Mollurolovomato 13 - Gooti Toolluro Yogalokwono

Isuraiyolda'ai tonyuro kwolaiyo sujuraiyo toorai Gooti Yawello'mo ajesopo tovinokwono

¹ To'no'gwowi Gooti Yawel Moosesollu aro kuudokaikono.

² “Kevu Isuraiyolda'ai a'mwo abolo togaikulluro kwolaiyo sujuraiyo toorogai'aro kemoro ibesa'aiyo tooravuro muudu'no yawosunodupudo toorogai'aro toorai miyo'mo yiunokuudo nyumo'nupino'moneyokwe neya dojesulo.” Kuudokaikono.

Bret yisomaiyokwe lubullu doto tovinokwono

³ To'no'gwowi Moosesol Isuraiyolda'ai a'mwo abolo tonyu aro kuudokaikono. “Kevu Ijup toru ki'nato womdo yodopure togaikullu Gooti Yawel gavnokweyolluro jurogudo tokwe abomollurolovekumokalokuumokaikono. Toro abomollurolovekumokalokuumoka tollugwojuno aki aiko te kuudo you'movlaiyo'moneyokwe kevu lubullu doto sanpi toga bret yisokwe ton manugovla'mwalpinogaikikono. Toro kugaikul kuruv yiuno bret yisomaiyokwe tonyuno'gwowi nokwo mujonugovla'mwalpinogaikikono.

⁴ Toro togaikul lobako Abipolo dodupudo akalluro iruko akallugwoji kevu Ijup toru wuugollu'mo'mdupu abolokuumapogaikikono.

⁵ Toro togaikullu Gooti Yawel kwako muuduko puruv ikullabiyo'moneyokwe kemi tellukweyago toorai subuu'yamju me'no kwiyokaikono. Kwako su tov Kenanda'ai toorogai'aro Hitda'ai toorogai'aro Amooroda'ai toorogai'aro Hivuda'ai toorogai'aro Jebuusuda'ai toorogai'aro tooro mwalodupudorukono. Gooti Yawel subuu'yamju me'no kwiyoka kwako su toru kuvinono noulomwalpinogaikikono. Kwako su toru woguulkwako bwotonyokweyorukono. Kwako su towai me'no aulomwalpi toga kevu bret yisomaiyokwe lubullu doto akav kworomo yiuwi'nokai toga lobako muudu'nodo toollu neya yonugovla'mwalpinogaikikono.

^6-7 Aki toro togaikul 7-pela iruko tobuullu bret yis maiyokwe to'no yonugovla'mwalpinogaikikono. Toro kuvi kuruv iruko su tobuullu bret yisokwe togai'aro aki yis kurukwe'aro ton kemoro yiuwi'nokai kwako aiyowomno tomuu nooro'jo. Toro te kevu yis maiyokwe lubullu doto su tov 7-pela iruko tobuullu toro yonugovlavopi iruko naba 7 tollugwo bai'mo'mdowo'jure toga Gooti Yawellu ilomoropimovla'mwalpinogaikikono.

⁸ Aki iruko su tollugwo bai'mo'mdowo'jure tollugwojuno kemi kwolaiyo toorai aro jodubwasogaulo. “Nevu kwako Ijupda'ai nobolokwodowore toga Gooti Yawel anekullo'mwojoka tovino ilomoropiyo'moneyokwe lubullu doto akav yanodowadonogano.”

⁹ Toro yopi toga kuudo yau'mwalpinogaikikono. Oo nevu Ijupda'ai bolokwodowore toga Gooti Yawel gamoro jurogudo kuunodo tokwe amollurolovonekumarokaldeyo. Kuudo you'movla'mwalpinogaikikono. Toro te kevu kuudo nyallulo'gwonpiyokweyo'mo tov kemi ato'mdeyo oo yomo'mdeyo tonyu puukwollo yakwollodupudo to'busuko kubalno lubullu doto su tov duuwallo ikullumo'nonokwono. Toro te lubullu doto su tov yanopi toga kemi mago tokwe Gooti Yawelluro kuuguudo me'no sodekubwasoka tonyuno dumwalpinogaikikono.

