Room 8 - Gooti Toolluro Yogalokwono

Nevu Gooti toolluro Kuullo toollu'aro aiyo imo'nodowado tovinokwono

¹ Krais Jisasol me'no abomollurolovonekumokalokwoka tovino tov aga'no'gwowi nevu kwollu me'no uuguro'mwonyodowado tonollu Gooti tool maironekumwallononogano.

² Su tov aro tovinokwono. Nevu Krais Jisasollu uuguro'mwonyodowado tonollu Gooti toolluro Kuullo tool gamoro jurogudo tokwe nemi aiyo me'no nekullabodowodekono. Aki ma'no ma'nodo tokwe bolnodo tokwe tovalluro dolago tomuuda'ai me'no abomollurolovonekumokalokwokanogano.

³ Kevu kuudo neya jaullulo. Gooti toolluro loowo tov nemi ma'no ma'nodo tonyu ku'nono mamonekudukwopiyonokwono. Su tov aro tovinokwono. Nevu loowo tovi uumjunyo'mo nekullunodowodo kuvi kuruv kwako akavida'ai kuudo tooro kuuno kuulanekwo'dowodo tovino tov jurogudo nonaguto imo'nodowadonogano. Toro kuvi kuruv Gooti toolno'gwowi nonekullo'mwojo'moneyokwe gavnokweyolluro Kwolaiyo toollu kwolomonekwopiyabokaikono. Toro kwolomonekwopiyaboka su tool a'mwo pwolbusuko sumo'nyajukekono. Nevu ma'no ma'nodokwe imo'nodowado kuvi kuruv su toolno'gwowi ma'no ma'no puru'monodo kuruv miyajukekono. Toro tool nemoro ma'no ma'nodo tovuro mubiyo tov amobiyanekudukwopiyokaikono. Toro mobiyanekudukwopino sumaiyokwe aki ma'no ma'nodo tovuro jurogudo tovi yiunokuudo amodukwopiyokaikono.

⁴ Ma'no ma'nodo tovuro jurogudo tovi amodukwopiyoka su tov nevu sugudo to'no mujumovla'mwalano'moneyokweyokwono. Nevnokwe tonol Gooti toolluro loowo tonyu ku'nono muumjunanonogano. Toro kuvi kuruv nevu kwako akavida'ai kuudo toorai muu'nyubusuko yowa'ji yiuno Gooti toolluro Kuullo tool mollubworonekumokavla'mdowo'jure tovi kuumjuna'ji to'gwowi sugudo to'no nokwo mujumovla'mwalanonogano. Nevu Gooti toolluro Kuullo toollu toro kuumjuna'ji tov loowo tovi uumjunyokwe tonolbusuko imo'nanonogano. Su toro tov neya imo'noneyokweyo'mo Gooti toolluro Kwolaiyo tool ma'no ma'nodo tovuro jurogudo tovi amonekudukwopiyokaikono.

⁵ Kevu kuudo neya jaullulo. A'mwo abolo pun kemi kwako akavida'ai kuudo kuuluuwo'dupudo toorai dolago tomuu mwalodupudo ton kevnokweravuro kwako akavida'ai kuudo tooraino to'no kirounomollodupudogano. Toro kuvi kuruv a'mwo abolo pun Gooti toolluro Kuullo toollu dolago tomuu mwalodupudo tono'gwowi gamoro mollubworomokavla'mdowo'jure tovi buumjungoulodapudogano.

⁶ Toro te kevu kwako akavida'ai kuudo toorai kuumjunpi tov bolnodo to'no yo'mgonomapinogaikikono. Toro kuvi kuruv kevu Gooti toolluro Kuullo toollu kuumjunpi to'gwowi aiyo yiunokuudo mujomwekovlaiyo'moneyokwe tovi maropi kemoro sumwoluko ton kavo wosungovla'mwalpinogaikikono.

⁷ Toro tovino tov a'mwo abolo pun kwako akavida'ai kuudo toorai kuumjunpi ton Gooti toolluro loowo tovi dolago tomuu mamwalopi ku'nono muumjunpinogano. Toro ton Gooti toolluro ikomago wimo'numwalpinogano.

⁸ Aki kwako akavida'ai kuudo toorai kuumjunpi su ton Gooti toollu ilaiyo puru'monodo kuruv ku'nono migolpinogano.

⁹ Toro kuvi kuruv kevno'gwowi kwako akavida'ai kuudo toorai dolago tomuu mamwalodupudogaikikono. Toro togaikul Gooti toolluro Kuullo kuulekumwalodowodo su toollu uumjungovla'mdupudogaikikono. Krais toolluro Kuullo su tool pugaikullu maulekumwalo'ji tov Krais toolluro kuunodo mwimo'nupinogaikikono.

