

¹⁵ “Amizngen nyo an. No mai ko am akma koy manakaw a ji mapaziman a mai. O meytataziman a tao am tey yapya o akman sang, ta nyayoban na rana o kataotao na. So ji na rana macimasesneki no kataotao na do tangain no tao.”

¹⁶ Karahan am lovoten da rana no tatlo a kalamsoyan ni Satan o aro a panipanirsirngen do ngaranan no Sipolay a tao a Hamaketon.

¹⁷ Paglowen na no ikapapito no tinsi o panay na do hanit am amyan so ciring a apo do lilisnan do panaralayan. Maniring am, “Cyana,” kwan na.

¹⁸ Meyratateng am meycicilat a kapeykadey na, kapeykanini na. Am abo pa o akman sang so karakorako a kanini.

¹⁹ O rako a ili a meyngaran so Papilon am nimeykadwa o nikazazyan na. So ikabo na no jya nimabalinas a ili do peycyamahamahatawan na. O icyakman na sang am peyyanen na ni Ama ta do to do onowned na o raraten da no tao do Papilon. Am ori o nipakasan na sya jira ni Ama ta do to so peyoyaoyyan na.

²⁰ So nikamimin no mahataw a ji rana cita. So icyakman na sang no tokotokon.

²¹ O rako a makarerekmeh am mangay makas do tao. O karehrehmet na am abo makanat sang a tao so karehrehmet. Am ori o to da raheraheci si Ama ta do to, do kateywara no pakaliliwan da so kataotao da meyngen.