¹⁰ Toro te lubullu doto su tov yiuwi'nokai kworomo tonyu iruko me'no ajesungiko tobuullu neya jonugovlavogaulo.” Moosesol Isuraiyolda'ai tonyu toro kuudokaikono.

Isuraiyolda'ai ton kemoro kwolaiyo sujuraiyo tooro Gooti Yawellu kwiyopo tovinokwono

¹¹ Aki Moosesol aro kuudokaikono. “Gooti Yawel Kenanda'ai tooravuro kwako tovino kevuge'aro kemi tellukweyago toorogai'aro toorekullu ikullabiyo'mo subuu'yamju me'no soka toru'no mollubworekumokavlawonekono. Kwako su tovi aikullabwo'ji toga

¹² kemoro yiuwi'nokai kwolaiyo sujuraiyo muudu'nodo yawosunodupudo tooro Gooti Yawello'mo neya duuwiyulo. Aki kemoro noonyumwonyu wuulo ki'duvolodupudo tooravuro muudu'nodo yawosunodupudo kwolo tooro Gooti Yawellu wiroudapiyo'morogano.

¹³ Toro kuvi kuruv sa'ai doonki tooravuro kwolo muudu'no yawosunodupudo tooraino'gwowi maromiroudapipinono. Doonki su tooravuro aiko toru mallo'moneyokwe tov sipsip muugunyo pwollu neya doromiroudapilo. Toro kuvi kuruv sipsip pwol sa'ai doonki pwolluro aiko toru'no mamaro'ji to'gwowi sa'ai doonki su toollu gamoro boruko tovi neya kiyogurosupinekono. Aki kevu a'mwo abolo togaikulluro kwolaiyo sujuraiyo tooro Gooti Yawellurogano. Toro toorai aikomgu mallo'moneyokwe tov Gooti toolluda'ai neya dobiyomarogaulo.

¹⁴ Su toro yodopure tovino kemoro kwolaiyo tooro aro ikudoganpinogano. “Kemoro sadokwopo su tov buro'nyo kavlo tovino'mdeyo?” Toro aikudoganpi tov aro wuudupinorekikono. “Nevu kwako Ijup toru ki'nato womdo yodowore toga Gooti Yawel gamoro jurogudo tokwe Ijupda'ai abomollurolovonekumokalokwoka tovinokwono.

¹⁵ Aki muudu'nodo toga Ijupda'ai Feroo tool gamoro poowokalago tov lumdo kuulopiyodowo nemi irolovonekwapiyo'mo mwinoduke toga Gooti Yawel yiuwi'nokai Ijupda'ai tonyuro kwolaiyo sujuraiyo toorai aromiyosokaikono. A'mwo abolo tonyuro kwolaiyo sujuraiyo toorogai'aro noonyumwonyu wuulo ki'duvolodupudo tooravuro muudu'no yawosunodupudo toorogai'aro yiuwi'nokai su toorai aromiyosokaikono. Toro tovino tov nemoro yiuwi'nokai ibesa'aiyo tooravuro kwolo muudu'no yawosunodupudo tooro Gooti Yawellu wiroudapiyo'morogano. Toro kuvi kuruv nevu a'mwo toonolluro kwolaiyo sujuraiyo toorono'gwowi aikomgu mallo'moneyokwe tov Gooti toolluda'ai mubiyomallokwenogano.” Kemi kwolaiyo aikudoganpi toorai toro wuudupinokwono.

