1 Kedinto 15 - Seysyo No Tao

Mirwa a mavyay si Kizisto apo do heseb na

¹ Manga kakteh, manakem nyo o ninanao ko jinyo no kakwa a Mapasaray a Ciriciring na ni Ama ta do to. Ori rana am nyahap nyo na yamanoyong a yanyo pangozayan.

² O Mapasaray a Ciriciring na ni Ama ta do to o nipakahap nyo so to meyyonong a ikavyay no pahad nyo. So pangozayan nyo jya an, ta no si ji nyo mangozay am abo o peypeypangayan na no kanoyong nyo ji Yeso Kizisto.

³ Ninanao ko na jinyo o yaney makdeng na nimahap ko ji Yeso. Ori rana am nimawakwak si Yeso no raraten ta. So na idket do Seysyo no ciring eya.

⁴ Nipakakasa da si Yeso. Ikatlo na araw am mirwa a mavyay. So na idket pa do Seysyo no akman sang a ciring.

⁵ Nimapacita si Yeso ji Pite a kangay na rana mapacita do karwan da no nipamnekan na amlivolivon no ciriciring na.

⁶ Meyratateng am mangay mapacita do nimacihza pa jya kakaliman na poo (500) a tao. Sira rana ori am amyan pa jira ang so yamavyay. Yamyan rana jira so nimawakwak.

⁷ Meyratateng am mapacita pa ji Yake a kangay na pa mapacita do nipamnekan na amlivolivon no ciriciring na tao.

⁸ Ney manowji na am mapacita jyaken. So yako ipacipanownowji a niomanoyong ji Yeso.

⁹ Ta ney marahet ko na jira nipamnekan na ni Yeso a amlivolivon no ciriciring na. So ikanoyong ko a ji na abneka ni Yeso a lamlamsoy na, ta niraherahet ko o kyokay na ni Ama ta do to.

¹⁰ Am o pangangarilawan na ni Ama ta do to o ko ikakman sya. Yamanoyong o pangangarilawan na ni Ama ta do to a nitoro na jyaken. Am ori o ko ikaharahara pa a yameyvazay a kano karwan namen a nipamnekan na ni Yeso. Am beken a kowyowyat ko a meyvazay, ta si Ama ta do to am ori o yamacipeyvazay jyaken.

¹¹ Am ori an, tana yaken a tana karwan namen a nipamnekan na ni Yeso am namen mamimin a yameylimwang nya. So nyo icyakman sang a yaomanoyong jya.

Ipirwa ta mavyay a yaomraralay ni Yeso Kizisto a tao

¹² No yamanoyong namen kapeylimwang ni Kizisto a nimirwa a mavyay am ikongo na iyan jinyo no tao a yamanci no kaji mirwan a mavyay no nimawakwak rana tao.

¹³ No ji mirwa a mavyay o tao am ji nimirwa a mavyay saon si Kizisto am.

¹⁴ No jya nimirwa a mavyay si Kizisto am jyabo angangayan no kapeylimwang namen nya. Jyabo peypeypangayan no kanoyong nyo ji Yeso a.

¹⁵ No si akman sang am manoyong o kapangamaog namen ni Ama ta do to so malas a ciring. Ta no namen maniring am na nivyay ni Ama ta do to si Kizisto. No manoyong o kabo no tao a mirwa a mavyay am manoyong o kaji na nimapeyvangonan si Kizisto ni Ama ta do to.

¹⁶ Ta no ji mirwa a mavyay o tao am jyabo kanimirwa na mavyay ni Kizisto a.

¹⁷ No ji nimirwa a mavyay si Kizisto am abo o peypeypangayan no kanoyong nyo jya. So ikanoyong nyo amyan pa do peyraratenan nyo.

¹⁸ No si manoyong o akman sang am to makasi sira o nimawakwak rana amraralay ni Yeso.

¹⁹ No si ipeyhanhan ta si Kizisto a somidong jyaten sicyaikwaya a kaji ta makatenngan do kanoyong na mapeyvangon jyaten a ahapen do teyngato no makwa am to tamo makasi a tao do karawan.

