2 Pite 3 - Seysyo No Tao

Ji macyahai o keypirwa na mai ni Yeso

¹ Manga kakteh, oya rana am ikadwa na ya no teygami ko jinyo. Yameynanod yadwa ka teygami a yana adketan no ciring a yako ipaziman jinyo, a yako ivavaga jinyo a peyparakwen so nakenakem.

² Inaoy si mamimin nyo peyyanen do onowned nyo o mina ciring da no panoyonoywan na so ciring ni Ama ta do to a kano mina ciring na ni Yeso a Panirsirngen ta a mapatazadang jyaten do teyngato a ninanao da jinyo no nipamnekan na a omlivolivon no ciriciring na.

³ O ney makdeng na am manakem nyo o keyyan no to mangozangozay do onowned da tao a meykeykaming ninyo do pangavosan no karawan.

⁴ No maniring sira am, “Wanjin na kai ni Kizisto a manci no kai na asyo. Sira rana nimeykawakwakwak a ineynapo ta am wanjin o na kablis no nyamaog na karawan.”

⁵ To da nazibwan o kanimamaog na ni Ama ta do to so hanit a kano karawan no ciring na. O tana eya am nimeytotwaw apo do ranom a kapeypinpin na rana sya.

⁶ Nipangamaog na ni Ama ta do to o ranom so karawan. Nibalinas na no ranom o karawan.

⁷ Am sicyaikwaya am yajyablis o hanit a kano teyrahem, do yana kahad sya no ciring na ni Ama ta do to, mangay do itemtem na so hanit a kano karawan a kano ji manganoyong a tao, no marateng rana o araraw no ipeykapyapinpin na so tao ni Ama ta do to.

⁸ Am ji nyo a hamangi o meykasa vazay, manga kakteh an. Tana kasaraw a tana makazivo awawan am meyyangay ori ji Ama ta do to.

⁹ O nakenakem ni Ama ta do to a kano tao am ji meyyangay. Ta si Ama ta do to am ji mapainin do mina ciring na. Ta tana inyo am akman sang a na jyahaywan a pananalahen a yamamlis. Ta ji na mamyapyan o asa ka tao do karawan a mangay do kararatan. Ta ikakza na o kamimin no tao a mamlis a komaro do raraten da.

¹⁰ Am o araraw no yai na no Panirsirngen ta am jyaziman a akmey manakaw a tao. No si marateng o araraw ori am meykaing a matemtem do kakavos no karawan a kabo na rana no sinokob no hanit a kano teyrahem a matemtem no rako a lila no apoy. So ikabo na rana no masaod no karawan.

¹¹ No si manoyong o kakman na sang a mabalinas no makakaday am makongo kamo so wanjin a tao. Am ori an, kakzan nyo no ji meylimoteng so onowned a tao a omraralay ni Ama ta do to,

¹² a omapananala so araraw ni Ama ta do to a ji meyyahahay a makaranes. No si marateng o araraw ori am matemtem o masaod no hanit. So ikabo na rana no masaod no hanit a omonag no lila no apoy.

¹³ Am yaten rana am yata pananalahen o nipanci na ni Ama ta do to a vayo a hanit a kano teyrahem. O ji meyraraten o amyan do dang.

¹⁴ Am ori an manga kakteh an, no kamo manoyong a yamapananala so araraw ori am makowyowyat kamo pa mapeyvazay so apya vazay a abo so karatan a macikaop ji Ama ta do to.

¹⁵ Naknakmen nyo o kaji na angsahan jinyo a pananalahen ni Ama ta do to. Ta ori o avyayan na jinyo, akman so mina ciring ni Pawlo a akma tey kakteh do cinai do teygami na a mangozay do teneng na ni Ama ta do to.

¹⁶ O akman rana sang am yamamimin do teygami ni Pawlo. Am yaro dang yamasalit a ciring ni Pawlo a yada to peypalasa a yapazsin no yaji macipayok so nakem a tao. Akman so yatatasa ciring do Seysyo a yada patareken a yaononongan. Am o akman rana sang a tao am peydednan no peyoyaoyyan na ni Ama ta do to.

¹⁷ Am nyo na katenngan o yakman sang a ciring, manga kakteh. So azimanan nyo sya, ta kalittan kamo so onowned a peykowawen so nakem no yaji macipayok so nakem a tao.

¹⁸ Am meypahagnat kamo so nakem a makateneng ji Yeso Kizisto a Panirsirngen ta a mapatazadang jyaten do teyngato, a makateneng do karilawan na ninyo. Inaoy si mangay jya o azwazway sicyaikwaya kangay na do kaidan no karawan. Amin.