2 Yowani 1 - Seysyo No Tao

¹ Yaken rana am cyozo ko. Yako ipeyteygami imo a yana nipamnekan ni Ama ta do to amraralay nya a mavakes a kano ananak mo. Yatey rako o yako karilawan ninyo. Am beken a yakehen o yamarilaw ninyo, ta yamamimin sira o yamakateneng do nanao ni Ama ta do to a yamarilaw ninyo.

² Ta o nanao ni Ama ta do to am yamyan do onowned ta a mangay do kaidan no karawan.

³ Inaoy si itoro na jyaten ni Ama ta do to a kano Anak na si Yeso Kizisto o pangangarilawan na kano pangangasyan na kano ikapiya no onowned ta. So to ta na noibi nya do karawan so kapangononong ta do nanao na kano pangangarilawan na ni Ama ta do to.

Manoyong a nanao a kano pangangarilawan

⁴ Ko masaray a yamakateneng do na keyyan do ananak mo no yamanoyong a yaomonot do nanao na ni Ama ta do to.

⁵ Am ori o yako vavagan jinyo an. Inaoy si akma tamoy asa a marilaw no kadwan jyaten. Oya rana am beken a vayo a ciring an, ta oya rana am nimamizing nyo na no kavayo nyo pa omanoyong ji Yeso Kizisto.

⁶ O yako ipanci a pangangarilawan am amizngen ta o ciring na ni Ama ta do to. O nimamizing nyo pa no kakwa a pangangarilawan am patwawen nyo do icicirawat nyo.

⁷ Yamyan so aro a mangnanao no malas a nanao a tao a amlivolivon do karawan. O da patwawen a ciring am da alalasan si Yeso Kizisto a nimalikey do karawan. Sira rana ori am mangalalas so tao a omalalas ji Kizisto.

⁸ Makapzat kamo an. Ta ori o iyan no kakownongan no vazay namen jinyo. So ikanoyong nyo a makahap so nakem na jinyo ni Ama ta do to no makwa.

⁹ O ji ngahap so nanao ni Kizisto a mapasala jya tao am abo do onowned na si Ama ta do to. O mahap so nanao na ni Ama ta do to a tao am manoyong sira akma ney anak ni Ama ta do to a macikaop ji Yeso Kizisto.

¹⁰ No amyan so tao a omnanao jinyo a katarek no ipangnanao na am ji nyo amya mangay do vahay nyo. Ji nyo nirsirnga.

¹¹ No amyan so tao a meyminaminasi nya am akma ney to macyanoyngi o malas a vazay na.

Manowji rana ciring na

¹² Yaro pa o ciring a yako ipanci jinyo am ko ji to nosnosan a yavatvatkan, ta ko naknakmen o kato ko na macimatan jinyo a pacisirsirngan. No si makaranes ko jinyo do dang am jyabo kaji ta narayan a makacita so kadwan jyaten a.

¹³ O ananak da no akma nyoy kakteh do cinai am da ipeyminaminasi inyo.