Matyuu 6 - Gooti Toolluro Yogalokwono

Jisasol, a'mwo abolo supto yodopure tobuurai wiyo'mwojumwalpino'moneyokwe, adoka tovinokwono

¹ Aki Jisasol aro sodubwasokaikono. “Kevu sugupasudo ton neya domjumovlavogaulo. Toro kuvi kuruv kuudo aro to'gwowi nyau'mwalpiyo. Oo a'mwo abolo pun mi nuwonpino'moneyokwe tov nuvu kemoro sumdo muugona'dopure toga sugupasudo tollovogai kuu'maiyo toru'no neya wuuduuwallumonyugono. Pugaikul su toro kuudo saupi tov a'mwo abolo ton ikwonopi kuvi kuruv kemi Tellunumiyago muunyu kai'muu mwalodowodo Gooti toolno'gwowi pasudo su tovino mubiyo sugudo puruv maikubiyonekono. Toro te kevu pasudo su tovino wako neya dou'nogaulo.

² Aki kevu a'mwo abolo supto yodopure tobuurai noonyumwonyu togai wiyo'mwojo'mo toga a'mwo abolo pun neya anekwonpureyokwe kuudo nyau'mwalpiyo. Toro tovino tov kevu a'mwo abolo pun anekwonpureyokwe tovino spika tokwe deko node'noma'mwalpiyo. A'mwo kuunanokwe tooro a'mwo abolo pun ilomonekwopiyapureyokweyo'mo kuudo yauropi pasudo su to kuvi yodupudorogano. Su tooro Juu tooravuro i'bwo'nyago tonyu kuulomwalopi tomge'aro aki puuto aguto kuu'maiyo toru davopi tomge'aro su tomuu pasudo su to kuvi yodupudorogano. Su toro tooraino nuu nebal'no ikudumo'mokwono. A'mwo su tooraino a'mwo abolo pun yovo aguto wiyodupudogano. Su tov kemi mubiyo to'busuko wimo'nodowodo tovi me'no ma'dupudorogano. Aki a'mwo kuunanokwe su tooro Gooti toolluda'ai mubiyo sugudo pun mamapinorogano.

³ Toro kuvi kuruv kevno'gwowi a'mwo abolo supto yodopure tobuurai noonyumwonyu togai wiyo'mwojo'mo toga yiulo tomuu neya duuwiyo'mwojogaulo. Su toro kwiyo'mwojupi toga kemoro ato kwonamo tovi yiulo tomuu'aro to'no kemi anato tokwe neya duuwiyogaulo.

⁴ Su tov aro tovinokwono. Kevu a'mwo abolo supto yodopure tobuurai noonyumwonyu togai wiyo'mwojo'mo togaikul yiulo tomuu neya duuwiyo'mwojogaulo. Kevu yiulo tomuu su toro kwiyo'mwojupi tov kemi Tellunumiyago yiuwi'nokai yiulo kumuu muugona'dowodo tool ikwonowo'ji kemoro pasudo su tovino mubiyo sugudo pun nobiyaikubweyonekono.

Jisasol subusu'nyogalo jo'moneyokwe sodubwasoka tovinokwono

⁵ Aki kevu subusu'nyogalo wuujo'mo togaikul a'mwo kuunanokwe pworobusuko subusu'nyogalo nodumwalpiyo. A'mwo kuunanokwe su tooro aro kuudo yau'dupudorogano. Oo nevu subusu'nyogalo wuudodowado toonollu a'mwo abolo pun neya anekwonpuro. Kuudo yau'dupudorogano. Pasudo su tovino ilaiyo bwotonyo winyokwerogano. Toro tooro Juu tooravuro i'bwo'nyago tonyu kuulomwalodupudo tomge'aro aki puuto aguto yomollodupudo tomge'aro tomuu kuu'maiyo toru'no davopi subusu'nyogalo wuudodupudorogano. Su toro tooraino nuvu nebal'no ikudumo'mokwono. A'mwo su tooraino a'mwo abolo ton yovo aguto wiyodupudogano. Su toro wiyodopure tovida'ai yovo aguto ma'dupudo su tov kemi mubiyo to'busuko me'no ma'dupudorogano.

⁶ Toro kuvi kuruv guu tookuno'gwowi subusu'nyogalo jo'mo toga gumi ago tovida'ai adovarojungiko puvi kuula'bi kudo'aiko tov neya domallukurono. Me'no amalluku'bi toga gumi Junumiyago yiulo tomuu wonodowodo toollu subusu'nyogalo neya duudono. Yiulo tomuu wonodowodo su tool gumi gwonowo'ji gumoro pasudo su tovuro mubiyo sugudo pun nobiyagubweyonekono.

