Cyalatay 6 - Seysyo No Tao

Macisidosidong kamo do alalaw nyo

¹ Manga kakteh, inyo rana yamakdeng so nakem ji Ama ta do to am no myan so tao a to meyraraten am ji nyo anigan a pamizngen. Am taosya o kapahama nyo so onowned nyo a mapamizing sya. So ipeytataziman nyo, ta kalittan kamo.

² No myan so alalaw nyo am macisidosidong kamo. Ta ori rana am nanao na jyaten ni Yeso Kizisto.

³ O mapakateneteneng a tao am akma ney littan o kataotao na.

⁴ So ikamimin no tao a manakenakem a manci no, “Manngwa, yapya no yamarahet o iwawalam ko.” No si apya am manoyong o kasaray na. So ji mapadmai so kataotao do icyatatao.

⁵ So ikamimin no tao a macipanoyonoyong a ji makanet so nakenakem do tangain na ni Ama ta do to.

⁶ Inyo rana da pamizngen no nanao ni Ama ta do to am sidongen nyo o yamapamizing jinyo no nanao na ni Ama ta do to a tao. Ipanta nyo sira so makakaday a apyahen da no nakem.

⁷ Ji kamo manayotayo do tangain na ni Ama ta do to. Ta abo matayo ta do tangain na. So ikanoyong no kapacilocilolo no mahap no tao do makakaday a mina vazay na.

⁸ Ta no myan so tao a to mangozangozay do nakenakem na am mangay o kapakahap na so to meyyonong a alalaw do makotokotod a lila no apoy. Am no si pangozayan na o ahapan na sya no Seyzi na ni Ama ta do to am mahap na o to meyyonong a ikavyay no pahad na do teyngato a itoro no Seyzi.

⁹ Am ori o ji ta macimaziknai a mapeyvazay so apya vazay. Ta no si to ta ngotokot a mahap so akman sang a vazay am no marateng o araraw no makwa am amyan so nakem na jyaten ni Ama ta do to.

¹⁰ Am ori an, no myan so sidongan ta so icyatatao ta am sidongen ta sira an. Am arakorako pa o sidongan ta so akma tey kakteh do cinai an.

Manowji a ciring na ni Pawlo

¹¹ Citahen nyo an, o yararako a vatvatek. Ta ori rana am yako nivatvatkan ori.

¹² Sira rana mapazway so kataotao da a yamanci ninyo a amyongkad do kataotao nyo am o da ikakman sang am ikanyahey da sira o mapakakasi sira no mangnanao sira no jyojika na ni Kizisto. Ta makanet rana ori a mapatazadang jyaten do teyngato.

¹³ Am sira rana a nimyongkad do kataotao da am da jyamimin o iwawalam na ni Moyse a yamahap. O da pancyan ninyo a amyongkad do kataotao nyo am da pazwain o kaniomamizing nyo sira.

¹⁴ Am yaken rana am yabo ikadwa na no yako pazwain, ta si Yeso Kizisto a Panirsirngen ta o yako pazwain a yanimawakwak nyaten do jyojika. O peypeypangayan no jyojika jyaken am yanimavonas rana o marahet a nakenakem ko. O peypeypangayan no nang am yako na nimamlis.

¹⁵ So ji na ranakdengi no kayongkad do kataotao. Ta makdekdeng o vazay no Seyzi a omyavayo so onowned ta.

¹⁶ Inaoy no si ikarilaw na sira ni Ama ta do to o yamangozay do ciriciring ko, pacyangayan da no tao do Yotay a kano beken a tao do Yotay, kapanta na nira so ikapiya no onowned da.

¹⁷ Inaoy si papwen da sicyaikwaya o kaji da rana zyakan nyaken a meylimwang no ciriciring na ni Yeso Kizisto. Ta o aro a kozad ko do kataotao ko am ori o yongkad ko a lamlamsoy ni Kizisto.

¹⁸ Manga kakteh, inaoy si itoro na jinyo o pangangarilawan na ni Yeso Kizisto a Panirsirngen ta. Amin.