Mollurolovomato 8 - Gooti Toolluro Yogalokwono

Nabuulo tooro pwekwalo sumo'nopo tovinokwono

¹ Toruda'ai Gooti Yawel Moosesollu kuudokaikono. “Guu Feroo toollomno uuwo'bi aro duudono. “Gooti Yawel aro agudadopiyo. “Numoro a'mwo abolo ton mi ilomonuwopiyo'mo pla'mdopure tonyu guu wonyapino neya jono.”

² Toro agudumo tovi muu'nyubusuko yo'bi mirolowapibi tov nuu gumoro kantri tovi tabunyuwuulo tov aro gubwemekugono. Nabuulo tooro aiyowomno yo'mowopiyopi pwekwalo imo'nupinorogano.

³ Nabuulo tooro wonyo Nailovi aiyowomno yo'mowopiyopi aki gumoro ago tovi kuulapi gumoro sa wollo'mo tomuu kuullo'mowopipinorogano. Aki gumoro a'mwo womdo tovi mollomwalokwe toorogai'aro gumoro yiuwi'nokai a'mwo abolo togai'aro tonyuro ago tonyu noolapinorogano. Toro kuulapi kemoro doto yanyo'mo dukwagupto togai'aro dis togai'aro tonyu pwekwalo kuullumo'nopi kaiyako igolamopinorogano.

⁴ Aki nabuulo su tooro guuge'aro gumoro a'mwo womdo tovi mollomwalokwe toorogai'aro gumoro a'mwo abolo togai'aro togaikullu kemoro kulako tonyu bilomguu'mo'naikwopipinorogano.” Gooti Yawel toro agudadopiyo. Guu Feroo toollu uuwo'bi toro wuudubinekugono.” Kuudokaikono. Toro kuudoka tovi Moosesol Gooti Yawelluro kuuguudo su tov Feroo toollu kuvinono kuudokaikono. Toro kuvi kuruv Feroo su tool muu'nyubusuko to'no sokaikono.

⁵ Toro te Gooti Yawel Moosesollu kuudokaikono. “Guu Eroonollu duudono. “Gumoro yodeko tov momworaro'bi wonyo togai wonyo kuralo togai wonyo buugo togai tonyu judowosono. Toro subi tovi nabuulo tooro Ijupda'ai kwako tovi aiyowomno yo'mowopipinorogano.” Duudono.” Gooti Yawel toro kuudokaikono.

⁶ Toro te Eroonol gami yodeko tokwe momworaro'no Ijupda'ai wonyo tonyu sudowosokaikono. Toro idowosuno sumaiyokwe nabuulo tooro pwekwalo imo'no'mno kwako Ijup toru aiyowomno so'mowopiyoporogano.

⁷ Toro sumo'noka to'busuko kubalno Ijupda'ai a'mwo bulaptokwe kworo kuruv kevnokweravuro bula'yogalo sopo tovida'ai nabuulo tooro Ijupda'ai kwako tovi abillumo'noporogano.

⁸ Toruda'ai Feroo tool Mooseseke Erooneke todorallu doma'no sumaiyokwe aro kuudokaikono. “Nuuge'aro moro a'mwo abolo togai'aro tonolluda'ai nabuulo akarai modukwopiyono'moneyokwe kev todorakul Gooti Yawellu subusu'nyogalo neya duujulo. Toro kuudubullu toga nabuulo tooro anekugollu'mopi tov nuu a'mwo abolo ton Gooti Yawellu wiroudapiyo'mo pla'mdopure tonyu nokwo wonyapino imonyugono.” Kuudokaikono.

⁹ Toro wuujuno sumaiyokwe Moosesol Feroo toollu aro kuudokaikono. “Yowa'nogano. Gumoro iruko ajesubi toga nuu subusu'nyogalo nokwo wuudumonyugono. Guuge'aro gumoro a'mwo womdo tovi mollomwalokwe toorogai'aro gumoro a'mwo abolo togai'aro togaikullu ikullo'mwojo'mo subusu'nyogalo kuudumi toga nabuulo tooro kemi nekugollu'mopinorogano. Aki kemoro ago tonyu wuugollu'movopi toga yiuno wonyo Nailovino mwalpinorogano.” Kuudokaikono.

¹⁰ Toro kuudoka tovi Feroo tool kuudokaikono. “Guu bi'ai toga subusu'nyogalo neya duudono.” Toro kuudoka tovi Moosesol kuudokaikono. “Yowa'nogano, gumoro toro anyudumado kuvinono nyumonyugono. Toro sumi tovi'aro guu nemoro Gooti toolluno aro kuudo youroma'binekugono. Oo Gooti Yawelbusuko pwol nonagutomuudeyo. Toro kuudo yau'bino'moneyokwe nuu subusu'nyogalo nuudumonyugono.

