Room 5 - Gooti Toolluro Yogalokwono

Gooti tool nemino, “Sugudogano,” danekubweyodowo'jure tovida'ai gamoro sumdo tovi sugudo wimo'nodowado tovinokwono

¹ Toro te nevu Krais toolluno kuudo me'no uubweyodowado tonolluno Gooti tool, “Sugudogano,” danekubweyoduke tovida'ai gamoro sumdo tovi sugudo wimo'nodowadonogano. Toro tovino tov nevu Gooti toolluro ikomago mwimo'nodowadonogano. Toro kuvi kuruv nemi Aguto Jisas Kraisol nekullo'mwojo'moneyokwe womdo tov me'no sopiyokaikono. Toro sopiyoka tovino Gooti tool kuudo yaurowo'ji gamoro sumwoluko tov nemino kavo nekubweyodowodekono.

² Aki Gooti toollomno biyo'moneyokwe puuto tov Krais Jisasol me'no soulonekubweyokakwono. Nevu kwolluno kuudo kuubweya'ji tovi'aro puuto su tovi bodowadonogano. Toro tonol Gooti toolluro yasuwa'wino sugumaluko nekubweyodowodo tollovai anakuuto tomuu me'no kuulai'mo'mdowadonogano. Toro kuulai'mo'mdowado tonol aga kuga kuruv guureji amjodo'movlavogawano. Toro mujodo'movlavowa'ji lukomgu Gooti tooke gamoro bako bwotonyo pwopiyodowodo tovi anakuuto tomuu ilomwallo'moneyokwe sogwollo to'no kinyokwenogano. Aki toro tovino ilaiyo ibwosunowa'ji ilomodomoropiyokwenogano.

³ Aki nemoro tagunyo ma'dowado kunyuno kuruv ilaiyo ibwosunowa'ji ilomodomoropiyokwenogano. Tagunyo ton marowa'ji toga aro kuudo yau'dowadonogano. Buro'nyo buro'nyo tagunyodeyo su ton nemoro poowokalago tovi jurogudo adanekullumwojadokwovo. Aki tagunyo su ton amara'ji toga nobwolorowa'jokwe yiuno Gooti toolluno gudupola'mwalanonogano.

⁴ Su toro gudupola'dowa'jure tonollu Gooti tool nekwonowo'ji ilaiyo kuudo yanekuuronekono. Toro yanekuu'dowo'jure tovida'ai nevu gamino kuudo uubwemovlavowa'ji sogwollo aro tovino kinmwalanonogano. Nevu lukomgu ilowa'ji Gooti tooke ilaiyo to'no ilomwalanonogano. Su tov, Kuvinono nonekullumo'nono'mdeyo, kuudo yaurowa'ji sogwollo to'no kingovla'mwalanonogano.

⁵ Nevu su toro tomgu'aro sogwollo aina'ji tov wogulo'mo miyanonogano. Su tov aro tovinokwono. Gooti tool nemino kalo buuropino winodowodo tovi nekuduuwallo'moneyokwe gamoro Kuullo tool anekubweyokaikono. Toro te Kuullo su toollu'aro Gooti tool gamoro kalo buuropino winodowodo tov nemoro poowokalago tonyu kuulemovanekubweyodowodekono.

⁶ Nevu muudu'nodo toga nemi ma'no ma'nodo tonyu modukwopinyo'moneyokwe jurogudo nonaguto sumo'nyajuwonogano. Toro imo'nodowore kuvi kuruv Krais toolno'gwowi nevu kirovanyuvanyu kuumwiyo tonollu nekullo'mwojo'moneyokwe abwolabolokaikono. Gooti gavnokwe toolluro me'no ajesoka kuunodo toga kuvinono abwolabolokaikono.

⁷ Kevu kuudo neya jaullulo. A'mwo yasuwa'nodo pwol a'mwo sugudo pwolluro aiko toru mallo'moneyokwe nokwo bolonoldukono? Awiyo, a'mwo sugudo kwollu kuruv wiyo'mwojo'moneyokwe yere mabolonekono. Aki a'mwo pwol a'mwo abolo punyu ilaiyo igolodowodo toolluro aiko toru mallo'moneyokwe nokwo bolonoldukono? Nevu kuudo miyau'mwakuuwono. A'mwo jurogudo puva a'mwo su toollu wiyo'mwojo'moneyokwe nobolonoldukono oo mabolonoldukono?

