Mollurolovomato 12 - Gooti Toolluro Yogalokwono

Muunyu toru'aro irukuruwoleyo'mo toga'no, “Wosamujuko pun neya jovrowosulo,” kuudoka tovinokwono

¹ Toruda'ai Mooseseke Erooneke todoral kwako Ijup toru kuuno mwalodole toga Gooti Yawel aro kuudokaikono.

² “Lobako akal yiuwi'nokai kworomo toga kemi muudu'nodo ikullumo'numwalonekono.”

³ Toro wuujuno sumaiyokwe aki kuudokaikono. “Yiuwi'nokai Isuraiyolda'ai a'mwo abolo tonyu aro duujulo. Lobako akalluro iruko atousal tollugwoji yiuwi'nokai a'mwo tooro kemi julkwolaiyo tonyuda'aiyo'mo sipsip bwoptorodeyo oo meme bwoptorodeyo go'no go'nodo toorai neya ajesupuro.

⁴ Toro ajesupi su tool yiuwi'nokai a'mwo kwolabolo togai'aro kwolaiyo taiyo togai'aro ton yowa'no nupino sipsip bwopto pwollu neya ajesupuro. Toro kuvi kuruv a'mwo pwol gami julkwolaiyo togai ku'nono manopiyanonoldeyo ado'ji to'gwowi julkwolaiyo punumdoto wobo toru mwalodupudo togai nokwo i'bwo'nonomwallo'mo pwollu neya ajesupuro.

⁵ Aki toro ajesupi toga sipsip bwoptoldeyo oo meme bwoptoldeyo toorai nokwo jesupinorekikono. Toro kuvi kuruv nelowikuumwiyo tooraino'gwowi majesupinorekikono. Yiuno sugudo to'nodo tooro kworomo pullugwonodokwe kwolo su tooraino neya ajesupuro.

⁶ Toro ajesupi su toorai mollomwalopi lobako akalluro iruko 14 tollugwoji sula'dugumdo toga yiuwi'nokai Isuraiyolda'ai ton sipsiporodeyo ajesupi su toorai neya aromipuro.

⁷ Toro aromipi tooravuro mujako pun luvomaropi kemi ago noulonomwallo'mo tovida'ai noullo a'mworainyuko tovallu imgu amgu luviyourosopi aki noullo te muunyomguda'ai kunyu kuruv neya aluviyourosupuro.

⁸ Toro aluviyourosupi surakuuto su to kullugwoji aromipi toolluro muugupto ton kemi duko tonyu aulelonomwalpuro. Toro kuulelonomwalopi toga bret yis maiyo pugai'aro iru'ikoulo pugai'aro togai neya yanpuro.

⁹ Toro yanopi kuvi kuruv muujaiyo ton nonpiyo. Aki soospen tovi'aro wonyo doto miyanpinono. Toro kugaikul kuruv yiuno duko tovi'aro delanyulo. Toro kilanopi toga gamoro mido tooke'aro suvlato togai'aro sumwoluko togai'aro tonyu toro kilanpinogaikikono.

¹⁰ Toro kilonomwalopi toga lomwo iruko tov yere millourosodowo'jure toga yiuwi'nokai muugupto tov neya delonopilo. Toro kuvi kuruv, Muugupto pun kuuno dooso, adupi to'gwowi duko tovi iroudapiyopi yiunokuudo neya anosono.

¹¹ Aki Ijupda'ai nobolokwiyo'mo togaikul muugupto ton kilanopi yasuwa'no manumwalpinono. Toro kugaikul kuruv aro neya yamul'mwonpinogaikikono. Kemi youro togai suulpweyo togai mollosopi aki yodeko togai'aro momjunaropi muugupto ton yere neya kilanpinogaikikono. Kevu su toro ailanpi togaikul aro kuudo yaupinogaikikono. Oo Gooti Yawel nemi muunyu toru'aro irukuruwolowono'mo tovino'mdeyo. Kuudo yaupinogaikikono.

¹² Surakuuto su tollugwoji nuu kwako Ijup toru aiyowomno yomollo'mi yiuwi'nokai a'mwo abolo togai'aro ibesa'aiyo toorogai'aro tonyuro sujuraiyo yawosunodupudo toorai noromiyosumonyugono. Toro aromiyosumi toga yiuwi'nokai Ijupda'ai kuunano gooti toorai nuuwolo'monyugono. Nuu Gooti Yawel toonyu toro wimonyugono.

