Room 4 - Gooti Toolluro Yogalokwono

Gooti tool Eburaiyamollu, “A'mwo sugudekugono,” kuudoka tovinokwono

¹ Aiyogasuro nemi nellukweyago Eburaiyamolluda'ai bodowado tonol kwolbusuko imo'nodowadonogano. Toro te Eburaiyamollu kwimo'noka tovino kuuguudo akavi duu'nyulo.

² Gooti tool Eburaiyamollu ilaiyo amollomaroka tov Eburaiyamolluro sugupasudo yoduke tovida'ai ilaiyo amollomarokalmaiyo. Kuudo neya jaullulo. Eburaiyamol gavnokweyolluro sugupasudo tovida'ai Gooti toolluro sumdo tovi sugudo sumo'nowo'jujuko'mno'juki Eburaiyamol ilomoropunyu nokwo sawo'jujukekono. Toro kuvi kuruv Eburaiyamolluro kuudo kuubweyoka tovida'ai to'no Gooti toolluro sumdo tovi sugudo kwimo'nokaikono. Toro tovino tov Eburaiyamol gavnokweyolluno ilomoropunyu miyajukekono.

³ Gooti toolluro yogalo puruv aro ajakwollungikokwono. “Eburaiyamol Gooti toolluro yogalo wuudoduke tovino kuudo kuubweyokaikono. Toro kuubweyoka toolluno tov Gooti tool ilaiyo mollomaro'no gamoro sumdo tovi sugudo kwimo'nokaikono.” Gooti toolluro yogalo puruv su toro sakwollungikokwono.

⁴ Su toro tovino yovekurajo puruv arokwono. A'mwo pwol womdo yodowo'jure tovida'ai nuugwiyo ton ma'dowodekono. Nuugwiyo su ton yasuwa'no ma'dowodolmaiyo. Toro kuvi kuruv gami womdo yodowodo tovida'ai uubiyodopure tonyu ma'dowodekono.

⁵ Kwako akavida'ai nuugwi womdo yodupudo tooro su toro tomgu'aro yoma'dupudorogano. Toro kuvi kuruv Gooti toolluro sumdo tovi sugudo wimo'nyo'mo to'gwowi a'mwo abolo ton noonyumwonyu womdo pun kevnokwe ton yopi tovida'ai mwimo'nupinogano. Toro kun kuruv yiuno Gooti toolluno kuudo kuubwepi to'gwowi Gooti toolluro sumdo tovi sugudo nokwo wimo'nupinogano. Toro te a'mwo abolo ma'no ma'nodokwe tonyu ilaiyo mollomallo'moneyokwe tov yiuno Gooti toolnodokwono.

⁶ Aki aiyoga a'mwo aguto kig Devitolluro puukwollo ajakwolloka puruv aro tovinokwono. A'mwo abolo pun ma'no ma'nodokwe tonyuno tov kevnokwenyuro sugupasudo'mdeyo tovida'ai Gooti tool ilaiyo molloma'dowodolmaiyo. Toro kun kuruv yiuno Gooti toolluno kuudo uubweyodopure tonyu Gooti tool gamoro sumdo tovi sugudo wimo'nyo'moneyokwe ilaiyo molloma'dowodekono. A'mwo abolo molloma'dowodo su tobuuro kemi poowokalago togai ilaiyo bwotonyo ibwosunodupudogano. Su toro tovino kig Devitolluro puukwollo ajakwolloka tov arokwono.

⁷ “A'mwo abolo pubuuravuro ma'no ma'nodo tonyu Aguto tool modukwopiyowo'ji yiunokuudo mobu'duvolosodowodekono. Toro wimo'nodowo'jure su ton kemi poowokalago togai ilaiyo bwotonyo ibwosunodupudogano.

⁸ Aki a'mwo abolo punyuro ma'no ma'nodo tonyuno Aguto tool mamojagilowo'ji aki aiko te kuudo miyou'movla'mdowodekono. Su toro wimo'nodowo'jure ton kemi poowokalago togai ilaiyo bwotonyo ibwosunodupudogano.” A'mwo aguto kig Devitol su toro ajakwollokaikono.

⁹ Toro te Devitol a'mwo pworaino, “Oo ilaiyo bwotonyo ibwosunodupudorogano,” ajakwolloka su tov Juu lakulkulako do'nodupudo tooraino ajakwollokaldukono? Awiyo, yiuno Juu tooraino to'no ajakwollokalmaiyo. A'mwo Juu tooravuro miyawosunodupudo tooro lakulkulako mado'nodupudorogano. Toro kworo kuruv Gooti toolluno kuudo uubweyodopudorogano. Toro uubweyodopure toorai Gooti tool gamoro sumdo tovi sugudo wimo'nyo'moneyokwe ilaiyo molloma'dowodorogano. Kevu kuudo neya jaullulo. Gooti toolluro yogalo puruv Eburaiyamolluno aro sakwollungikokwono. “Aiyoga Eburaiyamol Gooti toolluno kuudo uubweyoduke toolluno tov Gooti tool, “Sugudekugono,” wuudo'no ilaiyo amollomarokaikono.”

