Mollurolovomato 19 - Gooti Toolluro Yogalokwono

Isuraiyolda'ai ton muumuudo Sainai toollu dolago tomuu abomwalopo tovinokwono

^1-2 To'no'gwowi Isuraiyolda'ai ton kwako Refidim toru kuugollu'movopogano. Toro wuugollu'mo'mno sumaveyokwe plavo'mno muumuudo Sainai toolluro kwako a'mwomaiyo kuu'maiyo toru abai'movopogano. Toro bai'mo'mno sumaveyokwe kemi woromollo'mo sel ago ton muumuudo Sainai toollu dolago tomuu amodopogano. Isuraiyolda'ai a'mwo abolo su tonyuro kado abiyajupo tov arokwono. Kwako Ijupda'ai me'no wuugollu'mokabino sumaveyokwe lobako naba 3 toolluro iruko naba 1 tollugwoji abai'movopogano.

³ Toro bai'mo'mno sumaveyokwe Moosesol Gooti toollu wuuru'mallo'moneyokwe muumuudo Sainai toollu sulokaikono. Toro ilno sumaiyokwe Gooti Yawel muumuudo toollu muunyu tomuuda'ai Moosesollu aro kuudokaikono. “Moro kuuguudo agudumi akav Jekoopolluro kwikweyago Isuraiyolda'ai tonyu neya duudono.

⁴ “Nuu Gooti Yawenyu kemi miyomno mollurolovekumokabiyo'moneyokwe Ijupda'ai toorai kaiyako igolodore tovi me'no kwonopogaikikono. Toro amollurolovekumokabo tov aro to'busukokwono. Bwajo tooro kemi taiyo tonyu puviyo te muunyu toru ilomorosopi mokavla'mdupudo to'busuko kubalno kemi miyomno amollurolovekumokabonyugono.

⁵ Toro tovino tov aga kevu moro yogalo ikudodo'mure togai'aro moro subuu'yamju togai'aro tonyu kaduko yopi mi anumjunpi tov moro a'mwo abolo kuunodo imo'nupinogaikikono. Yiuwi'nokai a'mwo abolo kwako akavi mwalodupudo ton morogano. Toro kuvi kuruv kevu mi anumjunpi togaikulluno'gwowi moro kuu'dello nyumo'nupinogaikikono.

⁶ Aki toro anumjunpi togaikul yiuno mi dolago tomuu mwalopi pris toorobusuko moro a'mwo abolo kuunodo nyumo'numwalpinogaikikono.” Guu Isuraiyolda'ai tonyu su toro neya duudono.” Kuudokaikono.

⁷ Gooti Yawel toro wuujuno sumaiyokwe Moosesol muumuudo toolluda'ai wolabo'no Isuraiyolda'ai mido mollomwalokwe toorai doma'no sumaiyokwe Gooti Yawelluro yiuwi'nokai kuuguudo kwiyoka su ton kuudokaikono.

⁸ Toro kuudoka tovi yiuwi'nokai a'mwo abolo ton wuu'no'mno aro adelowo'naropogano. “Yowa'noganoo, yiuwi'nokai Gooti Yawelluro kuuguudo anekudumoka su ton kuvinono uumjunmwalanonogano.” Adopogano. Toro te Moosesol a'mwo abolo tonyuro toro adopo tokwe momworaro'no Gooti Yawellu suluudokaikono.

⁹ Toro suluudoka tovi Gooti Yawel Moosesollu aro kuudokaikono. “Nuu gumi kuuguudo gudodo'mure tovi Isuraiyolda'ai ton wuu'nupino'moneyokwe nuu sulu'wo illuvolopinodo tovi'aro wolamonyugono. Toro toonyuro yogaimaguurai gudodo'mure tovi kuu'nupi toga gumino aro kuudo gubwemovla'mwalpinogano. Oo su tool nebal'nodoldeyo. Yiunokuudo gubwemovla'mwalpinogano.” Kuudokaikono. Toro wuujuno sumaiyokwe Moosesol Gooti Yawellu a'mwo abolo tonyuro kuudopo tovi aki aiko te kuudokaikono.

¹⁰ Toro kuudoka tovi Gooti Yawel Moosesollu kuudokaikono. “Guu wola'bi a'mwo abolo tonyu aro tovino duudono. Mi ilomonuwopiyo'moneyokwe kemoro poowokalago ton neya yovraimwonyupuro. Aki kemoro youro ton neya yol'mowosupuro. Anuugwo togake'aro bi'ai togake'aro toga neya yovrowosunpinogano. Duudono.

¹¹ Nuu Gooti Yawel toonyu allu toga muumuudo Sainai toollu wolabodo'mure tovi a'mwo abolo ton muugonanuwopino tovino tov neya yovrowosunpuro.

¹² Aki muumuudo akallu babo tov aiyowomno derogabolosulo. Toro kirogabolosopi guu duudapi yogalo aro duuwiyono. “Kevu wako neya kuu'nupinogaikikono. Kevu muumuudo akallu milabupinogaikikono. Aki wobo toru maulabupinogaikikono. Toro te a'mwo pwol muumuudo akallu wobo toru aboullomollo'ji toollu neya romiyosupinekono.