¹³ Aki kemoro ago aulomwalpi tonyuro anoullo tovida'ai mujako aluviyourosupi su ton mi nyuduuwallo'mokwono. Toro te nuu Ijupda'ai tonyu toro romiyoso'mi kwonyu kuruv mujako aluviyourosupi su tonyu kwonmi toga kemino'gwowi muunyu toru'aro irukuwolovo'mi tabunyuwuulo su tov kemi kaiyako miyaikullugolonokwono.

¹⁴ Toro imo'nono iruko su tollugwoji neya jesupinogaikikono. Toro ajesupi tollugwo yiuwi'nokai kworomo toga bai'mo'mdowo'jure tollugwoji moro aikullumi tovino aki aiko te kuudo you'movlavopi mi ilomonuwopimovla'mwalpinogaikikono. Aki iruko su tollugwo bai'mo'mdowo'jure toga Gooti Yawel toonyo'mo lubullu doto yonugovla'mwalpinogaikikono. Kemoro tellukweyago lukomguda'ai sawosunpi kun kuruv yiuwi'nokai kworomo toga yiunokuudo su toro mujumovla'mwalpinogano.” Kuudokaikono.

Bret yis maiyokwe tonyu doto yanpureyokweyo'mo kuudoka tovinokwono

¹⁵ Gooti Yawel toro wuujuno sumaiyokwe aki aro kuudokaikono. “Kevu iruko 7-pela tobuullu bret yis maiyokwe to'no neya numwalpinogaikikono. Toro kuvi kuruv a'mwo pwol bret yisokwe tov iruko su tobuullu ano'ji toolluno'gwowi kevu Isuraiyol togaikike nomwalo'jokweyo'mo neya domovomjapiyulo. Toro te lubullu doto yanyo'moneyokwe tovuro iruko muudu'nodo tollugwoji yiuwi'nokai yis ton kemi ago tovida'ai neya bilomodukwopiyulo.

¹⁶ Toro bilomodukwopiyopi iruko 7-pela su tobuullu lubullu doto yanmwalopinogaikikono. Toro kugaikul kuruv iruko su tobuulluro pullalno'gwowi mi ilomonuwopiyo'moneyokwe i'bwo'numwalpinogaikikono. Kevu iruko muudu'nodo tollugwogai'aro iruko aiyowo'mo 7 tollugwogai'aro tovalluno to'no i'bwo'numwalpinogaikikono. Iruko su tovallu toro i'bwo'nopi togaikul womdo pun miyopi yiuno wosamujuko tono'gwowi nokwo yovrowosumwalpinogaikikono. Toro togaikul iruko su tovallu i'bwo'nomwalopi mino ilomonuwopimwolapinogaikikono.

¹⁷ Toro te kevu bret yis maiyokwe sonomwalpi iruko 7-pela su tobuullu neya jesupinogaikikono. Toro ajesupi tobuul yiuwi'nokai kworomo toga bai'mo'mdowo'jure tonyu lubullu doto neya jonugovlavogaulo. Toro yonugovlavopi mino tov, Oo iruko akaro tollugwoji nemoro yiuwi'nokai iko tovasuda'ai tonollu kwako Ijupda'ai abomollurolovonekumokalokwokaldeyo, kuudo yanuu'mwalpinogaikikono. Lubullu doto toro yonugovlavopi yiuwi'nokai kworomo toga neya jogaulo. Aki kemi tellukweyago lukomgu sawosunpi kun kuruv aval'no neya imovlapinogano.

¹⁸ Toro te kevu lobako muudu'nodo akalluro iruko 14 sula'dugumdo togada'ai yiuno iruko 21 sula'dugumdo toga'no bret yis maiyokwe to'no neya numwalpinogaikikono.

¹⁹ Toro kuvi kuruv iruko su tobuullu a'mwo pwol bret yisokwe tov ano'ji toolluno'gwowi kevu Isuraiyolda'ai togaikike nomwalo'jokweyo'mo neya domovomjapiyulo. Kevugeyoldeyo oo pumuuda'ai bomwalloldeyo kwollu kuruv neya domovomjapiyulo. Toro tovino tov 7-pela iruko su tobuullu yiuwi'nokai yis tov kemoro ago tonyuda'ai neya bilomodukwopiyulo.

²⁰ Toro bilomodukwopiyopi yis puru'monodo kuruv kemoro ago tovi mworonokwono. Toro te kevu bret yis maiyokwe to'no nomwalpinogaikikono.” Gooti Yawel toro kuudokaikono.

