Kuuguudo Sugudo akav Makolluro sakwollokakwono Mak 15 - Gooti Toolluro Yogalokwono

Jisasollu Pailatollomno amogaibworomokavlavopo tovinokwono

¹ Toruda'ai lomwo iru'mago toga pris mido mollomwalokwe toorogai'aro Juu tooravuro mido mollomwalokwe toorogai'aro loowo tovino pi'mwo kuudokwe toorogai'aro yiuwi'nokai Juu tooravuro kaunsel toorogai'aro tooro i'bwo'no'mno Jisasollu adado wiyanoldukoneyokwe tovino sajunoporogano. Toro yajunyuno sumaveyokwe adomdukuurosoporogano. Toro domdukuurosuno sumaveyokwe Jisasollu wuulo meroso'moneyokwe Room tooravuro a'mwo aguto pwollomno amogaibworomokavlavoporogano. A'mwo aguto su toolluno yovo tov Pailatolekono. Toro tool Roomda'ai kwol kuruv Juu a'mwo abolo tonyu mido mollomwalo kwimo'nyajukekono.

² Toro toollomno mogaibworomokavla'mno sumaveyokwe Pailatol Jisasollu aro kuudoganokaikono. “Guu Juu tooravuro a'mwo aguto kig tool kwekudukono?” Toro kuudoganoka toollu Jisasol kuudokaikono. “Guvnokwekujuro toro adumado tov kuvigono.” Kuudokaikono.

³ Toro kuudoka tovi pris mido mollomwalokwe tooro Jisasolluno yogalo bwotonyago togai Pailatollu aro amojokuu'nosoporogano. “A'mwo su tool ma'no ma'nodo tov tono tono yokwekono.” Amojokuu'nosoporogano.

⁴ Toruda'ai Pailatol Jisasollu aki aiko te kuudoganokaikono. “Gumino yogalo anyudadokwopo tov, “Ma'no ma'nodo tov tono tono yokwekono,” anyudadokwopo su tovi nuu'nadokuuno. Toro tovino guu yogalo puru'monodo kuruv madubinekudeyo?” Kuudoganokaikono.

⁵ Pailatolluro toro kuudoganoka tovi Jisasol yogalo puruv muudokaikono. Aki lukomgu kuga kuruv yogalo pugai'aro muudumovlavokaikono. Toro toolluno Pailatol kuudo kwolallo sourukwapiyokaikono.

Pailatol Jisasollu i'noguropte tovi amovoromiyoguroptowosupureyokweyo'mo amorubweyoka tovinokwono

⁶ Toruda'ai Pailatol yiuwi'nokai kworomo tonyu lubullu doto yanodupudo toga aro sajukekono. A'mwo pwol wuulo killo'mo ago tovi kuule'na'dowo'jure toolluno Juu a'mwo abolo ton kuudoganyajuporogano. “Oo guu a'mwo su toollu nokwo illurolowopiyabinekudeyo?” Toro wuudoganodopure toga Pailatol su toro toollu sullurolowopiyajukekono.

⁷ Su toro toga a'mwo pwol wuulo killo'mo ago tovi ai'nallajuko toolluno yovo tov Barabasolekono. A'mwo su tool Roomda'ai a'mwo mollurogudo bomollomwalodopure toorai molo kwiyajukekono. A'mwo su tooke'aro a'mwo gabovo pworogai'aro tooro Roomda'ai mollurogudo toorai molo kwiyajuporogano. Toro toorai molo wiyodopure toga wuulo killo'mo ago tovi amerosoporogano. Toro te Barabasol a'mwo pwollu aromiyosoka tovino tov amerosopekono.

⁸ Toro kuule'na'duke toga kwolallo ton Pailatollomno bo'mno aro abuudoganopogano. “Guu yiuwi'nokai kworomo tovi yodumdo to'busuko kubalno a'mwo wuulo killo'mo ago tovi aulomwalluko pwollu nokwo ilomollurolovonekwopiyabinekudeyo?” Abuudoganopogano.

^9-10 Toro buudoganodopure tooraino Pailatol aro kuudo me'no souromarokaikono. A'mwo kwolallo ton Jisasolluno ilaiyo kuudo yau'dopure kuvi kuruv pris mido mollomwalokwe tooro Jisasollu uuwoleyo'moneyokwe to'no winodopure tooro mi domanubwemavo. Kuudo me'no souromarokarogano. Toro tool kwolallo ton buudoganodopure toga aro samuugojokaikono. “Juu toorekul, Nemi a'mwo aguto kigolo, dodupudo Jisasollu mollurolowapiyo'mo dekullunadopiyo?” Samuugojokaikono.