⁸ A'mwo yasuwa'nodo pworo toro mipino kuvi kuruv Krais toolno'gwowi nevu ma'no ma'no mujumovla'mdowore toga nemoro aiko toru bwolomaro'no nemi nekullo'mwojo'moneyokwe abolokaikono. Toro aboloka su tov Gooti toolluro nemino kalo buuropino winodowodo tovino kuu'maiyo toru'no anekuduuwallokaikono.

⁹ Nevu ma'no ma'nodokwe sumo'nyajuuwo kunol kuruv aga'no'gwowi Krais toolluro mujako abwoloka tov mollol'movonekuma'dowo Gooti toolluro sumdo tovi sugudo me'no wimo'nodowado tonolluno, “Sugudogano,” dodowodekono. Toro tonollu Gooti toolluro surodo wuunodowo'jure tovi nobomollurolovonekumokalokwononogano.

¹⁰ Aki nevu Gooti toolluro ikomago kwimo'nyajuuwo kunol kuruv gamoro Kwolaiyo toolluro aboloka tovida'ai Gooti tool nemi amomgurovanekubweyokaikono. Toro amomgurovanekubweyoka tovida'ai nevu gamoro ibwoto'nyo wimo'nodowadonogano. Toro tovino tov aro nonekullumo'nononogano. Jisasol aiko te me'no dukavo'no aiyo mwallokwekono. Nevu toro tooke aiyo mwalodowado tovino tov Gooti toolluro kirumwallo tovi nobirolo'nugolokwanonogano.

¹¹ Toro tovino ilaiyo ilomodomoropiyokwenogano. Aki puruv Aguto Jisas Kraisolluro womdo sopiyoka tovi'aro Gooti tool nemi amomgurovanekubweyokaikono. Toro amomgurovanekubweyoka tovida'ai gamoro ibwoto'nyo wimo'nodowado tonol Gooti su toolluno ilaiyo ilomodomoropiyokwenogano.

Bolnodo tov Adamolluda'ai sumo'noka kuvi kuruv aiyo yiunokuudo mujomwekovlaiyo'moneyokwe to'gwowi Jisasolluda'ai sumo'noka tovinokwono

¹² Toruda'ai ma'no ma'nodo tov a'mwo yiuno pwolnodo toolluro amolloujulowosoka tovida'ai bolnodo tov sumo'nokakwono. A'mwo su toolluno yovo tov Adamolekono. Bolnodo tov me'no imo'nyuno sumaiyokwe yiuwi'nokai kwako akavida'ai a'mwo abolo tonollu aiyowomno so'movanekwopiyokakwono. Aki nevu yiuwi'nokai a'mwo abolo tonol ma'no ma'nodokwe imo'nodowado tovino tov mujobolmovla'mdowadonogano.

¹³ Aiyoga Gooti tool gamoro loowo ton yere mwiyoduke kuga kuruv ma'no ma'nodo tov a'mwo abolo kwako akavi mwalodupudo tonyu me'no kuuwollajukokwono. Su toro toga loowo tov me'no wo'dowo'jureyo'mno'juki Gooti tool a'mwo abolo tonyuro ma'no ma'nodo tovi nokwo ajagilowo'jujukekono. Toro kuvi kuruv su toro toga loowo tov yere mwo'duke tovino tov Gooti tool a'mwo abolo tonyuro ma'no ma'nodo tonyuno majagillajukekono.

¹⁴ Toro majagillajuko kuga kuruv a'mwo abolo ton kuuno amjobolmovlaiyajupogano. Imuu Adamolluda'ai imo'nugelabino imo'nugelabino sumaveyokwe yiuno Moosesolluro toga'no abillumo'nyajupo su ton loowo punyu kisuvolo miyodupudo kun kuruv bolnodo tovi dolago tomuu mwalodupu amjobolmovlaiyajupogano. A'mwo abolo pun Adamolluro ma'no ma'no soka to'busuko kubalno miyodupudo kun kuruv mujobolmovla'mdupudogano. Adamol Jisasolluro bowo'ji womdo yono tovino yovekurajo sumo'nyajukekono.

