1 Tesalonicya 4 - Seysyo No Tao

Isaray na ni Ama ta do to a icicirawat

¹ Manga kakteh, nyo na nimahap jyamen o apiya icicirawat a isaray na ni Ama ta do to. Sicyaikwa rana ya am namen vavagan inyo no ngaran ni Yeso Kizisto a Panirsirngen ta. Ta ori o ikowyowyat nyo paha a mahap so apiya vazay.

² Ta nyo na katenngan o ninanao namen jinyo apo ji Yeso a Panirsirngen ta.

³ O nakenakem na ni Ama ta do to am kakzeben na o kazngang no onowned nyo. Ji na mamyapyan inyo a mangzakza so icyatatao nyo.

⁴ So ikamimin nyo a mahakay a makateneng do kabo no karatan nyo a mapasakay so kadwan nyo do vahay. Ji nyo to mangozai o onowned nyo. Ta ozain nyo si Ama ta do to an.

⁵ So ji nyo mapasagpyani so kataotao nyo an. Ji kamo macyangangay do yato nazibo ni Ama ta do to.

⁶ O akman rana sya vazay am taosya o kapasala nyo do akma nyoy kakteh do cinai an. Ta mangay o kaoya na no meyvazay so marahet a vazay ni Ama ta do to. Ori rana am nipaziman namen rana jinyo.

⁷ O na nipamnekan jyaten ni Ama ta do to am beken a mangay ta pasagpyanen o kataotao ta, ta kakzeben na yaten a ji meylimoteng so onowned.

⁸ O ji ngahap so akman sang a nanao am beken a tao o na pasobnan, ta o Seyzi a nitoro na jyaten ni Ama ta do to am ori o pasobnan na.

⁹ O pasicyakarilawan nyo am tana ji namen mancyan do teygami am cyaha, ta amyan rana o nanao na ni Ama ta do to jinyo do kapasicyakarilawan nyo.

¹⁰ Ko katenngan inyo a sinjya do Tesalonicya a yamarilaw no akma nyoy kakteh do cinai do Maciton. Am o namen pa ciring jinyo am makowyowyat kamo pa mahap so yapiya vazay ori an.

¹¹ Makapya kamo so onowned do kadwan jinyo an. Ji kamo manamwad an, ta makowyat kamo a amyaw no velek nyo an. Inarahen nyo o ninanao namen pa jinyo no kakwa an.

¹² So ji nyo meyhanhani no icyatatao nyo a mapatodeh jinyo. So ikanoyong nyo a ikanig da no ji manaralay a tao.

Mai pa si Yeso

¹³ Manga kakteh, o nimawakwak rana tao am inaoy no si katenngan nyo o peypeypangayan na a kaji nyo na zababan so onowned. Ji nyo nginarai o yaji manaralay a tao a yaji makateneng do peypeypangayan na.

¹⁴ Ta yata anoyngan si Yeso a nimawakwak a kapirwa na mavyay. Akman sang, ta yata anoyngan si Ama ta do to a mapeyvangon so omanoyong jya a nimawakwak a tao. No mirwa pa si Yeso a mai am macihza sira mai.

¹⁵ Sicyaikwa rana ya am namen pangozayan o nanao na ni Yeso a Panirsirngen ta a manci nya jinyo. Yaten rana ya mavyay pa tao do ipeypanam na pa meygegcin ni Yeso am jyabo kapanmanma ta a kano nimawakwak a tao a mangay omrapong si Yeso a.

¹⁶ Ta no si marateng rana o araraw no nang am meygegcin si Yeso a tomawag jyaten a keyyan no panirsirngen no tinsi a manci nyaten. No mamizing ta o zapa do teyngato a ipatao na jyaten ni Ama ta do to am o niomanoyong ji Kizisto a nimawakwak rana tao am manomanoma sira mirwa a mavyay.

¹⁷ Am yaten rana yamavyay pa am pehzahen na yaten jira a katkaten do cinalab a kapakacita ta na si Yeso do hanit. So ikanoyong ta a macitovong ji Yeso a mangay do kaidan no karawan.

¹⁸ Ahapen nyo o ciriciring eya a ipait nyo so onowned no kadwan jinyo a ipasaray nyo sira.