1 Kedinto 1 - Seysyo No Tao

^1-2 Yaken rana am si Pawlo ko a yana nipamnekan ni Yeso Kizisto a amlivolivon no ciriciring na a lamlamsoy na ni Ama ta do to. Yaken rana kano akma tey kakteh do cinai si Sotenay am namen ipeyteygami inyo a sinjya do Kedinto a kyokay. Inyo rana kano yamakakaday do peycyeylilyan na a macikaop ji Kizisto a tao am yatamo meyyangangay a na nipamnekan ni Ama ta do to a italamozong na. Si Kizisto am Panirsirngen da. So yata icyakman sang a yamapeypanirsirngen sya.

³ Inaoy no si itoro na ni Ama ta do to a kani Yeso Kizisto a Panirsirngen ta o pangangarilawan na kano ikapiya no onowned nyo.

Na isaray ni Pawlo o pangangarilawan na ni Ama ta do to

⁴ Ko masangib inyo a isaray ji Ama ta do to, ta na nitoro jinyo o pangangarilawan na, ta yakamo macikaop rana ji Yeso Kizisto.

⁵ Kanyo tey meynakem rana a macikaop ji Yeso Kizisto a tao. Ori o nyo kateteneng a meylimwang no ciriciring na ni Kizisto, do nyo kapakateneng do manoyong a nanao na.

⁶ O ciring na rana ni Kizisto a nipeylimwang ko jinyo am yamanoyong a yana amyan do onowned nyo.

⁷ So yana ikabo no yana jya nitoro jinyo no Seyzi a oyowyat a kano teneteneng nyo, do nyo kapanala si Yeso Kizisto a Panirsirngen ta a mai.

⁸ Jyabo kaji na ngoyatan jinyo ni Yeso a. So ikanoyong nyo na abo rana so karatan do tangain na, no si mai si Yeso Kizisto a Panirsirngen ta.

⁹ Abo kalalasan na ni Ama ta do to a nimamnek jinyo a meyhanhan nya. So ikanoyong nyo rana macikaop do Anak na si Yeso Kizisto a Panirsirngen ta.

Nikasyasyayan da no kyokay

¹⁰ Manga kakteh, ko vavagan inyo no ngaran ni Yeso Kizisto a Panirsirngen ta akmey asa so ciriciring a ji meykataretarek so nakenakem a malwalovot, akmey asa so onowned, akmey asa so pangozayan.

¹¹ Ta o kararay na ni Kelay a tao am sya jya nimanayotayo so ciring da jyaken. Maniring sira jyaken am yamyan kono jinyo do dang so nyo ipeykataretarek so nakenakem.

¹² O peypeypangayan no ciring ko am yamyan kono jinyo so yamanci no na kapacyanod jyaken. Yamyan kono so yamanci no na kapacyanod ji Apolo. Yamyan so yamanci no na kapacyanod ji Pite. Yamyan so yamanci no na kapacyanod ji Kizisto.

¹³ So yanyo icyakmey amvonong so kataotao na ni Yeso Kizisto. Manngwa, yaken o nimawakwak ninyo do jyojika an? Manngwa, yada inyo nitaktakan no ngaran ko an?

¹⁴ Ko isaray ji Ama ta do to an. Ta si Kedisepo a kani Cyayo o nitaktakan ko. So na ikabo no ikararwa na nira ori a nitaktakan ko.

¹⁵ So ikabo na jinyo no manci no kanitomaktak ko jinyo no ngaran ko.

¹⁶ Si Setiva rana asa ka vahay o ko nikahamangan a nitaktakan. So ko na ji makatenngi do na keyyan pa no nitaktakan ko jinyo do dang.

¹⁷ Ta o nipamnekan na jyaken ni Kizisto am beken a manaktak. Ta kapeylimwang ko no Mapasaray a Ciriciring na ni Ama ta do to. So ji ko mangozai do teneteneng ko a mangononong. Ta si akman sang am o teneteneng ko a mangononong o ikakza da ahapen no tao, a kaji da na ngapan so oyowyat no mina kawakwak na ni Kizisto do jyojika.

Si Yeso Kizisto o oyowyat na kano teneteneng na ni Ama ta do to

¹⁸ O ipeylimwang a jyojika ni Yeso Kizisto am abo o peypeypangayan na do ji manganoyong a tao. Am yaten a na patazadangen do teyngato ni Ama ta do to am tey rako ori a oyowyat na ni Ama ta do to.

¹⁹ Ta maniring do Seysyo am, “Balinasen ko o teneteneng da no ji raralay nyaken a tao kaji na mangononongan no ahapan da so vazay da.”

²⁰ No akman sang am wanjin o teneteneng da no mateneng a tao. Wanjin o teneng da no aro so nivilangan a tao. Wanjin sira o makey a macinekanekad a tao do karawan. So na nipeyolyan sya ni Ama ta do to so teneteneng no tao do karawan abo so angangayan.

²¹ Tey makdeng o teneteneng na ni Ama ta do to. So ikabo no tao do karawan a mangozay do teneteneng da makateneng ji Ama ta do to. Am kanimamnek na ni Ama ta do to do yada ipanci abo so peypeypangayan a yanamen ipeylimwang a yana ivyay so omanoyong jya tao.

²² Kakdain da no tao do Yotay o kapakacita da so mapeyzokab a vazay. Ta ori o yanoyong da ji Ama ta do to. Kakdain da no tao do Sila o kateneng da. Ta ipeyhanhan da o teneteneng no tao do karawan.

²³ Am yanamen ipeylimwang si Kizisto a nipadket da do jyojika. O akman rana sang do tao do Yotay am ipacimanig da. Am no citahen da o akman sang no beken a tao do Yotay am abwata o ayyaingan na.

²⁴ Am do tao do Yotay a kano beken a tao do Yotay a nipamnekan na ni Ama ta do to a omanoyong ji Kizisto am katenngan da si Kizisto a yanan no rako a oyowyat na ni Ama ta do to a kano teneteneng na ni Ama ta do to.

²⁵ Ta o todalapit a teneng ni Ama ta do to am maharahara pa kano teneteneng no tao. O alikey a oyowyat ni Ama ta do to am rakorako pa kano rako a oyowyat no tao.

²⁶ Manga kakteh, naknakmen nyo an. Ta akman kamo so wanjin a tao no kapamnek na jinyo ni Ama ta do to. No ahapen ta do tao am apereh jinyo o mateteneng a kano meynakem a tao.

²⁷ Am nipamnekan na ni Ama ta do to o ipangoyongoyod da a jyateteneng a tao do karawan, mangay na ipeyleylak so mapahama so nakem a tao do karawan.

²⁸ Na nipamnekan o ji da pavivilanga a tao do karawan a kano ikaoya da kano ipanci da abwata so pacicingayan a ipaveveh na so ipanci da meynakem a tao do karawan.

²⁹ Ta ori o ikabo no tao a mapazway do tangain na ni Ama ta do to.

³⁰ Am si Ama ta do to o yanimapanop jinyo ji Yeso Kizisto. So na ikanoyong a na yapwan no teneng ta. Iya o na niyapwan no yamvonas so raraten ta. Am ori o na abnekan jyaten ni Ama ta do to a abo so raraten do tangain na. So icyakma tey matnaw a ranom so onowned a macilovot ji Ama ta do to a ji na rana nalamozongan no raraten.

³¹ Akman so ciring do Seysyo. Maniring am, “O mapazway a tao am apyapya pa si Yeso o azwain na.”