¹¹ Toro kuudumi tovida'ai nabuulo tooro nekugollu'mopinorogano. Guuge'aro gumoro a'mwo womdo tovi mollomwalokwe toorogai'aro gumoro a'mwo abolo togai'aro aki kemoro ago kugai'aro togaikulluda'ai ikugollu'movopi yiuno wonyo Nailovino mwalpinorogano.” Kuudokaikono.

¹² Toruda'ai Mooseseke Erooneke todoral Feroo toollu wuugollu'mo'mno sumaleyokwe abolokwolorakono. Toro bolokwino sumaleyokwe Moosesol Gooti Yawellu subusu'nyogalo aro kuudokaikono. “Guu Feroo toollu nabuulo kuubweyodo su toorai domodukwopiyono.” Kuudokaikono.

¹³ Moosesol toro kuudoka tovi Gooti Yawel kuvinono kuumjunokaikono. Toro te nabuulo tooro ago togai agwapto togai womdo togai yiuwi'nokai su tomuu so'mowopiyopo tooro abolopiyoporogano.

¹⁴ Toro abolopiyopo toorai a'mwo Ijupda'ai tooro mollu'bworosuno sumaveyokwe nabuulo su tooro kwako su tovi aiyowomno buullujudo aunoporogano.

¹⁵ Toro te Feroo tool nabuulo tooro abolopiyopo toorai kwonokaikono. Toro wonyuno sumaiyokwe adokaikono. “Oo me'no dobolopigovo.” Toro juno sumaiyokwe gamoro poowokalago tov aki aiko te lumdo aulopiyokaikono. Toro kuulopino sumaiyokwe Mooseseke Erooneke todoralluro kuudolo tovi kaduko mwiyokaikono. Gooti Yawelluro me'no adoka su tovi Feroo tool kuvinono sokaikono.

Sumusuko pwekwalo sumo'nopo toorainokwono

¹⁶ Toruda'ai Gooti Yawel Moosesollu kuudokaikono. “Guu Eroonollu aro duudono. “Guu sullukwako tovi gumoro yodeko tokwe doromiyono. Toro aromibi toga yiuwi'nokai kwako Ijupda'ai sullukwako wo'dowodo tov sumusuko tooro imo'nupinorogano.” Toro duudono.” Kuudokaikono.

¹⁷ Toro te Mooseseke todoral kuvinono kuumjunolorakono. Toro uumjunolno Eroonol sullukwako tovi gamoro yodeko tokwe aromiyoka toga yiuwi'nokai Ijupda'ai sullukwako tov sumusuko sumo'noporogano. Toro imo'no'mno sumusuko su tooro a'mwo abolo togai'aro yiuwi'nokai ibesa'aiyo toorogai'aro tonyu bwosomaro'mno tuko adeyajuporogano.

¹⁸ Aki Ijupda'ai a'mwo bulaptokwe kworo kuruv kevnokweravuro bula'yogalo tokwe sumusuko gabovo pwekwalo pworo imo'nupureyokwe yamju kwiyoganoporogano. Toro kwiyoganopo kuvi kuruv ku'nono mimo'noporogano. Toro te Gooti toolluro sumusuko sumo'nopo tooro a'mwo abolo togai'aro yiuwi'nokai ibesa'aiyo toorogai'aro tonyu bwosomaro'mno tuko adeyajuporogano.

¹⁹ Toro do'mdopure tovi Ijupda'ai a'mwo bulaptokwe tooro wonyuno sumaveyokwe Feroo toollu kuudoporogano. “Oo Gooti toolluro ato tovida'ai sumo'nadopiyo.” Toro kuudopo kuvi kuruv Feroo tool gamoro poowokalago lumdo aulopingikekono. Toro toolluno tov Mooseseke todorallu kaduko mwiyokaikono. Gooti Yawelluro me'no adoka su tovi Feroo tool kuvinono sokaikono.

Lu'gwolamdo sumo'noka toorainokwono

²⁰ Toruda'ai Gooti Yawel Moosesollu kuudokaikono. “Guu bi'ai lomwo iru'mago toga Feroo tool wonyo Nailovino wolodowo'jure toollu guu wuuru'maro'bi aro duudono. “Gooti Yawel agudadopiyo. “Moro a'mwo abolo ton mi ilomonuwopiyo'mo pla'mdopure tonyu guu wonyapino neya jono.

²¹ Toro tonyu guu mwonyapibi tov nuu lu'gwolamdo pwekwalo toorai nomekwopiyamonyugono. Guuge'aro gumoro a'mwo womdo tovi mollomwalokwe toorogai'aro gumoro a'mwo abolo togai'aro togaikullu aikubwemi toga kemoro ago tonyu kuulapinorogano. Aki yiuwi'nokai Ijupda'ai a'mwo abolo togaikulluro ago kunyu kuruv kuulapi anakuuto tomuu pwekwalo kuullumo'nupinorogano. Kemoro yiuwi'nokai kwako tovi su toro imo'nupinorogano.

