Mollurolovomato 25 - Gooti Toolluro Yogalokwono

Gooti tool gamoro sel ago tovi mojo'moneyokwe, “Kuto ivito pun domollu'bworosulo,” kuudoka tovinokwono

¹ Toruda'ai Gooti Yawel Moosesollu aro kuudokaikono.

² “Guu Isuraiyolda'ai tonyu wuudo'bi kemoro noonyumwonyu sugudo pun mi nyabiyo'moneyokwe amollu'bworosupuro. A'mwo abolo pwolno puru'monodo ton kemi poowokalago kuunodo tokwe mi nyabiyo'mo kwinpi tonyuro buro'nyo buro'nyodeyo agujabupi ton domollu'bworosono.

³ A'mwo abolo ton miyo'mo aro ton nyabupinogano. Gool togai'aro silva togai'aro aiyon sallukwa'jo togai'aro tonyu domollu'bworosono.

⁴ Aki sillo gwagwajo togai'aro kwabi'muullujo togai'aro muja'jo togai'aro youro sugumaluko tousogai'aro meme ato togai'aro tonyu domollu'bworosono.

⁵ Aki sipsip kwolo tooravuro kulako kuulairowimwojodupudo togai'aro ibesa'aiyo pworavuro kulako sugudo togai'aro iko akesiyo nollume togai'aro tonyu domollu'bworosono.

⁶ Aki gworeko muuguteyo'mo munyupto togai'aro wobeya sudo kuunyokwe togai'aro tonyu domollu'bworosono. Wobeya sudo kuunyokwe su ton pun jeso'moneyokwe oolip munyupto pugai molla'meyo'mokwono. Aki pun duko tovi iroudapiyopiyo'mokwono. Toro suroudapipi toga wobeya sudokwe juto tov muunyu kai'muuno mokailmwolawonokwono. Toro yo'mo tonyu guu domollu'bworosono.

⁷ Aki sulo sugumaluko togai'aro go'no go'nodo sulo sugumaluko pullovo nuugwiyo bwotonyo biyodupudo tollovogai'aro domollu'bworosono. Sulo su tollovo pun pris aguto tooravuro youro sugudo tonyu woso'moneyokweyollovogano. Aki pun pris aguto tooravuro kupolmdo toru yesodupudo tovi woso'moneyokweyollovogano. Toro tonyu mollu'bworo'bi domorosono.

⁸ Tono tono amollu'bworosubi su togai Isuraiyolda'ai ton ilomonuwopiyo'moneyokwe sel ago puruv amodupuro. Su tov aro tovinokwono. Sel ago su tovi nuu kevuge bwolomwalmonyugono.

⁹ Sel ago su tokwe'aro yiuwi'nokai anakuuto tomuu kuularono togai'aro tonyu moro aikuduwallumi tovi uumjunopi kuvinono yakwollupinorekikono.”

Subuu'yamjo'mo Bookis tovino kuuguudokwono

¹⁰ “Toro toorekul iko akesiyo nollume tokwe bookis puruv yakwollopinorekikono. Bookis su tovuro kumiko tomgu 110 sentimita toru'aro wosupinorekikono. Aki gamoro supto ga'bworosi tomgu 66 sentimita wosupinorekikono. Aki gamoro ido'nyu illumoudapi tomgu 66 sentimita wosupinorekikono.

¹¹ Bookis su tov me'no yokwollopiyopi gool sugudo kuunodo tokwe yiuwi'nokai anakuuto tomgu'aro kwa'mgu tomgu'aro aiyowomno woso'mowopipinorekikono. Aki gamoro bullo tonyu yiuno gool tokwe to'no luvomuugutowopipinorekikono.”

************ Subuu'yamjo'mo Bookis tovi bwososo'mo atallo tovinokwono

¹⁷ “Bookis tovi toro yakwollo'bi aki gool sugudo kuunodo tokwe bwososo'mo atallo puruv yakwollubinekugono. Toro tovi yakwollo'moneyokwe gamoro kumiko ga'bworosi tomgu 110 sentimita wosubinekugono. Aki gamoro ga'bwollo supto tomgu 66 sentimita wosubinekugono.