¹⁶ Toro te nemoro yanodowado akav nevu kuudo nyallulo'gwona'jokweyo'mo tov kemi ato'mdeyo oo yomo'mdeyo tonyu puukwollo yakwollodupudo to'busuko kubalno duuwallo to'busuko nekullumo'nodowodokwono. Toro te duuwallo akavi wonowa'ji aro kuudo yau'mwalanonogano. Oo Gooti Yawel gavnokweyolluro jurogudo tokwe kwako Ijup tomuuda'ai nemi abomollurolovonekumokalokwokaldeyo. Kuudo yau'mwalanokwono.” Moosesol Isuraiyolda'ai tonyu toro kuudokaikono.

Gooti tool sulu'wo tokwe du'wiyo tokwe tovake amollubworomokavlaiyajuko tovinokwono

¹⁷ To'no'gwowi Ijupda'ai Feroo tool Isuraiyolda'ai tonyu irolowapino sumaiyokwe toga Gooti tool Isuraiyolda'ai tonyu Filistiyada'ai tooro mwalodupudo wobo puuto tomuu'aro nokwo amollubworomokavlawo'jujuko kwol kuruv aro kuudo saurokaikono. Wobo puuto su tovi pla'mdopure tonyu kemi ikomago pworo molo'mo nuuwipiyo. Molo kwipi to'gwowi Isuraiyolda'ai a'mwo abolo su ton kuudo pumgu'aro yauropi Ijup'no aikomgu plapinogano. Toro kuudo yau'no sumaiyokwe manyu puuto puvi'aro amollubworomokavlavokaikono.

¹⁸ Gooti tool toro mollubworomokavla'mdowo Soolwara Weyako tovi ki'meyo'moneyokwe kwako a'mwomaiyo kuu'maiyo tomuu'aro amollubworomokavlaiyajukekono. Toro amollubworomokavlavoka toga Isuraiyolda'ai a'mwo abolo ton kwako Ijupda'ai wuugollu'mokabo'mno kemi iro'mwomido togai mokavla'mdupu molo'mo yovro'yovropto amujumovlaiyajuporogano.

¹⁹ Aki Joosepolluro yogudo togai'aro Moosesol momwora'no sumaiyokwe amokavlaiyajukekono. Yogudo amokavlaiyajuko su ton aro tovinokwono. Aiyoga Joosepol Ijup toru kuuno amwallajuko toga Isuraiyolda'ai tonyu aro kuudokaikono. “Gooti tool ikullo'mwojowo'ji Ijupda'ai abolokuupi toga moro yogudo togai neya domokavlaiyulo. Kevu kuvinono mokavlapino'moneyokwe subuu'yamju neya donyulo.” Kuudokaikono. Toro kuudoka tovi Isuraiyolda'ai ton subuu'yamju me'no kwiyopo kuvinono Ijupda'ai abolokwopo toga Joosepolluro yogudo togai abomokalokwopogano.

²⁰ Aki toruda'ai Isuraiyolda'ai ton Suukoot toru wuugollu'mo'mno sumaveyokwe kwako a'mwomaiyo kuu'maiyo tomuuno yiulopiyabiyo Itam towai ai'movopogano. Toro ki'mo'mno sumaveyokwe kemi woromollo'mo sel ago ton amodopogano.

²¹ Toro tonyu Gooti Yawel nomollubworomokavlaiyo'mo tool aro sajukekono. Iruko toga sulu'wo tovi kuulomwalodowo amollubworomokavlaiyajukekono. Aki surakuuto toga du'wiyo tovi kuulomwalodowo puuto tovi wuuduuwallo'moneyokwe bako pwopiyodowo sumdomgu kwanyajukekono. Toro yoduke tovida'ai iruko togake'aro surakuuto kugake'aro toga nokwo avlaiyajupogano.

²² Aki iruko togasuro sulu'wo tov mollubworomokwanodowodo tokwe'aro surakuuto togasuro du'wiyo mollubworomokwanodowodo tokwe'aro toval muugollu'meyajulovakono. Toro kuvi kuruv yiuwi'nokai toga Isuraiyolda'ai tonyu amollubworomokwanyajulovakono.