²² Toro kuvi kuruv moro a'mwo abolo ton Goosen toru amwakopo tonyuno'gwowi momuudeyomwallo'mi lu'gwolamdo tooro mamorapimonyugono. Toro tovi wono'bi guu aro kuudo yanuu'binekugono, Oo Gooti Yawel moro kwako akaru domwallo, kuudo yanuu'binekugono.

²³ Toro sumo'no'ji toga gumoro a'mwo abolo tonyu tabunyuwuulo nuubwemonyugono. Toro kwonyu kuruv moro a'mwo abolo tonyuno'gwowi tabunyuwuulo su tovi nomapiyokwe nomomuudeyomwallumonyugono. Duuwallo jurogudo su tov bi'ai toga imo'nonokwono.” Gooti Yawel toro agudadopiyo.” Feroo toollu duudono.” Kuudokaikono.

²⁴ Toro wuujuno sumaiyokwe Gooti Yawel kuvinono sokaikono. Toro te lu'gwolamdo pwekwalo bwotonyo imo'no'mno Feroo tooke'aro gamoro a'mwo womdo tovi mollomwalokwe toorogai'aro tooravuro ago tonyu aullo'mowopiyoporogano. Lu'gwolamdo pwekwalo toro imo'nyuno sumaveyokwe kwako Ijup toru aiyowomno kaiyako sounapiyoporogano.

²⁵ Toro te Feroo tool Mooseseke Erooneke todorallu doma'no sumaiyokwe aro kuudokaikono. “Kevu kemi Gooti toollu wiroudapiyo'moneyokwe nokwo plapinogaikikono. Toro kugaikul kuruv kwako Ijup akavi kwa'mgu tomuu mabolokuupinogaikikono.”

²⁶ Toro kuudoka kuvi kuruv Moosesol kuudokaikono. “Awiyo, nevu su toro ku'nono miyanonogano. Nevu Ijupda'ai ton muugonanekwo'dopure toga nemi Gooti Yawellu wiroudapiyodowa'jure tonyuno kwoda'molo sumdo nekullopi sulo togai noluvoromiyanekubwepiyo.

²⁷ Toro te nemi Gooti toolluro me'no adanekulloka tovino to'no uumjunanonogano. Toro tonol iruko pullapullu tobuullu plavowa'ji kwako a'mwomaiyo kuu'maiyo toru ki'movowa'ji nemi Gooti Yawello'mo wiroudapiyanonogano.”

²⁸ Moosesol toro kuudoka tovi Feroo tool kuudokaikono. “Kevu kemi Gooti Yawellu wiroudapiyo'mo kwako a'mwomaiyo kuu'maiyo toru'no nokwo plapinogaikikono. Toro kugaikul kuruv manyu tomuuno mavlapinogaikikono. Toro te kev todorakul mi nyo'mwojo'mo Gooti Yawellu subusu'nyogalo duujulo.” Kuudokaikono.

²⁹ Toro kuudoka tovi Moosesol aro kuudokaikono. “Nuu aga toga bolokwo'mi Gooti Yawellu subusu'nyogalo nuudumonyugono. Toro kuudumi tovi bi'ai lu'gwolamdo tooro guuge'aro gumoro a'mwo womdo tovi mollomwalokwe toorogai'aro gumoro a'mwo abolo togai'aro togaikulluda'ai nekugollu'mokavlapinorogano. Toro gujo'mwojodo'mure kuvi kuruv guu Feroo tooku aki aiko te kuunano nyoukuu'nanekudubiyo. Aki nevu Gooti Yawellu wiroudapiyo'mo pla'mdowa'jure tonollu puuto tovi nonekumjuku'biyo.”

³⁰ Moosesol toro wuujuno sumaiyokwe Feroo toollu buugollu'mokalokwino sumaiyokwe Gooti Yawellu subusu'nyogalo kuudokaikono.

³¹ Moosesolluro toro kuudoka tovi Gooti Yawel kuvinono uumjuno'no yiuwi'nokai lu'gwolamdo pwekwalo sumo'nopo toorai amodukwopiyokaikono. Feroo tooke'aro gamoro a'mwo womdo tovi mollomwalokwe toorogai'aro gamoro a'mwo abolo togai'aro tonyu lu'gwolamdo tooro wuugollu'movo'mno yiunokuudo avlavoporogano. Toro avlavopo toga'no'gwowi lu'gwolamdo pwolnodo kwol kuruv mworoporogano.

³² Toro sumo'noka kuvi kuruv Feroo tool gamoro poowokalago tov lumdo aki aiko te kuulopiyo'no Isuraiyolda'ai a'mwo abolo tonyu mirolowapiyokaikono.