¹⁰ Eburaiyamollu su toro kwimo'noka tov gami lakulkulako tov me'no do'noduke toga kwimo'nokaldukono oo yere mado'noduke toga kwimo'nokaldukono? Eburaiyamol gami lakulkulako tov yere mado'noduke kuga kuruv yiuno Gooti toolluro yogalo tovi kuudo kuubweyoka su toollu, “Sugudekugono,” wuudo'no ilaiyo amollomarokaikono.

¹¹ Toro te lukomgu Gooti tool Eburaiyamollu kuudokaikono. “Ilaiyo me'no amolloguma'mo tovino duuwallo'moneyokwe gumi lakulkulako tov neya dodo'nono.” Kuudokaikono. Toro te agasuro a'mwo pworo kemi lakulkulako ton mado'nodupudo kworo kuruv yiuno Gooti toolluno kuudo kuubwepi toorai Gooti tool gamoro sumdo tovi sugudo wimo'nyo'moneyokwe ilaiyo mollomaronekono. Aki toro toorai Eburaiyamol kemi kuunumiyago kuunodo toolbusuko wimo'nonekono.

¹² Aki Eburaiyamol lakulkulako yere mado'no'no Gooti toolluno kuudo kuubweyokaikono. Toro to'busuko kubalno nevu Juu toonol lakulkulako me'no do'nodowado kwonol kuruv kuudo kuubweya'ji to'gwowi Eburaiyamol nemi nellukweyago kuunodo nonekullumo'nonekono.

Gooti toolluro subuu'yamju kwiyajuko tov yiuwi'nokai gamino kuudo kuubwepi kunyuda'aiyo'mokwono

¹³ Aiyoga Gooti tool Eburaiyameke'aro gami jukweyago kwolaiyo sumo'nopo toorogai'aro toorai subuu'yamju puruv aro aduuwiyokaikono. “Yiuwi'nokai kwako tov kemiyo'mo nekullamokwono.” Aduuwiyokaikono. Gooti toolluro subuu'yamju aduuwiyoka su tov Eburaiyamol loowo punyu uumjunoduke toollu aduuwiyokalmaiyo. Toro kuvi kuruv Eburaiyamol yiuno Gooti toolluno kuudo uubweyoduke tovino tov Gooti toolluro sumdo tovi sugudo kwimo'nokaikono. Toro toollu subuu'yamju su tov aduuwiyokaikono.

¹⁴ Toro te a'mwo pwol loowo tovi uumjunowo'ji Gooti toolluro subuu'yamju tov, Ma'monyugoneyokwe, sauro'ji kuvi kuruv subuu'yamju su tov ku'nono mamaronekono. Su toro tomgu'aro yoma'dupudo'mno'juki Gooti toollu kuudo uubweyo'moneyokwe tov yasuwa'no sopujukorogano. Aki Gooti toolluro subuu'yamju kuruv yasuwa'no kwimo'nowo'jujukorogano. Toro tovino tov loowo tovi tomgu'aro miyoma'dupudokwono.

¹⁵ Kevu kuudo pun jaullulo. Loowo tov nonaguto'mno'juki a'mwo abolo ton loowo puvi dolago tomuu mamwalopi kisuvolo mipinogano. Toro kuvi kuruv Gooti toolluro loowo tono'gwowi nooso. Toro te a'mwo pwol loowo su tonyu kisuvolo so'ji toollu Gooti tool surodo wuunonekono.

¹⁶ Toro tovino tov Gooti tool gamoro subuu'yamju tovi wiyo'mo tool loowo tovi uumjunodopure tomgu'aro kwiyajukolmaiyo. Toro kuvi kuruv Gooti tool gamoro subuu'yamju tov yiuno gamino kuudo uubweyodopure toorai kwiyajukekono. Gooti toolluro subuu'yamju su tov Eburaiyamolluro kwikweyago kwolaiyo sumo'nupi toorai neya mapino'moneyokwe toro wiyokwekono. Aki nevu agasuro kunollu kuruv yasuwa'no nekullabodowodekono. Toro tovino tov yiuno loowo tovi uumjunodupudo tonyuno to'no wiyodowodolmaiyo. Toro kuvi kuruv yiuwi'nokai Eburaiyamolbusuko kuudo uubweyodopure tooraino'gwowi kworaiyo'mokwono. Toro te nevu Gooti toolluno kuudo uubweyodowado tonollu nellukweyago nekullumo'nodowodo tool Eburaiyamol kwekono.