^18-19 Bwososo'mo atallo su tov gool tokwe sakwollubi toga seruubim ensel pworake yokwolludapibinekugono. Toro yokwolludapiyo'bi toga atallo su tokwe'aro ensel toorake'aro tonyu judo'no judo'no miyakwollubinono. Toro kuvi kuruv yiuwi'nokai atallo tokwe'aro seruubim ensel toorake'aro tonyu yiuno avalo puru'monodo tovi'aro jakwollono. Aki guu gool yiuno puru'monodo tovida'ai hama tokwe romiyodukweyoso'bi sakwollubi ton yiuno puru'mono imo'nonokwono. Toro sakwollubi tovi ensel pwol atallo tovuro do'gwapiyo pumgu dawonekono. Aki ensel gabovo pwol atallo tovuro do'gwapiyo pumgu dawonekono.

²⁰ Seruubim ensel sokwolludapibi su tooral kemoro sumdomago tov imgu amgu yenyunomwalo'bullu kemoro sumdo tov bwososo'mo atallo tovi muugona'mwalbullunorakono. Aki kemoro puviyo ton bwososo'mo atallo tovi muunyu toru'aro yomwora'do'bullure toga puviyo su tonyuro du'gurolo tov bwososo'mo atallo tovi bu'duvoloma'mwalonokwono.

²¹ Toro me'no sakwollubi toga moro loowokwe sulbweko agujami tovallu bookis tovi anakuuto tomuu irosubinokwono. Toro iroso'bi toga bookis tovi muunyu toru bwososo'mo atallo tokwe bwososubinekugono.

²² Toro te bookis tovuro bwososo'mo atallo su tovi muunyu toru nuu kemi bwolekuru'ma'monyugono. Toro toonyu seruubim ensel tooralluro akuuto toru mwalo'mi moro loowo tonyu Isuraiyolda'ai a'mwo abolo ton uumjunpino'moneyokwe dagubwemonyugono.”

Gooti tool gamiyo'mo bret tovi iloso'mo, “Noluuleyo puruv jakwollono,” kuudoka tovinokwono

²³ “Aki guu akesiyo i'buukuu'nolluko puuso maro'bi noluuleyo puruv yakwollubinekugono. Noluuleyo su tovi yakwollo'moneyokwe gamoro kumiko ga'bworosi tomgu 88 sentimita wosubinekugono. Aki gamoro supto ga'bworosi tomgu 44 sentimita wosubinekugono. Yo'bi gamoro ido'nyu illumoudapi tov 66 sentimita wosubinekugono.”

************

³⁰ “Noluuleyo su toro sokwollosubi tovi muunyu toru bret tov julosogaulo. Bret su tov nuu kevuge mwalodumdo tovino duuwallo'mokwono. Toro tovi wosopi yiuwi'nokai toga moro mwalodumdo sumdollu toru'no neya wo'mwalonokwono.”

Gworeko gudupolallo'moneyokwe tovino kuuguudokwono

³¹ “Aki gool sugudo kuunodo pun maro'bi gworeko gudupolallo'moneyokwe puruv yakwollubinekugono. Toro tovi sakwollubi toga tugo tokwe'aro yogudo tokwe'aro yakwollubinekugono. Aki yogudo tovida'ai pilato pugai'aro imo'nyo'mo romiyodukweyosubinekugono. Toro aromiyodukweyosubi pilato su tonyu mekwapwopto to'busuko kula'noka pun yokwollosubinekugono. Aki toro sokwollosubi toga munyuto munyutopto nyakwollubiyo. Yiuno avalo puru'monodo tovi'aro neya jakwollono.

³² Gworeko gudupolallo'moneyokwe su tov 6-pela pilato tokwe neya yakwollubinekugono. Toro tov pumgu puruvapuruv pumgu puruvapuruv woronokwono.”