Mollurolovomato 11 - Gooti Toolluro Yogalokwono

“Kwolaiyo sujuraiyo tooro neya bolpinorogano,” adoka tovinokwono

¹ Toruda'ai Gooti Yawel Moosesollu aro kuudokaikono. “Nuu Ijupda'ai Feroo tooke'aro gamoro a'mwo abolo togai'aro tonyu tabunyuwuulo uubweyodumdo toonyu aiyowo'mo puruv uubwemonyugono. Toro me'no kuubwemi toga Feroo tool kavo mirolovekwapiyo'mo kwol kuruv guureji bilomovomjekwopiyonekono.

² Toro te aga guu Isuraiyolda'ai a'mwo abolo tonyu aro neya duudono. “Kevu yiuwi'nokai a'mwo abolo togaikul kemi wobo toru mwalodupudo Ijupda'ai tonyu duudoganyulo. Toro kuudoganpi toga kemoro silva tokwe gool tokwe tovalluda'ai sakwollungiko kuto ivito ton nekullabupinogano.” Duudono.” Kuudokaikono.

³ Toro kuudoka toga Gooti Yawelluro yoduke tovida'ai Ijupda'ai a'mwo abolo ton Isuraiyolda'ai tonyuno ilaiyo to'no amollajupogano. Aki kwako Ijup toru Feroo toolluro a'mwo womdo tovi mollomwalokwe toorogai'aro a'mwo abolo togai'aro ton Moosesolluno tov, Oo a'mwo aguto kuunodo pwoldeyo, kuudo saullajupekono.

⁴ Toruda'ai Moosesol Feroo toollu aro kuudokaikono. “Gooti Yawel aro agudadopiyo. “Nuu surakuuto akuusuduko toga kwako Ijup toru aiyowomno yomollumonyugono.

⁵ Toro somollumi toga yiuwi'nokai Ijupda'ai tonyuro kwolaiyo sujuraiyo tooro nobolpinorogano. Guu sia kig tovi mwalodumdo Feroo tookujuro kwolaiyo sujuraiyo sawosunodo tooke'aro aki abolo ki'nato womdokwe ton wit sulo gurojodupudo tobuuravuro kwolaiyo sujuraiyo kworogai'aro tooro nobolpinorogano. Aki sipsip meme buulmokau wuulo ki'duvolodupudo tooravuro yiuwi'nokai sujuraiyo yawosunodupudo kworo kuruv nobolpinorogano.

⁶ Toro bolodopure toga Ijupda'ai a'mwo abolo ton kumdato bwotonyo tov aiyowomno mujomoulapinogano. Kumdato bwotonyo imo'nono su tov aiyoga su toro to'busuko puruv majajupokwono. Aki lukomgu kuga kuruv su to'busuko puruv madupinokwono.

⁷ Ijupda'ai tonyu toro kuubwemi kuvi kuruv Isuraiyolda'ai tonyuno'gwowi a'mwo abolo kugai'aro kemoro ibesa'aiyo kworogai'aro tonyu kaiyako puru'monodo kuruv migolmonyugono. Toro sumi tovi kevu Ijupda'ai togaikul wonopi mino aro kuudo yanuupinogaikikono, Oo Gooti Yawel nemi kaiyako sanekugolmoka kubalno Isuraiyolda'ai tonyu migolmokaldeyo, kuudo yanuupinogaikikono.” Gooti Yawel toro agudadopiyo.” Kuudokaikono.

⁸ Moosesol toro wuujuno sumaiyokwe aki aro kuudokaikono. “Toro aikubweyo'ji toga gumoro a'mwo womdo tovi mollomwalokwe tooro miyomno bopi moro sumdollu toru kwako tovi bomuulo'naropi aro nyudupinorogano. “Guu gumi a'mwo abolo togai momworaro'bi neya dovlaiyulo.” Toro anyudupi toga'no'gwowi nokwo plawanonogano.” Moosesol toro wuujuno sumaiyokwe surodo bwotonyo wuunoduke tool Feroo toollu abuugollu'mokalokwokaikono.

⁹ Sumdomgu toga Gooti Yawel Moosesollu aro me'no kuudokaikono. “Feroo tool gumi maguu'nyubusuko yonekono. Toro yodowo'jure tovida'ai moro duuwallo jurogudo bwotonyago ton kwako Ijup toru nokwo wuuduuwallumonyugono.” Kuudokaikono.

¹⁰ Mooseseke Erooneke todoral Feroo tool nomuugona'duke toga yiuwi'nokai duuwallo jurogudo ton me'no kuuduuwallajulorakono. Toro wuuduuwallodole kuvi kuruv Gooti Yawelluro yoduke tovida'ai Feroo tool gamoro poowokalago tov lumdo kuulopiyodowo Isuraiyolda'ai ton gamoro kantri tovida'ai wuugollu'meyo'mo mirolowapiyajukekono.