⁷ Aki kevu subusu'nyogalo kuudupi toga a'mwo Gooti toolluno kuudo nonagutokwe toorobusuko nuudumwalpiyo. A'mwo su tooro aro kuudo yau'dupudorogano. Oo nevu yogalo bwotonyago tokwe kuuda'ji tov Gooti tool nonekuu'nonekono. Su toro kuudo yau'dupudo tooro kemi yasuwa'yogalo bwotonyago toorogai subusu'nyogalo wuudumovla'mdupudorogano.

⁸ Toro kuvi kuruv kevno'gwowi a'mwo yogalo bwotonyagokwe su toorobusuko nyumo'numwalpiyo. Su tov aro tovinokwono. Kevu wuudoganyo'mo subusu'nyogalo yere muudodopure kuga kuruv kemi Tellunumiyago tool kemoro kuudo yau'dopure tonyu me'no yourekuma'dowodekono. Toro te kemoro buro'nyo buro'nyodeyo supto yodopure tonyuno kuudo me'no yourekuma'dowodekono.

⁹ Toro tovino tov kevu subusu'nyogalo aro neya duudumovlavogaulo. “Nemi Nellunumiyagoloo, guu muunyu kai'muu mwalodumdekugono. Toro tookujuno yovo aguto neya gujamwalanonogano.

¹⁰ Guu aguto kig tookujuro mido mollomwalo tov neya abai'mowono. Aki gumoro ago muunyu kai'muuda'ai tooro gumi ilaiyo gujunodowodo pasudo tonyu pi'mwono uumjunodupudo toorobusuko kubalno nevu kwako akavi mwalodowado kunol kuruv gumi ilaiyo gujunodowodo pasudo tonyu pi'mwono neya uumjunmwalanonogano.

¹¹ Aki guu iruko akallugwojuro wosamujuko mujonugovlawano ton donekubweyono.

¹² Aki nevu a'mwo abolo nemi kaiyako sanekullugolopo tonyuro ma'no ma'nodo tonyu modukwopiyodowado to'busuko kubalno guu nemoro ma'no ma'no pasudo yodowado tonyu yiunokuudo domonekudukwopiyogawono.

¹³ Aki yamju pun nemi nonekulloganpiyokwe tomuuno guu nomollubworonekumokavla'mwalbiyo. Toro kweku kuruv nevu kirovanyuvanyu pasudo toorai nomjumovlawa'jokwe guu manyu tomuuno neya domollurolovonekumokavlavogawono.” Kevu subusu'nyogalo su toro neya dumwalpinogaikikono.

¹⁴ Toro te kevu neya duu'nyulo. A'mwo abolo kemi kaiyako yaikullugolodupudo tonyuro ma'no ma'nodo tonyu kevu yiunokuudo amodukwopipi tov kemi muunyu kai'muuda'ai Tellunumiyago tool kev kugaikullu kuruv kemoro ma'no ma'nodo tonyu yiunokuudo nokwo maikudukwopiyonekono.

¹⁵ Toro kuvi kuruv kevu a'mwo abolo kaiyako yaikullugolodupudo tonyuro ma'no ma'nodo tonyu yiunokuudo mamodukwopipi to'gwowi kemi Tellunumiyago kwol kuruv kemoro ma'no ma'nodo tonyu mamaikudukwopiyonekono.”

Wosamujuko tonyuno kumako mwalodupudo tovinokwono

¹⁶ Aki Jisasol aro kuudokaikono. “A'mwo kuunanokwe su tooro aro kuudo yau'dupudorogano. Oo nevu wosamujuko tonyuno kumako mwalodowa'jure toonollu a'mwo abolo pun neya anekwonpuro. Su toro kuudo yau'dupudo tooro kemoro sumdomago ton kumjuju kulako moropiyodupudorogano. Nebal'no ikudumo'mokwono. A'mwo su tooraino a'mwo abolo ton yovo aguto wiyodupudo tov kemi mubiyo to'busuko wimo'nodowodo su tovi me'no ma'dupudorogano. Toro kuvi kuruv kevno'gwowi wosamujuko tonyuno kumako amwalpi togaikul a'mwo kuunanokwe toorobusuko kumjuju kulako nomoropinmwalpiyo.

¹⁷ Toro kuvi kuruv pweku wosamujuko tonyuno kumako amwalbi toga gumoro mido tovi oolip munyupto tokwe neya kimowoso'bi aki gumi sumdomago tovi wonyo tokwe neya jal'mo'nogawono.

