Mollurolovomato 40 - Gooti Toolluro Yogalokwono

Yiuwi'nokai ton me'no yogwoloso'mno sel ago tov amodopo tovinokwono

¹⁷ Isuraiyolda'ai ton Ijupda'ai me'no wuugollu'mokabino sumaveyokwe puuto tomuu kuuno mujo'mabodopure tov kworomo pullu kuuwolo'nokagano. Toro uuwolo'nyuno sumaiyokwe kworomo pullal kuuwolo'noka togasuro lobako muudu'nodo toolluro iruko muudu'nodo toga Gooti toollu ilomoropiyo'moneyokwe sel ago tov kuvinono amodoporogano.

¹⁸ Mooseseke tooro sel ago su tovi aro samodoporogano. Silva tovida'ai anyutu'buuso sakwollungiko ton kwako tovi kuudapiyoporogano. Toro kuudapiyopo tovi muunyu toru anyutuko togai'aro kuuruko'mo i'buukuu'nolluko togai'aro ton kuudapiyoporogano. Toro wuudapino sumaveyokwe kuuruko tonyu guureji gudupolallo'moneyokwe iko pullugwo moga'bworoso'mno aguropolagulloporogano. Toro guropolagulluno sumaveyokwe ago tovi anakuuto tomuu anyutuko pun aulomuulludapiyoporogano.

¹⁹ Toro wuudapino sumaveyokwe muunyu tomuu roguroso'mo tov sel puusake arogurosoporogano. Sel su tousal puul kwako tomuu woloroguroso'mno puul muunyu toru sulorogurosoporogano. Gooti Yawelluro Moosesollu me'no kuudoka tovi uumjuno'mno sel ago su tov kuvinono samodoporogano.

²⁰ Sel ago su tov me'no modosuno sumaveyokwe atousal loowokwe sulbweko tooral maro'mno Subuu'yamjo'mo Bookis tovi anakuuto tomuu amollurosoporogano. Aki bookis su tovi ikwovomokavlaiyo'moneyokwe iko pullal imgu amgu alomjosungiko tovallu'aro auluuloukuulopiyaporogano. Aki bwososo'mo atallo tov bookis tovi muunyu toru sulobwososoporogano.

²¹ Toro bwososuno sumaveyokwe Subuu'yamjo'mo Bookis tov sel ago tovi anakuuto tomuu mokaula'mno bookis su tovi yiulo kuulopuuroso'moneyokwe youro kudo'aiko tov allukurosoporogano. Gooti Yawelluro Moosesollu kuudoka su tovi kuvinono soporogano.

²² Toro ino sumaveyokwe bret woso'moneyokwe noluuleyo tov sel ago tovino mokaulno sumaveyokwe youro kudo'aiko allukurosungiko tovi kwa'mgu toru yiuno noot tomgu aulludapiyoporogano.

²³ Aki Gooti toolluro sumdo tovi bret tov noluuleyo su tovi muunyu toru sulosoporogano. Gooti Yawelluro Moosesollu me'no kuudoka kuvinono toro soporogano.

²⁴ Aki gworeko gudupolallo'moneyokwe tov sel ago tovino mokaula'mno youro kudo'aiko allukurosungiko tovi kwa'mgu toru yiuno saut tomgu aulludapiyoporogano. Toro me'no kuulludapino sumaveyokwe gworeko su tov noluuleyo tovi imuugu toru adaiyajukokwono.

²⁵ Gworeko su tov Gooti toolluro sumdo tovi toro da'mduke toga gamoro yiuwi'nokai pilato tonyu duko tokwe alumuugutovoporogano. Gooti Yawelluro Moosesollu me'no kuudoka su tovi kuvinono soporogano.

²⁶ Toro ino sumaveyokwe wobeya sudokwe tovi iroudapiyo'moneyokwe dukwagupto puruv gool tovida'ai sakwollungiko tovi sel ago tovino mokaula'mno youro kudo'aiko allukurosungiko tovi kwa'mgu sumdollu toru aulludapiyoporogano.

²⁷ Toro kuulludapino sumaveyokwe wobeya sudo kuunyokwe pun dukwagupto su tovi muunyu toru iroudapiyo'mno juto tov muunyu tomuuno amokailokakwono. Gooti Yawelluro Moosesollu me'no kuudoka su tovi kuvinono soporogano.