¹¹ Pailatol toro samuugojoka toga pris mido mollomwalokwe tooro kwolallo tonyu aro adelowo'napureyokweyo'mo guureji aduuwiyoporogano. “Awiyo, Jisasollu mirolowapiyo'bi yiuno Barabasolluno jullurolowopiyabono.” Toro wuudupino'moneyokwe guureji aduuwiyoporogano. Toro duuwino sumaveyokwe kwolallo ton Pailatollu kuvinono kuudopogano.

¹² Toro wuujuno sumaveyokwe Pailatol aki aiko te kuudoganokaikono. “Juu toorekul, Nemi a'mwo aguto kigolo, dodupudo akallu adado wimonyudeyo?” Kuudoganokaikono.

¹³ Toro kuudoganoka toga kwolallo ton deko aro adelowo'naropogano. “A'mwo su toollu i'noguropte tovi domovoromiyoguroptowosono!” Adelowo'naropogano.

¹⁴ Toro adelowo'naropo toorai Pailatol kuudokaikono. “Burowo'nyo ma'no ma'nodo tov soka toolluno romiyoguroptowosumonyudeyo?” Kuudokaikono. Toro wuujuno sumaiyokwe kwolallo ton aki aiko te deko guurejuno adelowo'nugoulapogano. “A'mwo su toollu i'noguropte tovi domovoromiyoguroptowosono!” Adelowo'nugoulapogano.

¹⁵ Toro te Pailatol a'mwo kwolallo tonyu ilaiyo igollo'moneyokwe Barabasollu surolowapiyokaikono. Toro irolowapino sumaiyokwe Jisasollu wuulo tokwe agunyukuurumollupureyokweyo'mo a'mwo mollurogudo pworai amorubweyokaikono. Toro gunyukuurumolluno sumaveyokwe i'noguropte tovi nomovoromiyoguroptowosupino'moneyokwe amogaibworomokavlavoporogano.

A'mwo mollurogudo tooro Jisasollu burolyogalo kuudopo tovinokwono

¹⁶ Toro mogaibworomokavla'mno sumaveyokwe a'mwo mollurogudo tooro a'mwo aguto pwolluro agwapto toru'no Jisasollu amogaibworomokaulaporogano. Agwapto su toru'no yovo tov Puretooriyomovorukono. Toro mogaibworomokaulno sumaveyokwe a'mwo mollurogudo pworai deko doma'no sumaveyokwe yiuwi'nokai tooro su'bwo'noporogano.

¹⁷ Toro tooro youro kwallujo tokwe ibweyo'mno amodu'mago agabaiku'nyungiko tov Jisasolluro mido tovi kig pwolluro miguto to'busuko subweyoporogano.

¹⁸ Aki burolyogalo aro kuudoporogano. “Tarevono, Juu tooravuro a'mwo aguto kigoloo!”

¹⁹ Toro wuudo'mno burano tokwe gamoro mido tovi iwago romino yodupu ibupto uupu'dupu suduko kwinuguto'nyajuporogano.

²⁰ Buroloyogalo toro wuujuno sumaveyokwe a'mwo mollurogudo tooro youro kwallujo tov mogallurulopiyo'mno gami youro tov aki aiko te amollubweyoporogano. Toro tooro i'noguropte tovi movoromiyoguroptowoso'moneyokwe abomogaibworomokalokwoporogano.

Jisasollu i'noguropte tovi amovoromiyoguroptowosopo tovinokwono

²¹ Toro bomokalokwino sumaveyokwe toga a'mwo wagwolago Sairinida'ai bomwallo pwol womnago tomuuda'ai bo'no wagwolago Jeruusalem'no kuulabiyo'mo yoduke toollu abilluru'maroporogano. A'mwo su tool Aleksadaike Ruufoseke todorallu kuunumiyago Saimoonekono. Toro toollu a'mwo mollurogudo tooro Jisasolluro i'noguropte tov amokwanoneyokwe aduuwiyoporogano. Toro tool momwora'no sumaiyokwe amokwanokaikono.

²² Toruda'ai a'mwo mollurogudo tooro Jisasollu toro mogaibworomokavla'mno sumaveyokwe muumuudo Goolgoota'no ai'movoporogano. Yovo Goolgootaro tov nemi yogalo tovida'ai amollovodo'mwojajungiko tov aro'mokwono. Mibodopto to'busukorukoneyo'mokwono.

²³ Toro towai ki'mo'mno sumaveyokwe toga wain tov dado'mo marasin mur tokwe amolla'mo'nyungiko tov Jisasol anoneyokwe kwiyopo kuvi kuruv mamanokaikono.

