Luuk 3 - Gooti Toolluro Yogalokwono

Wonyo Galuvollokwe Joonolluro kuuguudo amoruujajuko tovinokwono

¹ Toruda'ai a'mwo aguto Sisa pwolluno yovo tov Taibiriyosolekono. Toro tool kantri Room tovi mido mollomwalo yoduke tov 15-pela kworomo tobuul kuuwolo'nokaikono. Su toro toga Poontiyos Pailatol kwako Juudiya tovi gavona womdo sajukekono. Aki su toro toga Herootol distrik Galili toru mido amollomwallajukekono. Aki su toro toga Herootolluro gagwai'yago Filipol kwako Ituuriyake kwako Trakoonitoseke tovallu mido amollomwallajukekono. Aki su toga a'mwo pwol distrik Abilene toru mido amollomwallajukekono. A'mwo su toolluno yovo tov Laiseniyosolekono.

² Aki su toro toga a'mwo pworal pris aguto imo'nodubul womdo sajulorakono. A'mwo su tooralluno yovo tov pwol Anasolekono. Aki pwol Kaiyafasolekono. Su toro toga Sekoraiya'wolluro muugunyo Joonol kwako a'mwomaiyo kuu'maiyo tomuu amwallajukekono. Toro mwaloduke toollu Gooti tool yogalo pun aduubweyokaikono.

³ Toro te Joonol yiuwi'nokai wonyo Joodanovi wobo tomuuda'ai kwako wo'dupudo towai aro amoruudomollajukekono. “Oo kevu Gooti toollomno kuudo souragunyumo'nupi tov Gooti tool kemi ma'no ma'nodo tovuro kirumwallo tovi nomaikudukwopiyonekono. Toro tovino'mo kevu wonyo buuvollunyulo.” Kuujajukekono.

⁴ Su toro tovino aiyoga proofet Aisaiyal Gooti toolluro yogalo tovi puukwollo puruv aro me'no sakwollokaikono. “A'mwo pwol kwako a'mwomaiyo kuu'maiyo tomuu modomollodowo'jure toga gamoro deko tov aro dodowo'jure tovi wuu'nupinekono. Aguto tool abaiki'mowo'ji toolluno'mo jovo'dogallunyulo. Toro toolluno puuto tov ido'nyuno jovo'dogalubweyulo. Toro dodowo'jure toollu wuu'nupinekono.

⁵ Toro te yiuwi'nokai kwako wolelupoloso ton neya luvitowosupinogano. Aki yiuwi'nokai muumuudo kula'nyo tekwojogai'aro muumuudo bwotonyo toorogai'aro toorai modovomokwolabupinogano. Aki puuto nolpureyo ton ido'nyuno to'no neya imo'nupinogano. Aki puuto munyu munyu kuumwiyo ton worato to'no neya dukwiyosupinogano.

⁶ Aki Gooti tool a'mwo abolo tonyu du'muudo tovida'ai bomollurolovomokalokwiyo'moneyokwe womdo yodowo'jure tovi yiuwi'nokai kwako akavida'ai a'mwo abolo mwalodupudo ton noonpinokwono.” Aisaiyal toro ajakwollokaikono.

⁷ Toruda'ai a'mwo abolo kwolallo bwotonyago ton wonyo uuvollunyo'moneyokwe Joonollomno abopogano. Toro tonyu Joonol aro kuudokaikono. “Kevu a'mwo toorekul a'mwo abolo tonyu kaiyako igolodupudorekikono. Toro toorekul a'mwo toorai romiyosodupudo gabakuto yaunanyo toorobusukorekikono. Toro toorekul Gooti toolluro kemino suroulo amokabadopiko tovida'ai, Oo lukado dovlaiyulo, tov a'mwo pwol duudapi me'no aikulladopikorekuldeyo?

⁸ Kevu Gooti toollomno kuudo nebal'no souragunyumo'nupi tov aro neya jogaulo. A'mwo me'no youragunyumo'nodupudo pworavuro pasudo yodupudo to'busuko kubalno kevu kworekul kuruv pasudo aval'no neya jogaulo. Aki toro toorekul aro nodumwalpiyo. “Oo nevu nemi nellukweyago Eburaiyamolluda'ai toonolluno tov Gooti tool ilaiyo mollonekumwalmwalonekono,” nodumwalpiyo. Kevu su toro adupi kuvi kuruv nuu aro ikudumo'mokwono. Gooti toolno'gwowi sulo akarai nokwo marowo'ji Eburaiyamolluro jukweyago kwoloraiyo muuduko toorai nokwo mollumo'nosonekono.