¹⁰ Toro kuvi kuruv Krais tool kemoro poowokalago tovi me'no kuulekumwalodowodo togaikulluno tov kevu aiyokwe imo'nodupudogaikikono. Toro togaikul kemoro ma'no ma'nodokwe kulako ton abolpi kuvi kuruv Gooti toolluro sumdo tovi sugudo me'no wimo'nodupudo togaikulluno tov kemoro kuullo tobuurono'gwowi aiyo kuuno mujomwekovla'mwalpinogano.

¹¹ Gooti su tool Krais Jisasollu aiyo aiko te amodukavoka toolluro Kuullo tool kemi poowokalago tovi kuulekumwalodowodekono. Toro te lukomgu kemoro kulako abolpi tonyu Gooti tool aiyo aiko te nomodukawonekono. Gamoro Kuullo tool kemi poowokalago tonyu me'no kuulekumwalodowodo su toollu'aro kuvinono modukawonekono.

Nevu Gooti toolluro kwoloraiyo wimo'nodowado tonol gamoro Kuullo toollu neya uumjungovla'mwalano tovinokwono

¹² Nuugeyobuuravoo, nevu Gooti toolluro Kuullo tool me'no kuulonekumwalodowodo su toollu neya uumjunyo'moneyokwe tov nemi anekwoso. Toro tonolluno tov kwako akavida'ai kuudo toorai nuumjungovla'mwala'jo.

¹³ Kevu pugaikul kwako akavida'ai kuudo toorai'aro kuumjungovlapi tov nobolpinogaikikono. Toro kuvi kuruv Gooti toolluro Kuullo tool jurogudo ikubweyodowo'jure tokwe kemi kulako tovida'ai womdo mujeroungovla'mdupudo toorai suvlo neya julomavekurogaulo. Toro supi tov aiyo ilaiyo to'no mujomwekovla'mwalpinogaikikono.

¹⁴ Su tov aro tovinokwono. Yiuwi'nokai Gooti toolluro kwoloraiyo ton gamoro Kuullo toollu uumjunyo'moneyokweyogano.

¹⁵ Gooti tool kemino tov ki'nato womdokwe tonbusuko luko neya imwalpino'moneyokwe gamoro Kuullo su tool aikullabokalmaiyo. Toro kuvi kuruv Gooti toolluro Kuullo tool kemi mollumwoga ikullo'moneyokwe aikullabokaikono. Toro togaikul Gooti toolluro kwoloraiyo kuunodo me'no wimo'nodupudogaikikono. Toro te nevu Gooti toollu aro wuudodowadonogano. “Nemi Nellunumiyago Doweyoloo,” wuudodowadonogano.

¹⁶ Aki Gooti toolluro Kuullo su tooke'aro nemoro poowokalago tokwe'aro toval kuu'maiyo toru'no aro nekudodubulovakono. “Kevu Gooti toolluro kwoloraiyo kuunodogaikikono,” nekudodubulovakono.

¹⁷ Toro te Gooti tool gamoro kwoloraiyo tonyu sugudo go'no go'nodo pun wiyo'moneyokwe subuu'yamju me'no kwiyokaikono. Toro te sugudo su ton Krais tool ne kunolluda'aiyo'mo me'no amarokagano. Nevu Gooti toolluro kwoloraiyo wimo'nodowado tonol sugudo su ton kuvinono nomaranonogano. Aki Krais toolluro danyu'nyuwuulo subwosunoka to'busuko kubalno aga ne kunol kuruv danyu'nyuwuulo pworo ibwosunodowadonogano. Aki Gooti tool Krais toollu bako bwotonyo pwopiyodowodo toru amorumwalloka to'busuko kubalno ne kunollu kuruv Krais tooke avalo toru nomonekumwallononogano.

Gooti tool gamoro a'mwo abolo tonyu gamoro bako bwotonyo pwopiyodowodo toru kuulomorumwallono tovinokwono

¹⁸ Toro te nuu aro kuudo yau'dumdonyugono. Nemoro agasuro danyu'nyuwuulo ma'dowado su ton yiuno kula'nyekwojogano. Toro kuvi kuruv Gooti toolluro bako bwotonyo tovi kuulomwallo'moneyokwe nonekullabwono su to'gwowi aguto kuunodokwono. Su tov nemoro buro'nyo buro'nyo danyu'nyuwuulodeyo mujomo'melabodowado tonyu kuuwolo'mwallo.