¹⁷ Eburaiyamolluno kuuguudo puruv Gooti toolluro buukiyo tovi aro sakwollungikokwono. “Guu a'mwo abolo kwolallo go'no go'nodo tomuuda'ai sumo'nupi tonyu kuunumiyago wimo'nyo'mo ajagubwemono.” Sakwollungikokwono. Toro te Eburaiyamol yiuno gavnokweyolluro kulako tokwe subuu'yamju su tovi suuwiyo ku'nono mimwojowo'jujukekono. Toro kwol kuruv Gooti toolluro sumdo tovi aro kuudo me'no kuubweyajukekono. “Oo Gooti tool a'mwo abolo me'no bolodupudo tonyu aiyo aiko te moduka'mdowodekono. Aki Gooti tool noonyumwonyu pun yere mimo'nyodopure tonyu imo'nopureyokwe kuudo sauro'ji tov kaveno yokwollosodowodekono.” Eburaiyamol toro kuudo kuubweyajukekono.

¹⁸ Aki Gooti su tool Eburaiyamollu subuu'yamju aro kwiyokaikono. “Guu a'mwo abolo kwolallo go'no go'nodo tomuuda'ai sumo'nupi tonyu kuunumiyago wimo'nubinekugono.” Gooti toolluro subuu'yamju kwiyoka su tovi kuvinono imo'nyo'moneyokwe Eburaiyamol puuto nonaguto sumo'nokaikono. Toro kwol kuruv subuu'yamju su tov, kuvinono nonyumo'nono'mdeyo, kuudo yauro'no yiuno sogwollo to'no aingovlaiyajukekono. Aki toro tool Gooti toolluro yogalo kuudoka puvino aki aiko te kuudo saurokaikono. Yogalo su tov arokwono. “Gumoro jukweyago kwolaiyo sumo'nupi su tooro sullugabwo toorobusuko kwolallo bwotonyago imo'nupinorogano.”

¹⁹ Gooti toolluro su toro kuudoka tovino, Kuvinono imo'nono'mdeyo, kuudo yau'dowodo su tov iroto mimwogapiyajukekono. Aki Gooti toolluno kuudo uubweyodowodo kuruv guureji agudopolallajukekono. Eburaiyamol subuu'yamju su tonyuno kuudo kuubweyajuko tool 100 kworomo tomgu'aro kuuwolo'nokaikono. Su toro toga aro kuudo saurowo'jujukekono. Nuu yadaiyo tekwonyu a'mwo bwiyo toorobusukekwonyugono. Toro tekwonyu kwolaiyo tov ku'nono miyawosunmonyugono. Aki moro abolo Sarav kwollukokwono. Toro tovino tov kwolaiyo ku'nono miyomaronokwono. Eburaiyamol su toro kuudo saurowo'jujukekono.

^20-21 Toro kwol kuruv Gooti toolluro subuu'yamju tovino kuudo noullo maullo miyau'dowo aro kuudo kuubwemovlaiyajukekono. Mi kuvinono nonyumo'nyo'mo tov Gooti tool jurogudo mwimo'nonoldeyo. Kuudo kuubwemovlaiyajukekono. Eburaiyamolluro kuudo su tov jurogudo to'no sumo'nugelabiyajukokwono. Aki toro tool Gooti toolluno yovo tov muunyu toru'aro sulomoropiyajukekono.

^22-23 Eburaiyamol su toro kuudo kuubweyajukekono. Toro uubwemovla'mduke toollu Gooti tool, Sugudoldeyo, do'no ilaiyo amollomarokaikono. Yogalo su tov yiuno Eburaiyamol judo toollo'mo adubweyokalmaiyo.

^24-25 Yogalo su tov ne kunolluda'aiyo'mokwono. Nevu Gooti toolluno kuudo kuubweya'ji tonolluno Gooti tool, “Sugudodeyo,” dowo'ji ilaiyo aval'no mollonekumaronekono. Gooti su tool nemoro ma'no ma'nodo tovuro kirumwallo tovi mobiyanekudukwopiyo'moneyokwe Jisasollu a'mwo romiyosodopure tooravuro ato tovi amorubweyokaikono. Toro morubweno sumaiyokwe nemi Aguto Jisasol yiuno'no abolokaikono. Toro kwollu kuruv Gooti tool aiyo aiko te amodukavokaikono. Gooti toolluro amodukavoka su tov nevu kuudo kuubweya'ji tonol gamoro sumdo tovi sugudo wimo'nyo'moneyokwe tovinokwono. Toro te Gooti tool nevu kuudo kuubweya'ji su tonollu ilaiyo nomollonekumaronekono.