²⁴ Toro wino sumaveyokwe toga a'mwo mollurogudo tooro gamoro youro tov mollurolopino sumaveyokwe Jisasollu i'noguropte tovi amovoromiyoguroptowosoporogano. Me'no movoromiyoguroptowosuno sumaveyokwe toga Jisasolluro youro ton mojuru'bworoso'mno gadool gadool marono'mdukoneyokwe tovino sumwonyo puruv soporogano.

²⁵ Toro tooro Jisasollu i'noguropte tovi amovoromiyoguroptowosopo su tov lomwo 9 kilook togakono.

²⁶ Aki toro tooro ipaiyo puusi aro sakwolloporogano. “A'mwo akal Juu tooravuro a'mwo aguto kig tookono.” Yogalo su tov Jisasollu kooti yogalo tovida'ai adomduukuurosopokwono. Toro tovi yakwolluno sumaveyokwe toga ipaiyo su toul Jisasolluro mido tovi muunyu toru aromiyouguuru'mwojosopokwono.

^27-28 Toro tooro Jisasollu me'no movoromiyoguroptowosuno sumaveyokwe toga a'mwo kuukokwe pworake'aro amovoromiyoguroptowosoporakono. Toro toorallu pwollu Jisasolluro anatomgu pwollu kwonamomgu amovoromiyoguroptowosoporakono.

²⁹ Toro toorallu me'no movoromiyoguroptowosuno sumaveyokwe a'mwo abolo pun puuto tovi plavo'mno Jisasollu nuuwoleyo'mo ton burolyogalo wuudodupu milgulgulo ajuwoleyajupogano. Toro ton aro ajuwoleyajupogano. “Aiyoo, Gooti toollu ilomoropiyo'moneyokwe ago tovi mouropiyo'bi iruko pullapullu guuwolo'nowo'ji toga aki aiko te mojokwe tookugono.

³⁰ Toro tooku guvnokweku wiyo'mwoju'no'bi i'noguropte tovida'ai doolabono!” Ajuwoleyajupogano.

³¹ Aki pris mido mollomwalokwe toorogai'aro loowo tovino pi'mwo kuudokwe toorogai'aro kworo kuruv Jisasolluno burolyogalo aro sajunoporogano. “A'mwo abolo punyu kwiyo'mwojajuko kwol kuruv gavnokwe toolluno'gwowi ku'nono mwiyo'mwoju'nonekono.

³² Tarevono, a'mwo akal Gooti toolluro wiyo'mwojo'moneyokwe ajesoka Krais su tool Isuraiyol tooravuro a'mwo aguto Kigekono. Toro tool i'noguropte tovida'ai aga neya wolabwono. Toro kwolabwo'ji toollu kwona'ji toga kuudo nokwo uubweyanekono.” Kevnokwe tooro toro sajunoporogano. Toro yajunodopure toga aki a'mwo Jisaseke amovoromiyoguroptowosopo su to kworal kuruv Jisasolluno burolyogalo adolorakono.

Jisasol yiuno'no aboloka tovinokwono

³³ Toruda'ai kuujunapto kuunodo toga yiuwi'nokai kwako tomuu dugumdo kimwonyopiyo'no kuujo sumdo pullapullu kuuwolo'nokakwono.

³⁴ Toro uuwolo'nyuno sumaiyokwe 3 kilook toga Jisasol deko guurejuno aro adokaikono. “Eloi Eloi lama sabaktani?” Yogalo su tovi amovodo'mwojajungiko tov aro'mokwono. “Mi Gootoloo, Mi Gootoloo, guu buro'nyo'mo donyugollu'mo'mwakuneyo'mokwono.”

³⁵ Toro doduke toga a'mwo abolo pun wobo toru adaiyajupo su ton wuu'no'mno adopogano. “Tarevono. Su tool Ilaijallu deko adoma'mwallo.”

³⁶ Toro wuujuno sumaveyokwe a'mwo pwol kano kano uuwo'no wonoweyo julo to'busuko puruv malluno sumaiyokwe wain puruv wuullomaiyo tovi juulovoma'no sumaiyokwe iko tovi'aro ikollutowoso'no Jisasol amwojanoneyokwe suluwopiyokaikono. Toro ilopino sumaiyokwe a'mwo su tool aro adokaikono. “Ilaijal a'mwo i'noguropte tovi wo'duke su toollu mokwolabwono'moneyokwe nobwonoldukono?” Toro juno sumaiyokwe adokaikono. “Nevu sogwollo kinowa'ji amuugonarano.” Adokaikono.