¹⁹ Aki puga Gooti tool nemi kuu'maiyo toru'no nobomollolupto'nanekubweyonekono. Su toro toga yiuwi'nokai a'mwo abolo pun nekwonopi nemino aro kuudo yanekuupinogano. Oo su ton Gooti toolluro kwoloraiyo kuunodogano. Kuudo yanekuupinogano. Su toro nonekullumo'nono tovino nevu sogwollo kinodowadonogano. Aki Gooti toolluro yiuwi'nokai sokwollosoka kun kuruv kuvinono imo'nyo'moneyokwe tovino sogwollo kuuno kingelabodupudogano.

²⁰ Gooti toolluro sokwollosoka su ton muudu'nodo toga ilaiyo to'no sumo'nyajupo kuvi kuruv lukomgu kaiya'no sugolamo'nopogano. Noonyumwonyu sokwollosoka su ton kevnokwenyuro tovasuda'ai migolamo'mdupudogano. Toro kuvi kuruv ma'no ma'no pasudo sumo'noka tovida'ai Gooti gavnokwe tool gamoro sokwollosoka su tonyu kaiyako igollo'moneyokwe jul'nyogalo tovi dolago tomuu kuumwallokaikono. Toro kuumwalloka su tomuu kuule'na'dupu Gooti toolluro aro yono tovino sogwollo kingovla'mdupudogano.

²¹ Gooti toolluro sokwollosoka su ton jul'nyogalo tovi dolago tomuu kuule'na'dupudo tonyu Gooti gavnokwe tool nobomollurolovomokalokwonekono. Gavnokwe toolluro me'no ajesungiko toga abai'mowo'ji kuvinono bomollurolovomokalokwowo'ji sugumaluko imo'nosonogano. Su toro togada'ai aki aiko te bwiyo mabuuropipinogano. Aki Gooti tool gamoro kwoloraiyo tonollu abomollurolovonekumokalokwo'ji toga yiuno sugumaluko tomgu'aro to'no yomjomwekovla'mwalanonogano. Nemi anekullumo'no'ji su to'busuko kubalno Gooti toolluro sokwollosoka kunyu kuruv kwimo'no'ji toga sugumaluko to'no wopinogano.

²² Aki aro tovino kuudo youroma'dowadonogano. Gooti toolluro yiuwi'nokai sokwollosoka su ton jul'nyogalo tovi dolago tomuu mwalodupu kaiyako yomjomwekelabodupudogano. Su tov aro to'busukokwono. Abolo puruv kwolaiyo yomallo'mo guno mollowo'ji toga danyu'nyuwuulo ibwosunowo'ji kwaru'kwarupto daillokweyokwono. Su toro to'busuko kubalno Gooti toolluro yiuwi'nokai sokwollosoka su tobuuro jul'nyogalo tovi anakuuto tomuuda'ai danyu'nyuwuulo ibwosungelabodupu aga kuga kuruv kuuno ibwosungovla'mdupudogano.

²³ Danyu'nyuwuulo su tov yiuno Gooti toolluro sokwollosoka avalo puno ibwosunodupudo'maiyo. Ne kunol kuruv nemi poowokalago tokwe danyu'nyuwuulo aval'no ibwosunodowadonogano. Toro ibwosunodowado kuvi kuruv nevu Gooti toolluro Kuullo tool me'no amarowonogano. Kuullo su tool Gooti toolluro yasuwa'no nekullabiyo'moneyokwe tovida'ai muudu'no amarowekono. Gamoro yasuwa'no nonekullabwono puno'gwowi yere mama'dowado tovino tov yiuno sogwollo to'no kingovla'mdowadonogano. Aki gamoro kwoloraiyo tonollu gavuge ilomwallo'moneyokwe sulowa'ji toga kulako muuduko ton nonekubweyono tovino sogwollo kingovla'mdowadonogano. Toro kingovlavowa'ji toga nemoro poowokalago togai danyu'nyuwuulo ton ibwosungovla'mdowadonogano.

^24-25 Gooti tool nemi ma'no ma'nodo tovuro kirumwallo tovida'ai me'no abomollurolovonekumokalokwokaikono. Toro kuvi kuruv gamoro lukomgu nonekullabwono tonyuno yiuno sogwollo to'no kingovla'mdowadonogano. Kevu kuudo pun jaullulo. Nevu Gooti toolluro yiuwi'nokai sugudo ton me'no amarowa'jujuko'mno'juki sogwollo yasuwa'no ainowa'jujukonogano. Toro kuvi kuruv Gooti toolluro sugudo nonekullabwono ton yere mama'dowore tovino tov yiuno sogwollo to'no kingovla'mdowadonogano. Toro tonol aro kuudo to'no gudupola'mwalanonogano. Oo Gooti tool kuvinono nonekullabwonekono. Kuudo gudupola'mwalanonogano.

