Mollurolovomato 24 - Gooti Toolluro Yogalokwono

Moosesol muumuudo Sainai toollu suloka tovinokwono.

¹² Toruda'ai Gooti Yawel Moosesollu aro kuudokaikono. “Guu muumuudo toollu miyomno ilabo'bi mino sogwollo bilainyunogawono. Toro bilainyunodo'bure toga nuu moro loowokwe sulbweko toval gujamonyugono. Loowo su ton a'mwo abolo tonyu yodubwaso'moneyokwe sulbweko tovallu sakwollo tov gujamonyugono.” Kuudokaikono.

¹³ Gooti Yawel toro wuujuno sumaiyokwe Moosesol gami womdokwe Joosuuwallu momwora'no sumaiyokwe Gooti tool mwaloduke muumuudo toollomno amokailokaikono.

¹⁴ Moosesol muumuudo toollomno illo'mo wobo toga Isuraiyolda'ai a'mwono moduvomwallokwe toorai aro kuudokaikono. “Kevu akawai mwalopi namino sogwollo donakinogaulo. Navu muumuudo toollu illogalowosi aikomgu noolabwosunonakono. Aki kevu akawai mwalodopure toga Erooneke Huureke tooral kevuge mwalodubullunorakono. Toro mwalodo'bullure toga a'mwo abolo kooti yogalokweyonoldeyo adupi ton a'mwo su toorallu nokwo bwonumwalpinogano.” Kuudokaikono.

¹⁵ Moosesol toro me'no wuujuno sumaiyokwe toga muumuudo toollomno sulokaikono. Toro iloduke toga muumuudo su toollu sulu'wo tov aiyowomno abwolobu'duvolomarokakwono.

^16-17 Aki Gooti Yawelluro bako bwotonyo tov muumuudo Sainai su toollu muunyu toru abwolowopiyokakwono. Toro bwolowopiyoduke tovi Isuraiyolda'ai a'mwo abolo ton widuko to'busuko nugovla'mduke tovi kwonopogano. Aki sulu'wo abwolobu'duvolomaroka su tov 6-pela iruko tobuul kuuwolo'nokakwono. Toro uuwolo'nyuno sumaiyokwe iruko naba 7 tollugwoji Gooti Yawel sulu'wo tovi anakuuto tomuuda'ai Moosesollu deko adomarokaikono.

¹⁸ Toro adomaroka tovi Moosesol muumuudo toollu ilno sumaiyokwe sulu'wo tovi akuuto tomuu aulopuuropiyokaikono. Toro tool muumuudo toollu mwalno sumaiyokwe iruko 40-pela tobuuke'aro surakuuto 40-pela tobuuke'aro tobuul kuuwolo'nokaikono.