²⁰ Am yajyakman sang an. Ta yamanoyong si Kizisto a yanimirwa a mavyay. Ori rana am yongkad no kanoyong da mirwa a mavyay no yarana nimawakwak a yamraralay nya a tao.

²¹ Si Adam o yapwan no kawakwak no tao. Akman sang, ta si Yeso Kizisto o yapwan no keypirwa a mavyay no tao.

²² Akman sang an. Ta o da ikawakwak no tao am sira pa macirapa so inawan ji Adam. O ipeyvangon da no amraralay ni Yeso a tao am macikownongan rana sira ji Kizisto.

²³ Am matwatonton o tao a mirwa a mavyay. Ney manma am si Kizisto. O tomonton am amraralay nya tao, no si marateng o araraw no yai na ni Kizisto,

²⁴ a kapakaranes na rana no pangavosan no karawan. No si marateng o araraw no nang am balinasen na ni Kizisto o oyowyat no jyacita a kalamsoyan na ni Satan a kavosoyan na ni Ama ta do to a katoro na rana ni Yeso no karawan ji Ama ta do to a italamozong na.

²⁵ Tana abo pa o akman sang a vazay am jyablis si Yeso Kizisto a Panirsirngen do yanam na pa ni Ama ta do to ambalinas so kavosoyan na.

²⁶ O ney manowji na balinasen ni Ama ta do to am kawakwakan no tao. So ikabo rana no mawakwak a tao.

²⁷ Ta maniring do Seysyo am, “Nipamnekan na ni Ama ta do to a meymatmatngeh no karawan.” O karawan a na malavat do jya am ji macyangay dang si Ama ta do to. Ta iya o nitomoro nya ji Kizisto so oyowyat na a tomalamozong no karawan.

²⁸ Am no si marateng rana o araraw no ikakata na ni Kizisto am miminen na o karawan a italamozong. Am ji na meysopoi o oyowyat na ni Ama ta do to. So ikanoyong na rana mazway a meymatmatngeh no karawan ni Ama ta do to.

²⁹ No ji mirwa a mavyay o tao am ikongo peypeypangayan no icicirawat nyo a tomaktak do mavyay a tao a izagom nyo so nimawakwak a tao.

³⁰ Ikongo namen to nomoki sya no kalalavitan no inawan namen.

³¹ Manga kakteh, ko mangday so araraw a yatoda jyangangay so inawan. Yamanoyong ori o ciring ko jinyo an. Ta yako tey saray nyo kapacikaop rana ji Yeso Kizisto a Panirsirngen ta.

³² Akman so mina alalaw ko do Ivoso. Ta mina akma koy to maciliman do masozi a kokoman so tao do peyrehrehtan da jyaken no tao. No ji mirwa a mavyay o nimawakwak a tao am tana to tamo rana mamaring so kanen do araraw am ibnek so kaji ta limanan do kadadayan na so araraw.

³³ Ji kamo todakakey a kalittan. No macikagagan ka do somagpyan a tao am mangay kapasagpyan na jimo so icicirawat.

³⁴ Paolin nyo o nakenakem nyo do kapyapyan. Paseykeden nyo na o kapeyraraten nyo. Yatatasa jinyo a yana ji makateneng ji Ama ta do to. O ko peycirngan sya am kapakateneng nyo do kanigan nyo.

Kataotao ta na do teyngato no makwa

³⁵ No maniring o tao am, “Sino ipanci o kato mirwan a mavyay no tao. Akman so wanjin o kamamagenan da nira ang.”

³⁶ Oyod nyo a kasagpyan a tao. No jyawakwak o nipamowa mo a vettow no kayo am jyabo kalida na.

³⁷ Abo mapamowa so meyvoovoong rana mowamowa, ta o vettow na o pamowahen, akman so avyas no kadai.

³⁸ Na to mangozai ni Ama ta do to o nakenakem na do na mamaogan so vettow. Akman sang an. Ta to macilolo o mahap mo do nipamowa mo a vettow.