¹⁸ Su tov aro tovinokwono. Guvu wosamujuko tonyuno kumako amwalbi su tov a'mwo abolo pun gwonpino'moneyokweyo'maiyo. Toro kuvi kuruv gumi Junumiyago yiulo tomuu mwalodowodo tool gwonyo'moneyokweyokwono. Guu su toro subi tov gumi Junumiyago yiulo tomuu wonodowodo su tool gumi gwonowo'ji gumoro pasudo su tovino mubiyo sugudo pun nobiyagubweyonekono.

Muunyu kai'muuda'ai sugudo tollovo mollu'bworoso'mo tovinokwono

¹⁹ Aki Jisasol aro kuudokaikono. “Kevu kuto ivito nuugwiyo bwotonyo tokwe biyoma'dupudo tousai kwako akavi nomollu'bworosumwalpiyo. Yiuwi'nokai kwako akavi wo'dupudo su tonyu kaiyako mollugolamo'mdupudogano. Namdo tooro youro tonyu modokuuronopiyopi aki yiuwi'nokai noonyumwonyu aiyon tokwe sakwollungiko tonyu sallukwako tov kaiyako mollugolamo'mdowodorogano. Aki kuuko tooro pwo'dolomokaulapi yiuwi'nokai kwako akavida'ai wo'dupudo su tonyu kuuko kuuloma'dupudorogano.

²⁰ Toro kuvi kuruv kevu Gooti toolluro ago muunyu kai'muuda'ai sugumaluko tousono'gwowi neya domollu'bworosogaulo. Gooti toolluro ago muunyu kai'muuda'ai su tousai namdorodeyo oo sallukwako'mdeyo tov kaiyako ku'nono mamollugolamopinogano. Aki Gooti toolluro ago muunyu kai'muuda'ai su tousai kuuko tooro ku'nono maulowo'dolomapinorogano.

²¹ Kuudo neya jaullulo. Gumi aguto gujumo'nodupudo tollovo mollu'bworosodumdo su towai gumoro poowokalago kuruv avalo su toru wo'mwalonokwono.

Gumoro sumdo toval gumi gworeko to'busuko gujumo'nodubulo tovinokwono

²² Gumoro sumdo toval gumi kulako tovuro gworeko to'busuko gujumo'nodubulovakono. Toro te gumoro sumdo su toval pasudo ilaiyo tollovaino to'no ainamjubullu tov gumoro yiuwi'nokai kulako tovi anakuuto tomuu bako tokwe aiyowomno kuullo'movaguwopimwalonokwono.

²³ Toro kuvi kuruv gumoro sumdo toval kirovanyuvanyu tooraino to'no ainamjubullu to'gwowi gumoro yiuwi'nokai kulako tovi anakuuto tomuu dugumwuulo tokwe aiyowomno kuullo'movaguwopimwalonokwono. Aki gumoro poowokalago tovi bako nonaguto'mno'juki dugumwuulo bwotonyo kuunodo tov juna'mwalonokwono.

A'mwo pwol a'mwo mido mollomwalokwe pworallu ku'nono muumjunono tovinokwono

²⁴ A'mwo pwol a'mwo mido mollomwalokwe pworal toorallu ku'nono muumjunonekono. Su toro tovino kuudo neya jaullulo. A'mwo su tool a'mwo mido mollomwalokwe pwollu uumjunyo'moneyokwe kuulolukumowopiyowo'ji avalo toga a'mwo mido mollomwalokwe gabovo pwolluno'gwowi biyolo to'no uu'mwojonekono. Su toro to'busuko kubalno kevu Gooti tooke'aro nuugwiyo tokwe'aro yiuwi'nokai su tovallu uumjunyo'moneyokwe avalo toga ku'nono maulolukumowopipinogaikikono.”

Tagunyo tonyuno kuudo kwolallo nyourukwapipiyokwe tovinokwono

²⁵ “Toro tovino tov nuu aro ikudumo'mokwono. Kevu kemoro kulako tovuro aiyo yomwallo'moneyokwe tonyuno kuudo kwolallo nyourukwapimwalpiyo. Kevu kuudo kwolallo yourukwapiyopi aro adupi tov, Oo nuvu buro'nyo wosamujuko ton numwalmonyudukono? Aki buro'nyo wonyo ton numwalmonyudukono? Aki burowo'nyo youro tousogai moro kulako tovi mollosumwalmonyudukono? Kevu su toro tonyuno kuudo kwolallo nyourukwapimwalpiyo. Su tov aro tovinokwono. Gumoro kulako tovuro aiyo yomwalodowodo tov wosamujuko nonyo'mo tobuurai uuwolo'mdowodokwono. Aki gumoro kulako tov youro yeso'mo tobuurai uuwolo'mdowodokwono.