Muunyu Toru'aro irukuruwoleyo'mo lubullu doto muudu'no sanopo tovinokwono

²¹ Toruda'ai Moosesol Isuraiyol iko tovasuda'ai a'mwo aguto toorai doma'no sumaiyokwe kuudokaikono. “Kevuge avalo toorai aro duujulo. “Kevu pwolno pwolnodo toorekul kev tonumdotekullo'mo sipsip bwopto pwollu neya jenbworomallulo. Toro te muunyu toru'aro irukuruwoleyo'mo lubullu doto tovi yanyo'moneyokwe kevu senyubworomapi su tooro doromiyulo.

²² Toro romiyopi gamoro mujako tov dis tovi bwolovomwonawonokwono. Toro abwolomwonawo'ji tovi mekwapilo hisoop tokwe juulovomaropi kemi anoullo tonyu imgu amguda'ai a'mworainyuko tovake'aro anoullo muunyomgu tokwe'aro tonyu neya doluviyourosulo. Toro aluviyourosupi ago su tovida'ai kev tonumdotekul lomwo iruko yere millourosodowo'jure toga mabolokuupinogaikikono.

²³ Kemi ago tonyu toro kuulomwalodopure toga Gooti Yawel kwako Ijup tomuu aiyowomno yomollowo'ji Ijupda'ai kwolaiyo sujuraiyo toorai romiyonekono. Toro romiyowo'ji kwol kuruv mujako aluviyourosupi tonyuno'gwowi wonowo'ji kemoro kwolaiyo sujuraiyo toorai noularomiyo'jokweyo'mo ensel toollu nuumjukuronekono. Aki Gooti Yawel ago su tonyu muunyu toru'aro irukuruwolowonekono.

²⁴ Gooti toolluro adaikullumoka su tovi kevuge'aro kemi kwoloraiyo sumo'nupi kugai'aro togaikul yiuwi'nokai kworomo toga aval'no jumovlavogaulo.

²⁵ Aki lukomgu kevu Gooti Yawelluro subuu'yamju me'no adaikulloka kwako tomuuno plavopi me'no aulomwalpi toga lubullu doto tov aval'no neya yonugovla'mwalpinogaikikono.

²⁶ Toro yonugovla'mdopure tovino kemoro kwoloraiyo sawosunpi ton wonopi aro ikudoganpinogano. “Kevu su toro sadokwopo tov buro'nyo kavlo tovino'mdeyo?” Toro aikudoganpi tonyu

²⁷ aro wuudupinogaikikono. “Nevu Gooti Yawellu ilomoropiyo'moneyokwe kwiroudapimwakuuwono. Aro tovinokwono. Aiyoga Gooti Yawel Ijupda'ai tonyuro kwolaiyo sujuraiyo toorai aromiyoka toga nemino'gwowi manekuromiyo'no nemoro ago tonyu muunyu toru'aro surukuruwolovoka tovinokwono.” Wuudupinogaikikono.” Duujulo.” Moosesol Kuudokaikono. Toro kuudoka tovi Isuraiyolda'ai a'mwo abolo ton wuu'nyuno sumaveyokwe kwako tovi wolomuulo'naro'mno Gooti Yawelluno sulomoropiyapogano.

²⁸ Isuraiyolda'ai ton toro ilomoropino sumaveyokwe Gooti Yawelluro kuuguudo tov Mooseseke Erooneke todorallu kuudoka tovi kuvinono kuumjunopogano.

Ijupda'ai tonyuro kwolaiyo sujuraiyo tooro abolopo tovinokwono

²⁹ Toro te surakuuto su tollugwojuro akuusuduko toga Gooti Yawel yiuwi'nokai Ijupda'ai tonyuro kwolaiyo sujuraiyo toorai aromiyopiyokaikono. A'mwo aguto kig Feroo toolluro kwolaiyo sujuraiyo tooke'aro aki wuulo killo'mo ago tovi kuule'na'dupudo tooravuro kwolaiyo sujuraiyo kworogai'aro toorai aromiyokarogano. Aki noonyumwonyu wuulo ki'duvolodupudo tooravuro yiuwi'nokai sujuraiyo yawosunodupudo kworogai'aro toorai yiunokuudo aromiyopiyokaikono.

