لوقا 4 - Sindhi Bible (India)

येशुअ जी आज़माइश

¹ पो येशु पवित्र आत्मा सां भरजी यरदन नदीअ तां मोटियो; ऐं आत्मा जी अग॒वाईअ सां चालीअ डी॒ंहन ताईं बयाबानअ में फिरंदो रयो।

² उते चालीअन डी॒ंहन ताईं शैतान येशुअ जी आज़माइश कंदो रयो। उनन डी॒ंहन में हुन कुछ बी न खादो ऐं जड॒ऐं चालीअ डीं॒हं पूरा थ्या, त संदस खे डा॒ढी भुखअ लगी॒।

³ तड॒ऐं शैतानअ हुन खे चयईं, “जेकड॒ऐं तूं परमेश्वरअ जो पुट आईं, त इन पथरअ खे चओ, के हे रोटी ठई वञे।”

⁴ परअ येशुअ शैतानअ खे जवाब डि॒नईंस, “पवित्रशास्त्र में इयो लिख्यल आहे, ‘के मांणू खाली रोटीअ सां हीं जीअरो न रवंदो आहे’।”

⁵ उन खां पो, शैतान येशुअ खे मथे हिकअ पहाड़अ ते वठी वयो ऐं हिकअ ही पलअ में जग॒तअ जा सब राज॒अ डे॒खारियईंस।

⁶ शैतानअ हुन खे चयईंस, “मां तोखे इनन सबनिन जे मथां अधिकार ऐं इनन जी सजी॒ शानो-शोकत डी॒ंदुम, छोके इयो सब मुखे सौंप्यो वयो आहे ऐं जेंखे चाहींदो आयां, उन खे ही डी॒ंदो आयां।

⁷ सो जेकड॒ऐं तूं मुंजे अग॒यां सीस नवाईं ऐं मुंजी आराधना करीं, त इयो सब मां तोखे ड॒ई छडी॒ंदुम।”

⁸ येशुअ उन खे चयईं, “पवित्रशास्त्र में इयो लिख्यल आहे, ‘तूं रुगो॒ पांजे प्रभु परमेश्वरअ जे अग॒यां सीस नवाए ऐं आराधना कर; ऐं हुन जी ही सेवा कर’।”

⁹ कुछ डी॒ंहन खां पो, शैतान येशुअ खे यरूशलेम शहेरअ में वठी वयो ऐं मंदरअ जी चोटीअ ते बियारे हुन खे चयईंस, “अगर तूं परमेश्वरअ जो पुट आईं, त हितां टिपो डे॒।

¹⁰ छोके पवित्रशास्त्र में लिख्यल आहे, ‘परमेश्वर पांजे स्वर्ग॒दूतन खे तुंजे लाए आज्ञा डीं॒दो, के उहे तुंजी हिफाज़तअ कन’।

¹¹ उहे त तोखे पांजे हथन सां पकड़े करे संभाले वठंदा, किथे इंय नथे, के तुंजे पेरन में पथरअ सां धक लगे॒। ”

¹² येशुअ उन खे जवाब डि॒नईंस, “पवित्रशास्त्र में इयो बी लिख्यल आहे, ‘तूं पांजे प्रभु परमेश्वरअ जी परीक्षा न वठजैं’।”

¹³ पो जड॒ऐं शैतान येशुअ खे हर तरीके सां आज़माए चुको, तड॒ऐं उहो कुछ वक़्तअ जे लाए संदस वटां हली वयो।

येशुअ जे सेवकाईअ जी शुरूआत

¹⁴ येशु आत्मा जी सामर्थअ सां भरजी करे वरी गलील क्षेत्र में आयो ऐं हुन जी खबरअ आसे-पासे जे सबनिन इलाकन में फैल जी वई।

¹⁵ उहो उनन जे प्रार्थना-घरन में वञी सिख्या डी॒ंदो रयो ऐं उन जी वजह सां सब संदस जी साराह कंदा हुवा।