¹³ Kevu a'mwo su toollu ato nuubogai'nupiyokweyo'mo tov yiuno sulo'mdeyo oo iroka'mdeyo tokwe doromiyosulo. Yiuwi'nokai a'mwo abolodeyo oo ibesa'aiyorodeyo kworo kuruv muumuudo toollu wobo toru abai'mopi toorai doromiyosulo.” Toro duuwiyono. Toro kuvi kuruv a'mwo pwol biugel tovi pwo'mi muujudo airapiyo'ji tov kuuno ki'nugovla'mdowo'jure tovi kuu'nupi toga'no'gwowi kevu babo tovi wobo toru'no nokwo bupinogaikikono.” Kuudokaikono.

¹⁴ Toruda'ai Moosesol muumuudo toollu wolabino sumaiyokwe a'mwo abolo tonyu abwoluudokaikono. “Kevu Gooti toollu ilomoropiyo'moneyokwe kemoro poowokalago ton neya jovraimwonyulo.” Kuudokaikono. Toro kuudoka tovi kuvinono uumjuno'mno kemi youro togai'aro yal'movo'mno sovrowosunopogano.

¹⁵ Aki Moosesol aro kuudokaikono. “Kevu iruko naba 3 tollugwojuno sogwollo kinopi anuugwo togake'aro bi'ai togake'aro su toga neya jovrowosunyulo. Toro yovrowosunopi toga kemi abolo togai mamollapinorekikono.” Kuudokaikono.

¹⁶ Toro te iruko naba 3 tollugwoji lomwo toga muumuudo toollu sulu'wo illuvolopinodo tov abwolobu'duvolomarokakwono. Aki molamopto tokwe'aro kuuloulo tokwe'aro imo'no'no biugel tov guureji kuunodo ai'nokakwono. Toro te Isuraiyolda'ai ton kemi woromollo'mo sel ago towaida'ai wonyuno sumaveyokwe biugel tovuro guureji ki'noduke tovi wuu'no'mno luko bu'buto sopogano.

¹⁷ Toro yodopure tonyu Moosesol kemi woromollo'mo sel ago towaida'ai bomokalokwo'no Gooti toollu buuru'mallo'moneyokwe muumuudo toolluro aiyowo'mo do'gwapiyo toru mokabino sumaiyokwe abodavopogano.

¹⁸ Toro da'mdopure toga Gooti Yawel du'wiyo puvi anakuuto tomuu kuulomwalno sumaiyokwe muumuudo Sainai toollu abwolomwalokaikono. Toro abwolomwaloka tovino tov muumuudo toollu aiyowomno tomuu juto bwotonyo tokwe abu'duvolomarokakwono. Juto su tov sul'duko iro'mdupu juto bwotonyo bilodawodo to'busukokwono. Toro bu'duvoloma'no sumaiyokwe wunyu wunyu bwotonyo tov yo'no muumuudo tool aiyowomno yaudo yaudo sunuugwokaikono.

¹⁹ Toro inuugwoduke toga aki biugel tovuro deko tov muunyu toru'aro guureji ki'nugobino ki'nugobino sokakwono. Toro ki'nugoboduke toga Moosesol Gooti tooke kuuguudo ajajulorakono. Moosesol kuuguudo wuudoduke toga Gooti tool gamoro yogaimaguurai tov kuuloulo to'busuko Moosesollu kuujajukekono.

²⁰ Toro te Gooti Yawel wolabo'no muumuudo Sainai toollu muunyu toru bwolomwalno sumaiyokwe Moosesollu ilabwoneyokweyo'mo adomarokaikono. Toro adomaroka tovi Moosesol muumuudo toollu sulokaikono.

²¹ Toro ilno sumaiyokwe Gooti Yawel Moosesollu aro kuudokaikono. “A'mwo abolo mi nuwonyo'mo kwinpi ton babo tovi nuuwolokaulabupiyokweyo'mo guu duudapi yogalo dooluuwiyono. Toro kuvi kuruv pun babo tovi kuuwolokaulabupi to'gwowi bwotonyago ton nobolpinogano.

²² Aki pris pworo nuu Gooti Yawel toonyu wobo toru kuulabiyo'mo kwinpi kworo kuruv kemoro poowokalago ton po'dogalo neya yovraimwonyupinorogano. Me'no sovraimwonyupi to'gwowi nokwo kuulabupinorogano. Toro kworo kuruv po'dogalo miyovraimwonyopi aulabupi tooraino'gwowi nuu Gooti Yawel toonyu nomovagu'mwojumorogano.” Kuudokaikono.

²³ Gooti Yawel toro kuudoka tovi Moosesol aro kuudokaikono. “A'mwo abolo ton muumuudo Sainai akallu ku'nono milabupinogano. Guvnokwe tooku duudapi yogalo me'no anekullodo toga a'mwo abolo ton wobo toru noulabupiyokweyo'mo babo tov muumuudo akallu aiyowomno me'no airogabolosowokwono. Toro tovino tov ku'nono milabupinogano.” Kuudokaikono.

²⁴ Moosesol toro kuudoka tovi Gooti Yawel aro kuudokaikono. “Guu wola'bi gumi judai'yago Eroonollu doolodomorawono. Toro kuvi kuruv pris toorogai'aro a'mwo abolo togai'aro tono'gwowi miyomno ilabiyo'mo babo tovi muuwolokaulabupinogano. Toro tovino tov nuu a'mwo abolo su tonyu nomovagu'mwojumiyokwe guu neya doduumjukurono.” Kuudokaikono.

²⁵ Toro kuudoka tovi Moosesol wuu'nyuno sumaiyokwe muumuudo toolluda'ai wolabo'no Gooti Yawelluro kuudoka tovino a'mwo abolo tonyu kuvinono kuudokaikono.