²⁶ Aki nevu wollainyo imo'nodowore tonollu Gooti toolluro Kuullo tool aro tomgu'aro nekullo'mwojokwekono. Nevu Gooti toollu subusu'nyogalo wuujo'moneyokwe kuudo yau'dowadonogano. Burowo'nyo yogalo wuudanonoldukoneyokwe tovino kuudo yau'dowadonogano. Toro yau'dowa'jure toga Gooti toolluro Kuullo su tool nemoro mago tovida'ai mollodawo'ji Gooti toollu subusu'nyogalo wuudodowodekono. Subusu'nyogalo wuudodowodo su tov a'mwo kwako akavida'ai tonolluro yogalo to'busuko'maiyo. Aki yogalo su tov yogalo yasuwa'nodo tonyu uuwolo'mdowodokwono.

²⁷ Aki Gooti tool nemoro poowokalago tonyu nekwonodowodekono. Toro tool gamoro Kuullo su toolluro kuudo yau'dowo'jure kunyu kuruv me'no youroma'dowodekono. Su tov aro tovinokwono. Kuullo su tool Gooti toolluro a'mwo abolo tonollu nonekullo'mwojo'moneyokwe subusu'nyogalo wuujokwekono. Toro tool nemoro kuudo yau'dowa'jure tovi muumjunyokwekono. Toro kwol kuruv Gooti gavnokwe toolluro winodowo'jure tomgu'aro to'gwowi kuvinono uumjunowo'ji subusu'nyogalo wuujokwekono.

²⁸ Aki nevu aro kuudo me'no youroma'dowadonogano. Gooti gavnokwe tool adonekumaroka tonol gamoro a'mwo abolo me'no wimo'nodowa gamino kalo buuropino nekullunodowodonogano. Toro tonollu buro'nyo buro'nyo sugudodeyo kaiya'nododeyo yiuwi'nokai abaneki'mopi su ton nemi yiuno ilaiyo to'no yanekullugollo'moneyokweyogano.

²⁹ Aiyoga Gooti tool gamoro a'mwo abolo su ton yere mimo'nodopure kugada'ai kuudo me'no souromallajukogano. Oo moro puuto soulosumi tomgu'aro bopi moro Kwolaiyo Jisasolbusuko imo'nopi aki moro kuunodo nyumo'nupinodeyo, kuudo souromallajukogano. Toro te Jisasol kwolaiyo sujuraiyo toolbusuko wimo'nowo'ji Gooti toolluro a'mwo abolo bwotonyago sumo'nupi su tonyu Jisasol kemi kuudai'yago toolbusuko wimo'nonekono.

³⁰ Toro wimo'nyo'moneyokwe Gooti toolluro a'mwo abolo ajesajuko su tonyu gamiyomno abupureyokwe me'no doma'dowodekono. Toro doma'dowodo su ton gamoro sumdo tovi sugudo wimo'nyo'moneyokwe ilaiyo molloma'dowodekono. Aki ilaiyo molloma'dowodo su tonyu gamoro bako bwotonyo pwopiyodowodo toru me'no kuulomorumwallodowodekono. Gooti tool gamoro a'mwo abolo tonyu toro wiyodowodekono.

Gooti kalo buuropino nekullunodowodo toollu yiuwi'nokai noonyumwonyu kun kuruv ku'nono muumjukurono tovinokwono

³¹ Gooti tool sugudo tono tono yanekullugolodowodekono. Toro tovino tov kuudo puruv aro neya yaurogawano. Ikomago pwol nemi kaiyako yanekullugollo'mo so'ji kuvi kuruv Gooti tool nemi mollonekuda'mdowodo tovino tov nevu ikomago nonagutokwe tonolbusuko imo'nanonogano.

³² Aki Gooti tool gamoro Kwolaiyo toolluno danyu'nyuwuulo nyubwosuno'jokwe muumjukurokaikono. Toro kwol kuruv nevu yiuwi'nokai tonollu nonekullo'mwojo'moneyokwe gamoro Kwolaiyo su toollu kuvinono kwolomonekwopiyabokaikono. Toro to'busuko kubalno yiuwi'nokai yasuwa'no nonekullabiyo'moneyokwe dodowodo kun kuruv kuvinono nonekullabwonekono.