नासरतअ में येशुअ जो निरादर

¹⁶ उन खां पो येशु पांजे नासरत नगरअ में आयो, जिते संदस जो पालण-पोषन थ्यो हुयो; उहो पांजी आदतअ जे मुजुब सबधअ जे डीं॒हं ते प्रार्थना-घरअ में वयो। उते उहो पवित्रशास्त्र मां वचन पढ़ण जे लाए उथी बीठो।

¹⁷ यशायाह भविष्यवक्‍ता जी किताब येशुअ खे डि॒नी वई ऐं हुन किताब खोले करे उहा जग॒ऐ कढयईं, जिते इंय लिख्यल आहे,

¹⁸ “प्रभुअ जी आत्मा मुंजे मथां आहे, छोके ग़रीबन खे ख़ुशख़बरी बु॒धाएण जे लाए हुन मुंजो अभिषेक कयो आहे ऐं मुखे इन करे मोकल्यो वयो आहे, के जेके कैदअ में आइन उनन खे रिहाई ऐं जेके अंधा आइन उनन खे दृष्‍टि पाइण जो समाचार डि॒यां ऐं जेके सतायलअ आइन उनन खे छडा॒यां,

¹⁹ ऐं एलान कयां के इयो उहो साल आहे, के जेमें प्रभु पांजन मांणुन जे मथां अनुग्रह कंदो।”

²⁰ उन खां पो येशुअ किताबअ खे बंद करे सेवकअ जे हथअ में डि॒नईं ऐं पाण वई रयो; ऐं प्रार्थना-घरअ जा सब मांणू हुन खे चिताए डि॒सण लगा॒।

²¹ येशुअ उनन खे इंय चवण लगो॒, “अज॒ ही पवित्रशास्त्र जो इयो लेख तवां जे सामूं पूरो थ्यो आहे।”

²² इन ते सब येशुअ जी तारीफअ करण लगा॒ ऐं संदस जे मुंहं मां जेके अनुग्रह जूं गा॒ल्यूं निकत्यूं पे, उन ते उहे ताजुब करे चवण लगा॒, “छा इयो यूसुफअ जो पुट कोने?”

²³ येशुअ उनन खे चयईं, “तवां ज़रूर इया कहावतअ मुखे चवंदव ‘हे डोक्टरअ, पहेरयों पांजे पाण खे त ठीक करे डे॒खार ऐं तवां मुखे इयो बी चवंदव जेके कमअ तूं कफरनहुम में कया आइन उहे कमअ तूं हिते पांजे नगरअ में बी करे डे॒खार’।”

²⁴ येशुअ उनन खे चयईं, “मां तवां खे सच तो चवां, के कोई बी भविष्यवक्‍ता पांजे नगरअ में स्वीकारयो न वेंदो आहे।

²⁵ मां तवां खे सच तो चवां, के एलिय्याह भविष्यवक्‍ता जे डी॒ंहन में जड॒ऐं साढे टिन सालन ताईं बरसात न पई हुई ऐं सजे॒ मुल्कअ में डा॒ढो वडो॒ डु॒कड़ पेजी वयो हो, उन वक़्त इज़राएल में डा॒ढियूं विधवाऊं हुयूं,

²⁶ परअ एलिय्याह भविष्यवक्‍ता सैदा इलाके जे सारफत नगरअ में हिकअ विधवा खे छडे॒ बि॒यों कें वट बी न मोकल्यो वयो,

²⁷ ऐं एलीशा भविष्यवक्‍ता जे समय में इज़राएल में डा॒ढा कोढ़ी हुवा, परअ सीरिया वासी नामानअ खे छडे॒ बि॒यो कोई बी कोढ़अ मां शुद्ध न कयो वयो।”

²⁸ इहे गा॒ल्यूं बु॒धंदे ही प्रार्थना-घरअ सब मांणू गुस्से सां भरजी वया।

²⁹ सो उहे सबही उथी खड़ा थ्या ऐं येशुअ खे नगरअ खां बा॒हिर कढी करे उन पहाड़ीअ जी चोटीअ ते वठी वया जिते उनन जो नगर वस्यल हुयो, ताकि उहे हुन खे उतां हेठ किराए छडि॒न।