²⁸ Toro ino sumaveyokwe sel anoullo tovi youro kudo'aiko purukwe allukurosoporogano.

²⁹ Aki sel ago tovi kwa'mgu noullo tovi sumdollu toru romiroudapiyo'moneyokwe dukwagupto puruv kwosoporogano. Dukwagupto kwosopo su tovi muunyu toru duko tov yiunokuudo nopiyo'moneyokwe pworai romiroudapiyo'mno aki wit pugai'aro kwiroudapiyoporogano. Gooti Yawelluro Moosesollu me'no kuudoka su tovi kuvinono soporogano.

³⁰ Toro ino sumaveyokwe romiroudapiyo'moneyokwe dukwagupto tokwe'aro sel ago tokwe'aro tovalluro akuuto toru wonyo yal'mo'nyo'moneyokwe dis tov kwosoporogano. Toro wosuno sumaveyokwe wonyo tokwe suremowosajuporogano.

³¹ Toro iremowosodopure tovi Mooseseke'aro Erooneke'aro Eroonolluro muugunyo toorogai'aro tooro kemi suvlato ton sal'mo'nyajuporogano.

³² Toro tooro sel ago tovino kuullo'morodeyo oo romiroudapiyo'moneyokwe dukwagupto toru'no biyo'morodeyokwe toga kemi suvlato ton toro sal'mo'nyajuporogano. Gooti Yawelluro Moosesollu me'no kuudoka su tovi kuvinono soporogano.

³³ Aki romiroudapiyo'mo dukwagupto su tokwe'aro sel agwapto toruke'aro aiyowomno toru youro tokwe kuurupto airogabolosoporogano. Toro kirogaboloso'mno noullo tovi youro kudo'aiko tokwe allukurosoporogano. Mooseseke'aro Isuraiyolda'ai a'mwo toorogai'aro tooro sel ago su tovi mojo'mo womdo tov yiuwi'nokai ton kuvinono sopiyoporogano.

Sulu'wo tov Gooti toollu ilomoropiyo'moneyokwe sel ago tovi muunyu toru kwollajuko tovinokwono

³⁴ Toro amodopiyopo toga sulu'wo tov Gooti Yawellu ilomoropiyo'moneyokwe sel ago tovi bwolobu'duvoloma'no sumaiyokwe gamoro bako bwotonyo tov sel ago tovi anakuuto tomuu auloowopiyokakwono.

³⁵ Toro sumo'noka toga Moosesol sel ago tovi ku'nono maulokaikono. Gooti Yawelluro sulu'wo bwotonyo abwolobu'duvolomaroka tokwe'aro bako bwotonyo pwopiyoduke tokwe'aro tovalluno tov Moosesol sel ago tovi ku'nono maulokaikono.

³⁶ Su toro togada'ai Isuraiyolda'ai ton aro amjumovlaiyajupogano. Sulu'wo tov Gooti Yawellu ilomoropiyo'moneyokwe sel ago tovi wuugollu'mowo'ji muunyu toru bilodowo'jure tovi kwonpi toga a'mwo abolo kun kuruv kwako su toruda'ai wuugollu'mo'mdupu kwako muuduko puru'no avlaiyajupogano.

³⁷ Toro te Isuraiyolda'ai ton yiuno sulu'wo tov pla'mdowo'jure toga'no avlaiyajupogano. Toro kun kuruv sulu'wo tov sel ago tovi muunyu toru nokwo wolluno yodowo'jure kwonpi toga'no'gwowi a'mwo abolo kun kuruv mavlaiyajupogano. Nokwo mwalno sajupogano.

³⁸ Toro te yiuwi'nokai iruko toga Isuraiyolda'ai a'mwo abolo su ton Gooti Yawelluro sulu'wo tov sel ago tovi muunyu toru wo'duke tovi kwonyajupogano. Aki surakuuto toga du'wiyo bwotonyo tov sulu'wo akuuto tomuuda'ai pwopiyoduke tovi kwonyajupogano. Isuraiyolda'ai go'no go'no iko tovasuda'ai a'mwo abolo su ton Gooti Yawelluro sulu'wo tokwe'aro du'wiyo pwopiyoduke tokwe'aro tovallu tono tono kuumjungovlaiyajupogano.