³³ Aki nevu Gooti toolluro kuunodo wimo'nyo'moneyokwe me'no ajanekubweyoka tonolluno aro kuudo yau'dowodekono. Oo moro a'mwo abolo sugudogano. Gooti gavnokwe tool su toro kuudo me'no yanekuu'dowodo tovino tov gamoro sumdo tovi sugudo wimo'nodowadonogano. Toro tonolluno a'mwo abolo pun, “Ma'no ma'nodokweyogaikikonoo,” janekwonyo'moneyokwe pun nonagutomuugono.

³⁴ Aki a'mwo abolo pun nemino tov, “Nerekumwallo'moneyokweyogaikikono,” ku'nono majanekwonpinogano. Su tov aro tovinokwono. Nemi kironekumwallo'moneyokwe tov Krais Jisas gavnokwe tool nemoro aiko toru maro'no abolokaikono. Toro bolno sumaiyokwe aiyo aiko te dukavo'no Gooti toolluro anato toru sulomwalokaikono. Toro tool nemoro mago tovi'aro mollodavowo'ji nemi nekullo'mwojo'moneyokwe Gooti toollu wuudoganodowodekono.

³⁵ Aki Krais tool yiuwi'nokai toga nemino kalo buuropino winodowodekono. Krais toolluro kalo buuropino winodowodo su tovi noonyumwonyu pworo mamolloru'mdowapipinorogano. Tabunyuwuulodeyo oo danyu'nyuwuulodeyo oo a'mwo pworavuro kaiyako sanekullugolpiyo'mdeyo oo muju'wuulodeyo oo apoo'nyaiyo'mdeyo oo kaiyako i'nallo'mo'mdeyo oo noromiyanekubweyo'mo'mdeyo su tooro Krais toolluro kalo buuropino nemino winodowodo su tovi ku'nono mamolloru'mdovonekwapipinorogano. Noonyumwonyu su tooro toro abaneki'mopi kuvi kuruv Krais toolluro nemino kalo buuropino winodowodo tovino'gwowi ku'nono muumjukupinorogano.

³⁶ Jul'nyo su tooravuro pworo nevu noma'mwalano tovino Gooti toolluro yogalo puruv aro sakwollungikokwono. “Nevu gumoro a'mwo abolo kuunodo gujumo'nodowado tonolluno tov yiuwi'nokai toga romiyanekubweyodupudonogano. Toro tonol sipsip toorai yiuno'no romiyosodupudo toorobusuko kubalno imo'nodowadonogano.” Gooti toolluro yogalo tov toro sakwollungikokwono.

³⁷ Toro te buro'nyo buro'nyo tabunyuwuulorodeyo su tooro nobaneki'mo'mdopure toga ku'nono manekuuwolo'mwalpinorogano. Toro kuvi kuruv nemino kalo buuropino winodowodo Jisasollu'aro to'gwowi yiuwi'nokai toga nuuwolo'mwalanonogano.

³⁸ Gooti toolluro kalo buuropino nekullunodowodo su tovino nuu kuudo me'no youroma'dumdonyugono. Toro te nuu kuudo noullo maullo miyau'dum aro tovino guureji gudopola'dumdonyugono. Gooti toolluro nemino kalo buuropino winodowodo su tovi noonyumwonyu pworo ku'nono mamolloru'mdovonekwapipinorogano. Nobollo'mo tokwe'aro aiyo mwallo'mo tokwe'aro toval ku'nonodo'movalmaiyo. Aki ensel toorogai'aro kuullo ma'no ma'nodo toorogai'aro noonyumwonyu jurogudokwe toorogai'aro kworo kuruv ku'nonodo'moromaiyo. Aki aga baneki'mo'mdupudo toorogai'aro lukomgu nobaneki'mopino toorogai'aro kworo kuruv ku'nonodo'moromaiyo.

³⁹ Aki kwako tovi muunyu tomuu wo'dupudo toorogai'aro kwako tovi dolago tomuu wo'dupudo toorogai'aro kworo kuruv ku'nonodo'moromaiyo. Aki Gooti toolluro yiuwi'nokai sokwollosoka kworo kuruv ku'nonodo'moromaiyo. Yiuwi'nokai su tooro Gooti toolluro nemino kalo buuropino winodowodo tovi ku'nono mamolloru'mdovonekwapipinorogano. Gooti toolluro kalo buuropino winodowodo su tovi anakuuto tomuu me'no kuulomwalodowadonogano. Su tov nemi Aguto Krais Jisasollu'aro nonekullumo'nodowodokwono.