³⁰ परअ उहो उनन जे विचअ मां निकरी करे उतां हली वयो।

दुष्‍टआत्मा जे वसअ मां मांणूअ खे आज़ाद करण

³¹ येशु गलील क्षेत्र जे कफरनहुम नगरअ में वयो; ऐं सबधअ जे डी॒ंहं ते मांणुन खे सिख्या प्यो डे॒।

³² येशुअ जी सिख्या ते मांणुन खे डा॒ढो ताजुब थ्यो, छोके संदस जे सेखारण में अधिकार शामिल हुयो।

³³ उते प्रार्थना-घरअ में हिक मांणू हुयो जेंजे अंदर दुष्‍टआत्मा हुई। उहो जोर सां रड़ियूं करे चवण लगो॒,

³⁴ “हे येशु नासरी, असां सां तुंजो छा वास्तो? छा असां खे तूं नाश करण आयो आईं? मुखे खबरअ आहे के तूं केर आईं? तूं परमेश्वरअ जो पवित्र ज॒ण आईं!”

³⁵ येशुअ दुष्‍टआत्मा खे दड़को ड॒ई चयईंस, “चुप कर ऐं इन मां निकरी वञ।” तड॒ऐं दुष्‍टआत्मा उन मांणूअ खे सबनिन जे सामूं पटअ ते किराए ऐं बिना नुकसान पहुचाए उन मां निकरी वई।

³⁶ इयो डि॒सी सब ज॒णा ताजुब करे हिकअ बे॒ खे चवण लगा॒, “इया केड़ी सिख्या आहे? हे त अधिकार ऐं सामर्थअ सां गड॒ दुष्‍टआत्माउन खे बी हुकुम तो डे॒ ऐं उहे मांणुन मां निकरी त्यूं वञन।”

³⁷ उन खां पो आसे-पासे जे सबनिन इलाकन में मांणू येशुअ जे बारे में चर्चा करण लगा॒।

शमौन पतरसअ जी सस खे ऐं डा॒ढन मांणुन खे ठीक करण

³⁸ येशु प्रार्थना-घरअ मां निकरी शमौन पतरसअ जे घर वयो। उते उन जी सस खे डा॒ढो बुखार हुयो इन ते मांणुन उन जे लाए येशुअ खां विनती कई।

³⁹ येशुअ उन जे अग॒यां वञी करे बुखारअ खे दड़को डि॒नईं, इन ते उन जो बुखार लई वयो ऐं उहा उथी करे हुनन जी सेवा करण लगी॒।

⁴⁰ सिज लवण मेलअ, मांणू उनन खे जेंजे अंदर अलग-अलग तरीके जूं बीमारियूं हुयूं, येशुअ डे॒ वठी आया ऐं हुन हिकअ-हिकअ जे मथां पांजो हथ रखी उनन खे ठीक कयईं,

⁴¹ ऐं डा॒ढन हीं मांणुन मां दुष्‍टआत्माऊं इंय रड़ियूं कंदे निकत्यूं, “के तूं परमेश्वरअ जो पुट आईं।” परअ येशुअ उनन खे दड़को डि॒नईं ऐं उनन खे गा॒लाएण न डि॒नईं, छोके उहे हुन खे सुञारींदियूं हुयूं, के उहो मसीह आहे।

प्रार्थना घरन में प्रचार करण

⁴² सुबूअ जो सवेलअ ही येशु उतां निकरी करे हिकअ सुनसान जग॒ऐ ते हली वयो ऐं भीड़अ जी भीड़अ हुन खे गो॒लींदी संदस वट आई ऐं हुन खे रोकण लगी॒, के असां जे नगरअ मां न वञ।

⁴³ परअ येशुअ उनन खे चयईं, “मुखे बि॒यन नगरन में बी परमेश्वरअ जे राज॒अ जी ख़ुशख़बरी बु॒धाएण ज़रूरी आहे, छो त मां इनलाए ही मोकल्यो वयो आयां।”

⁴⁴ हू यहूदिया क्षेत्रन जे प्रार्थना-घरन में वञी प्रचार कंदो रयो।