³⁰ Toro romiyopino sumaiyokwe surakuuto su tollugwoji Feroo tooke'aro gamoro a'mwo womdo tovi mollomwalokwe toorogai'aro yiuwi'nokai Ijupda'ai a'mwo abolo togai'aro ton adukavopogano. Toro dukaino sumaveyokwe yiuwi'nokai Ijupda'ai tonyuro ago go'no go'nodo tonyu kwolaiyo sujuraiyo abolopo tooro kurukweno kworopogano. Toro tovino tov kwako Ijup toru aiyowomno kumdato bwotonyo amjumoulapogano.

³¹ Aki surakuuto avalo su tollugwoji Feroo tool Mooseseke Erooneke todorallu doma'no sumaiyokwe kuudokaikono. “Kevu yiuwi'nokai Isuraiyolda'ai a'mwo abolo tonyu wuudukuuro'bullu nemi nekugollu'movopi dovlaiyulo. Kevu kemi Gooti Yawellu ilomoropiyo'moneyokwe nyudoganodubulo tovi kuvinono duumjunyulo.

³² Aki kemi sipsip meme buulmokau ki'duvolodupudo toorai mokavlaiyo'mo nyudoganodubulo kworogai'aro momworaro'bullu kwako akavi duugollu'mokavlaiyulo. Kevu toro wuugollu'movopi kugaikul kuruv Gooti Yawel mi sugudo anubwoneyokweyo'mo kev todorakul subusu'nyogalo neya duujulo.” Kuudokaikono.

³³ Feroo tool toro wuujuno sumaiyokwe Ijupda'ai a'mwo abolo ton aro sajunopogano. “Nevu yiuwi'nokai tonol nobola'jo.” Toro yajunyuno sumaveyokwe Isuraiyolda'ai tonyu amodapiyopogano. “Kevu yere dovlaiyulo.” Amodapiyopogano.

³⁴ Toro te Isuraiyolda'ai ton kemi bret muujaiyo aguro'mwojajupo tonyu dis tovi amollurosopogano. Bret su ton yis tov yere mwosopokwono. Toro tonyu mollurosuno sumaveyokwe dis su tonyu kemoro ivito togai pweyomguroso'mno kemi yagwo tonyu ilomorosuno sumaveyokwe amokavlavopogano.

³⁵ Aki Isuraiyolda'ai a'mwo abolo ton novlaiyo'mo toga Moosesolluro me'no kuudoka kuvinono Ijupda'ai tonyuro gool togai silva togai youro togai anekullabupureyokweyo'mo kuudoganopogano.

³⁶ Toro te Gooti Yawelluro yoduke tovida'ai Ijupda'ai tonyuro sumdo tovi Isuraiyolda'ai ton yovo agutokwe kwimo'nopogano. Toro tovino tov, “Noonyumwonyu pun donekullabilo,” kuudoganopo toga Ijupda'ai ton nokwo wino sopogano. Toro te Isuraiyolda'ai ton Ijupda'ai tonyuro kuto ivito ton su toro tomgu'aro ajupolomokavlavopogano.

Isuraiyolda'ai ton Ijup toru kuugollu'movopo tovinokwono

³⁷ Toruda'ai Isuraiyolda'ai a'mwo abolo ton wagwolago Rameses toru wuugollu'mo'mno sumaveyokwe wagwolago Suukoot toru'no kwokado avlavopogano. Toro avlavopo toga a'mwono tooro 600,000 tomgu'aro tooro avlavoporogano. Toro kuvi kuruv kemoro julkwolaiyo avlavopo tonyuno'gwowi majagilopogano.

³⁸ Isuraiyolda'ai ton toro pla'mdopure toga kwolallo bwotonyo gabovo pugai'aro avlavopogano. Aki sipsip meme buulmokau wuulo ki'duvolodupudo bwotonyago kworogai'aro amokavlavopogano.

³⁹ Toro ton kuuno pla'mdupu kemi bret muujaiyo ton yis tov yere mwoso'mno amokabopo su tonyu doto sonugovlaiyajupogano. Yis tov yere mwosopo tov aro tovinokwono. Isuraiyolda'ai ton kemi bret tonyu munyo'moneyokwe yis tov yere mwosodopure toga Ijupda'ai tooro yere amodovomjapiyoporogano. Toro tovino tov kemi nonugovlaiyo'mo bret ton yovo'dogaloso'mo sogwollo ku'nono mainopogano. Aki puuto tomuu mujonugovlaiyo'moneyokwe wosamujuko pun miyovrowosopogano. Toro tovinokwono.