²⁶ Kevu dokato dolo tovi plovomollodupudo toorai neya juloonyopiyogaulo. Dokato su tooro wosamuju'womdo ton maudodupudorogano. Aki wosamujuko ton mamullu'bworosodupudorogano. Aki dokato su tooro wosa kuto ton mulomworaropi ago puvi maulomullu'bworosodupudorogano. Toro kuvi kuruv kev togaikulluro muunyu kai'muuda'ai Tellunumiyago tool dokato su toorai wosamujuko ton ya'mdowodekono. Toro te neya duu'nyulo. Kemi Tellunumiyago toolluro sumdo tovino'gwowi kevu dokato su tekwojai me'no uuwolo'mdupudogaikikono. Toro tovino tov kemi Tellunumiyago su tool pi'mwono nomollekumwalmwalonekono.

²⁷ Aki a'mwo pwolnodo kwol kuruv gavnokwelluro aiyo mwallo'moneyokwe tovino kuudo kwolallo sourukwapiyo'ji su tool gamoro nobollo'mo kuunodo toga kuujo sumdo pullugwogai'aro ku'nono millovo'bworosonekono. Su toro tovino kevu kuudo kwolallo nyourukwapimwalpiyo.

²⁸ Aki kevu youro yeso'moneyokwe tonyuno kuudo kwolallo yourukwapiyopi womdo bwotonyo nyumwalpiyo. Kevu mekwako yasuwa'no bila'dupudo tonyuno kuudo pun jaullulo. Mekwako su ton womdo miyodupudogano. Aki mekwako su ton youro yeso'moneyokwe womdo puru'monodo kuruv miyodupudogano.

²⁹ Toro kuvi kuruv nuu aro ikudumo'mokwono. Mekwako su ton womdo miyodupudo kun kuruv yiuno sugumaluko to'no imo'nodupudogano. Aiyoga a'mwo aguto kig Sooloomonol youro sugumaluko tousogai amollovaisu'nyajuko su to kwol kuruv mekwako su tonbusuko mimo'nyajukekono.

³⁰ Gooti tool mekwako yasuwa'no bila'dupudo tonyu youro sugumaluko to'busuko pi'mwono wiropiyodowodekono. Mekwako su ton anuugwo bila'dupudo kun kuruv bi'ai duko tovi nodovobwokulluroudapipinogano. Kevno'gwowi mekwako su tonyu uuwolo'mdupudogaikikono. Mi a'mwo abolonoo, kevu Gooti toolluno kuudo pwekwono kuubwepi kugaikullu kuruv Gooti tool youro togai pi'mwono nekuropimwalonekono.

³¹ Toro tovino tov kevu kuudo kwolallo yourukwapiyopi yamuugojo aro ton nodumwalpiyo. Buro'nyo wosamujuko ton numwalanonoldukono? Oo buro'nyo wonyo ton numwalanonoldukono? Oo buro'nyo youro touso mollosumwalanonoldukono? Su toro tonyuno yamuugojo nodumwalpiyo.

³² Kuudo neya jaullulo. A'mwo abolo Gooti toolluno kuudo muubweyodupudo ton yiuwi'nokai su tonyuno movomjai'nodupudogano. Toro kuvi kuruv kemi Tellunumiyago muunyu kai'muuda'ai tool kemoro yiuwi'nokai supto yodupudo su tonyuno kuudo me'no youroma'dowodekono.

³³ Toro te kemoro supto yodupudo su tonyuno nomovomjai'numwalpiyo. Toro kugaikul kuruv sumdomgu aguto kig Gooti toolluro mido mollomwalo tovino'gwowi neya domovomjai'nogaulo. Aki gamoro pasudo idopto'nodo kunyuno kuruv neya domovomjai'nogaulo. Kevu su toro amovomjai'nupi togaikullu Gooti tool kemoro yiuwi'nokai supto yodupudo ton nokwo ikubwemwalonekono.

³⁴ Toro tovino tov kevu lukomgu supto ipino tonyuno kuudo kwolallo miyourukwapipinono. Lukomgu me'no abai'mowo'ji toga iruko su tollugwojuro tagunyo mokabodowo'jure tonyuno kuudo nyourukwapipinogaikikono. Su tov aro tovinokwono. Yiuwi'nokai iruko go'no go'nodo tollovo kemi tabunyuwuulo ton kurukwe mokabodupudogano. Toro te tagunyo yere mabai'mo'mdopure tonyuno kevu kuudo kwolallo miyourukwapipinono.”