³⁹ Yakman sang o kataotao no nyamamaog na ni Ama ta do to, ta yameykataretarek. O tao am tao so kamamagenan. Omalalam am omalalam so kamamagenan. Meyyasasalap am meyyasasalap so kamamagenan. Among am among so kamamagenan.

⁴⁰ Yakman sang o masaod no hanit. Ta o kapyapya no masaod no hanit am yaji meyyangay a kano masaod no teyrahem so kapyapya.

⁴¹ Araw am yamyan so na ipaniniray. O vehan am yamyan so na ipaniniray. Akman sang o mata no hanit a matarek so ipaniniray. So da ipeykataretarek no kazngazngang no mata no hanit.

⁴² Akman so sang, ta meytarek o kataotao ta do teyngato a kado teyrahem. Ta no si mirwa ta mavyay am vayo rana o kataotao ta a ji rana wakwak.

⁴³ O nibobo rana tao am abo o oyowyat na. Am no mirwa ta mavyay am tey mazway ta na.

⁴⁴ O kataotao ta am ori o ibobo. Am o mirwa a mavyay a kataotao am vayo rana ori a mavyay do teyngato. No manoyong keyyan no kataotao ta do karawan am manoyong keyyan no kataotao ta do teyngato.

⁴⁵ Ta maniring do Seysyo am, “Si Adam am tao kamamaogan na.” Am o ipanci a manowji a Adam am si Kizisto a manta nyaten so to meyyonong a ikavyay no pahad ta.

⁴⁶ Manmanma o kataotao ta do karawan a keyyan na rana no monganay do teyngato a kataotao ta.

⁴⁷ O ney manma na tao a si Adam am nyamaog na ni Ama ta do to no tana. O manowji a Adam am si Kizisto. Iya rana am nimapo do teyngato.

⁴⁸ O tao do teyrahem am akman sira si Adam so kataotao a nimapo do tana. O tao do teyngato am akman sira si Yeso so kataotao.

⁴⁹ So na iyan rana jyaten no kataotao ta do karawan. Am no makwa am amyan rana so kamamagen ta a kataotao ta do teyngato akman so kataotao na ni Yeso.

⁵⁰ Manga kakteh, o ko ipanci am o kataotao ta sicyaikwaya am ji macikaop do italamozong na ni Ama ta do to no makwa, ta mawakwak o kataotao ta do teyrahem eya.

⁵¹ Amizngen nyo o mapeyzokab a nanao a jya nipatwaw pa no kakwa a nipanci na jyaken ni Ama ta do to. Beken a to ta mimin a mawakwak. Am mamimin ta mablis so kataotao.

⁵² Am makeykai ori, akmey peyrektan no mata. No si mamizing no tao o ney manowji rana ipatao jyaten a zapa am makaranes rana o akman sang a vazay a kapeyoli da mavyay no mawakwak a tao a kaji da rana wakwakan. So icyakman ta sang a mablis so kataotao.

⁵³ Ta o kataotao ta na do karawan am mablis rana a kaji na rana wakwakan.

⁵⁴ No mateyka rana ori am ori o ipangononong na rana no ciring do Seysyo. Ta maniring am, “Na rana nibalinas o kawakwak no tao. So ikabo na rana no tao a mawakwak.”

⁵⁵ “So ikabo rana no kanyaheyan ta no kawakwak ta. So ikabo rana no mazabab so onowned a tao.”

⁵⁶ O kanyaheyan da no kawakwak da no tao am ikanyahey da o kaoya na nira ni Ama ta do to do kapeyraraten da. O ipeyraraten da am ji da ngapa o iwawalam na ni Ama ta do to.

⁵⁷ Am ta isaray ji Ama ta do to. Ta si Yeso Kizisto a Panirsirngen ta o yarana nimapakavos so vazay na. So ta na jyanyahei a mawakwak, ta yana rana niovayan yaten do raraten ta.

⁵⁸ Am ori an, manga keypong an, makakdeng kamo so nakenakem ji Yeso Kizisto a Panirsirngen ta. Makowyat kamo a mapeyvazay so vazay na. Cyaha, ta nyo katenngan o kaji na liklikan so mapeyvazay so vazay na tao.