¹⁵ A'mwo su tooral aval'nodoralmaiyo. Toro tovino tov kemoro womdo solo tovalluda'ai nevu yiuwi'nokai a'mwo abolo tonollu go'no go'nodo tomgu'aro yo'movanekwopiyodubulovakono. Adamolluro ma'no ma'no soka tovasuda'ai bolnodo tov a'mwo abolo bwotonyago tonollu yo'movanekwopiyodowodokwono. Toro kuvi kuruv Jisas Kraisolluro anekullo'mwojoka tovasuda'ai Gooti toolluro yasuwa'wino sugumaluko tov a'mwo abolo bwotonyago kuunodo tonollu yo'movanekwopiyodowodokwono. Toro tovino tov Gooti toolluro yasuwa'wino sugumaluko ma'dowado to'gwowi bolnodo tovi uuwolo'mdowodokwono.

¹⁶ Toro te Gooti toolluro sugudo nekullabodowodo su tokwe'aro Adamolluro ma'no ma'no soka tovida'ai nekullabodowodo tokwe'aro toval aval'nodo tomgu'aro miyanekullugolodubulovakono. Adamolluro tovasuda'ai Gooti tool nemi, “Nerekumwallumorekikono.” Anekujajukekono. Toro kuvi kuruv a'mwo abolo tonol ma'no ma'no bwotonyo mujumovla'mdowore toga Gooti tool gamoro yasuwa'wino tov nekullabodowo gamoro sumdo tovi sugudo wimo'nodowadonogano. Toro tonollu aro nekujokwekono. “Kemi mairekumwallumonyugono.” Nekujokwekono.

¹⁷ Kevu kuudo neya jaullulo. Adamolluro ma'no ma'no soka tovida'ai bolnodo tov mido mollonekumwallo'moneyokwe gamoro dolago tomuu amonekumwallokanogano. Toro kuvi kuruv Gooti toolluro yasuwa'wino sugumaluko anekullaboka to'gwowi bolnodo tovuro jurogudo tovi kuuwolovokakwono. Toro te yiuwi'nokai a'mwo abolo ton Gooti toolluro yasuwa'wino sugumaluko nekullabodowo'jure su tovi amapi ton gamoro sumdo tovi sugudo wimo'nupinogano. Toro ton Jisas Kraiseke aiyo yiunokuudo mujomwekovlavopi gavuge mido mollomwalokwe imo'nupinogano.

¹⁸ Krais tooke'aro Adameke'aro tooralluro solo su tovino aro kuudo neya jaullulo. Yiuno Adamol judo toolluro ma'no ma'no soka tovida'ai Gooti tool yiuwi'nokai a'mwo abolo tonollu, Nerekumwallumonyugono, adanekubweyokaikono. Toro kuvi kuruv yiuno Krais judo toolluro sugudo soka tovida'ai to'gwowi yiuwi'nokai a'mwo abolo tonollu irolovonekwapiyodowo aki aiyo yiunokuudo mujomwekovlaiyo'moneyokwe tov nekullabodowodonogano.

¹⁹ Aki puruv a'mwo pwolnodo toolluro Gooti toollu kisuvolo kwiyoka tovasuda'ai bwotonyago tonol Gooti toolluro sumdo tovi ma'no ma'nodokwe sumo'nyajuwonogano. Su toro to'busuko kubalno a'mwo pwolnodo tool Gooti toollu pi'mwono kuumjunoka tovida'ai nevu bwotonyago tonol Gooti toolluro sumdo tovi sugudo wimo'nodowadonogano.

²⁰ Toro kuvi kuruv a'mwo abolo ton kemi ma'no ma'nodo tonyuno neya yainyunpureyokwe Gooti tool gamoro loowo tov kwiyokaikono. Loowo kwiyoka su tovi me'no amaropo kuga kuruv ma'no ma'nodo tov bwotonyo mujumo'nugelabodowodokwono. Toro mujumo'nugelaboduke kuvi kuruv Gooti toolluro yasuwa'wino sugumaluko uubweyodowodo to'gwowi bwotonyo kuunodo mujumo'nugelabodowodokwono.

²¹ Kevu kuudo neya jaullulo. Muudu'nodo toga ma'no ma'nodo tovi dolago tomuu mwalodowa abollajuwonogano. Toro kuvi kuruv aga'no'gwowi nevu Gooti toolluro yasuwa'wino sugumaluko tovi dolago tomuu mwalodowadonogano. Nemi su toro kuulomonekumwallo'moneyokwe Aguto Jisas Kraisol womdo me'no sopiyokaikono. Toro tovino tov nevu Gooti toolluro sumdo tovi sugudo wimo'nodowa aiyo yiunokuudo mujomwekovlaiyo'moneyokwe tovi ma'dowadonogano.