³⁷ Toruda'ai Jisasol deko guureji do'no yiuno'no abolokaikono.

³⁸ Toro aboloka kuga'gwo kuuno Gooti toollu ilomoropiyo'moneyokwe ago tovi anakuuto tomuu pwekwapto kuunodo toru'no youro kudo'aiko allukurosungiko tov akuuto toru'aro rojomokwolabo'no imgu amgu kworokakwono.

³⁹ Aki Jisasol nyaboloduke toollu a'mwo mollurogudo toorai mollubworomokwanyokwe pwol wobo toru amuugonadaiyajuko tool aro adokaikono. “Oo nebalo'mdeyo, akal Gooti toolluro Kwolaiyo kuunodo tookono.” Adokaikono.

⁴⁰ Aki toro toga abolo pun manyu toruda'ai amuugonallajupogano. Abolo su tonyuno yovo tov Makdalada'ai Mariyakwe'aro muugunyo Jemseke gadai'yago Jooseseke todorallu kuuneyago Mariyakwe'aro Saluumeyokwe'aro ton amuugonadaiyajupogano.

⁴¹ Abolo su ton sumdomgu Jisasol Galili toru yomolloduke toollu uumjuno'mno gami wosamujuko'mdeyo yovrowoso'mo ado'nuwiyajupogano. Abolo togai'aro aki abolo bwotonyago pugai'aro ton Jisasol Jeruusalem'no ilaboduke toollu uumjuno'mno sulabopogano. Toro ton Jisasol noboloduke toollu amuugonallajupogano.

Jisasol me'no aboloka toga gamoro kulako bwiyo tov a'mwo buuso puvi aulosopo tovinokwono

^42-43 Toruda'ai Jisasol me'no aboloka sulato toga Arimatiyada'ai a'mwo pwol Pailatollomno abokaikono. A'mwo su toolluno yovo tov Joosepolekono. Toro tool kaunsel pwekono. Aki a'mwo abolo punyu yovo kurukwe wimo'nodowodekono. Aki toro tool aguto kig Gooti toolluro mido mollomwalodowodo tov abai'mowo'ji tovino sogwollo kinodowodekono. Toro tool bino sumaiyokwe aro kuudo saurokaikono. Bi'ai Sabat bai'mowono tovino tov anuugwo toga yovrowoso'mo toga'deyo. Toro yau'no sumaiyokwe Pailatollu noullo'mo tovino luko miyo'no kwolluro sumdollu toru aulodavokaikono. Toro kuuloda'mno sumaiyokwe, “Jisasolluro bwiyo kulako tov nokwo nyabinekudeyo?” Auluudoganokaikono.

⁴⁴ Toro auluudoganoka tovi Pailatol wuu'no'no Jisasolluno tov, Yere abolmokaldukoneyokwe tovino kuudo sourukwapiyokaikono. Toro tool nebal'no abolmokaldukoneyokwe tovino yo'mgonomallo'moneyokwe a'mwo mollurogudo toorai mollubworomokwanyokwe pwollu domaro'no samuugojokaikono. “Jisasol me'no abolmokaldukono oo mabolmokaldukono?” Samuugojokaikono.

⁴⁵ Toro samuugojoka tovi a'mwo mollurogudo tooravuro mollubworomokwanyokwe tool Pailatollu aro kuudokaikono. “Me'no abolmokaikono.” Kuudokaikono. Toro kuudoka tovi Pailatol wuu'nyuno sumaiyokwe Joosepollu kuudokaikono. “A'mwo bwiyo toollu nokwo mokwanbinekugono.” Kuudokaikono.

⁴⁶ Joosepol plaino sumaiyokwe laplap wiya'jo puruv mubiyoma'no sumaiyokwe amokabokaikono. Toro mokabino sumaiyokwe a'mwo bwiyo tool i'noguropte tovi wo'duke toollu molovomwogapiyo'no laplap su tokwe amoweyomgurosokaikono. Toro tool a'mwo buuso puvi aulosokaikono. A'mwo buuso aulosoka su tov a'mwo tooro sulo tovi adovoloumjosungikokwono. Toro kuulosuno sumaiyokwe toga noullo tovi sulo bwotonyo pweke mogunyugolowoso'no amollukurosokaikono.

⁴⁷ Toro kuulomorosoduke toga Makdalada'ai Mariyakwe'aro Joosesollu ganeyago Mariyakwe'aro toval amuugonallajulovakono. Abolo su toval Jisasollu aulomorosopo su toru'no me'no kwonomarolovakono.