⁴⁰ Isuraiyolda'ai toro avlavopo su ton sumdomgu kwako Ijup toru 430 kworomo tobuul me'no amwallajupogano.

⁴¹ Toro te 430 kworomo su tobuul kuuwolo'noka iruko kuunodo su tollugwoji Gooti Yawelluro go'no go'nodo iko tovasuda'ai a'mwo abolo su ton kwako Ijupda'ai abolokwopogano.

⁴² Toro abolokwopo surakuuto su tollugwoji Gooti Yawel Ijupda'ai nobomokalokwiyo'mo tool po'dogalo amoduvomwallajukekono. Gooti Yawel toro abomollurolovomokalokwoka tovino tov surakuuto su tollugwo Gooti Yawellu ilomoropiyo'moneyokwe ajesopollugwogano. Isuraiyolda'ai a'mwo abolo ton toro jesuno sumaveyokwe aro adopogano. “Surakuuto su tollugwo yiuwi'nokai kworomo bai'mo'mdowo'jure toga Gooti Yawellu ilomoropiyo'mo kuudo you'movla'mwalanollugwogano. Aki nemoro lukomguda'ai nellukweyago sawosuna'ji kun kuruv surakuuto su tollugwojuno aval'no neya you'movla'mwalpinogano.” Adopogano.

Gooti Yawel muunyu toru'aro surukuruwolovoka tovino aki aiko te kuudo yaullo'mo lubullu doto tovinokwono

⁴³ To'no'gwowi Gooti Yawel Mooseseke Erooneke todorallu aro kuudokaikono. “Gooti Yawel muunyu toru'aro surukuruwolovoka lubullu doto tovi sanupi toga aro jogaulo. A'mwo abolo gabovo pumuuda'ai ton kevu Isuraiyol togaikulluro lubullu doto su tovida'ai wosamujuko tonyu manupinogano.

^44-45 Aki a'mwo abolo gabovo pun kevuge bomwallo yodupudodeyo oo a'mwo abolo kemi womdo ikullo'mo abiyomapiyodeyo kun kuruv manupinogano. Toro kuvi kuruv ki'nato womdokwe biyoma'dupudo pworo kemoro lakulkulako tov me'no ado'nyugopo su toorono'gwowi lubullu doto su tovida'ai wosamujuko tonyu nokwo nupinorogano.

⁴⁶ Aki kevu toro sanpi toga kemi ago go'no go'nodo tonyuno to'no neya kuullonomwalopi muugupto pun kwa'mgu tomgu mabomokalokuumwalpinogaikikono. Aki muugupto su ton toro kuullonomwalopi toga sipsip memeyorodeyo tooravuro yogudo ton madovarubuuto'mwalpinogaikikono.

⁴⁷ Kevu Isuraiyolda'ai togaikul lubullu doto su tovi yanyo'mo tov yiuwi'nokai togaikul neya jonugovlavogaulo.

⁴⁸ Toro kuvi kuruv a'mwo pwol gami lakulkulako tov mado'nyungiko toolno'gwowi manonekono. Toro tovino tov kevuge mwalodupudo bomwallokwe pwol nuu Gooti Yawel toonyuro Muunyu Toru'aro Surukuruwolovo lubullu doto su tovi yanyo'mo kwino'ji tool gavnokweke'aro gavuge mwalodupudo toorogai'aro tooravuro lakulkulako ton neya ado'nupuro. Toro me'no ado'nupi toga'no'gwowi kevu Isuraiyolda'ai togaikulluro kuunodo pwolbusuko imo'nowo'ji lubullu doto tov nokwo yonugovla'mwalonekono.

⁴⁹ Toro te a'mwo bomwallokwe toorogai'aro kevu Isuraiyolda'ai kuunodo togaikike'aro togaikul uumjunyo'moneyokwe loowo tov yiuno puru'monodokwono.” Kuudokaikono.

⁵⁰ Toro te Gooti Yawelluro Mooseseke Erooneke todorallu kuudoka su tovi yiuwi'nokai Isuraiyolda'ai a'mwo abolo ton kuvinono kuumjunopogano.

⁵¹ Aki Gooti Yawel iruko su tollugwoji Isuraiyolda'ai go'no go'nodo iko tovasuda'ai a'mwo abolo tonyu kwako Ijupda'ai abomollurolovomokalokwokaikono.