⁹ Toro te aga kuga kuruv iko tooravuro kavlo tonyu dovomwogapiyo'moneyokwe sajugo tov ikolato sugiyo. Toro sukolasuko su tool yiuwi'nokai iko tooro ikulsulo mai'nupi toorai dovomwogapiyowo'ji duko tovi nomodukwopiyonekono.” Kuudokaikono.

¹⁰ Toro kuudoka tovi a'mwo abolo kwolallo su ton Gooti toollu adadomgu'aro ilaiyo igolanonoldukoneyokwe tovino Joonollu aro kuudoganopogano. “Nevu adado yanonoldukono?” Kuudoganopogano.

¹¹ Toro kuudoganopo tonyu Joonol aro kuudokaikono. “A'mwo pweku youro puruval kurukwenyudeyokwe a'mwo youro nonagutokwe pwollu gumoro youro puul neya duuwiyono. Aki a'mwo pweku wosamujuko kurukwenyudeyokwe a'mwo supto yodowo'jure pwollu neya duuwiyono.” Kuudokaikono.

¹² Aki takis nuugwiyo ma'dupudo pworo wonyo uuvollunyo'moneyokwe Joonollomno bo'mno aro kuudoganoporogano. “Ibwasokweyoloo, nevu adado yanonoldukono?” Kuudoganoporogano.

¹³ Toro kuudoganopo toorai aro kuudokaikono. “Kevu takis nuugwiyo amapi toga yiuno gavman tooravuro ikudodopure tovino to'no uumjunopi nuugwiyo pun muunyu toru'aro mai'noma'mwalpinorekikono.” Kuudokaikono.

¹⁴ Aki a'mwo mollurogudo pworo aro kuudoganoporogano. “Nevu kwonol kuruv adado yanonoldukono?” Toro kuudoganopo toorai Joonol aro kuudokaikono. “Kevu nuugwiyo ki'nomallo'moneyokwe a'mwo abolo pubuurai luko nyuro'gwolmwalpiyo. Aki kevu nuugwiyo ki'nomallo'moneyokwe guureji aro nodumuurolo'mwalpiyo. “Oo kevu nuugwiyo manekubipi tov kemino kuunano nomojokuu'naikubweyanogaikikono.” Kevu su toro tomgu'aro nodumuurolo'mwalpiyo. Aki toro toorekul kemi womdo yodupudo tovida'ai nuugwiyo ikubiyodopure tovi amapi toga nuugwiyo pugai'aro youllomallo'moneyokwe kuudo kwolallo nyourukwapimwalpiyo. Toro kworekul kuruv nuugwiyo amapi su tonyuno ilaiyo to'no neya jubwosunogaulo.” Kuudokaikono.

¹⁵ A'mwo abolo su ton Gooti toolluro wiyo'mwojo'moneyokwe ajesoka Krais toolluno sogwollo kwinyajupogano. Toro tovino tov kemoro poowokalago togai Joonolluno aro kuudo saullajupekono. Oo a'mwo su tool Krais tooldukono? Kuudo saullajupogano.

¹⁶ Yiuwi'nokai a'mwo abolo su tonyu Joonol aro kuudokaikono. “Nuvu yiuno wonyo tokwe to'no galaikuvollodumdonyugono. Toro kuvi kuruv pwol mi lukomgu abwo'ji su toolno'gwowi aguto kuunodekono. Nuu akaro tekwonyu aguto su toolluro suulpweyo tovi yiuno nomollurolopiyo'mo tov ilaiyekwonyumaiyo. Su tool Gooti Toolluro Kuullo tooke mogalaikuvollowo'ji aki duko tokwe mogalaikuvollonekono.

¹⁷ Aki su tool abwo'ji toga sapoollo pilatokwe tov mworarowo'ji wit tonyu dapto tonyuda'ai mollovo'dogalosonekono. Toro mollovo'dogalosowo'ji toga wit sugudo ton gami wosamuju'ago tovi kuulomorosonekono. Yowo'ji daptodeyo ado'ji to'gwowi duko yiunokuudo maibuulopiyodowodo tovi molluroudapiyonekono.” Joonol toro kuudokaikono.

¹⁸ Aki yogalo bwotonyago pugai'aro kuruv a'mwo abolo su tonyuro poowokalago tovi juulowoso'moneyokwe aduuwimwojajukekono. Joonol kuuguudo sugudo tokwe su toro tomgu'aro amoruudomollajukekono.

Herootol Joonollu wuulo killo'mo ago tovi amogalerosoka tovinokwono

¹⁹ Toro moruudomolloduke kuvi kuruv a'mwo aguto kig Herootolno'gwowi lukomgu Joonollu kaiyako sugolokaikono. Sumdomgu Herootol gami gagwai'yago Filipolluro abolo Heroodiyasovi amaroka tovino tov Joonol yogalo amojurugolokaikono. Aki Herootolluro yiuwi'nokai kirovanyuvanyu pasudo mujeroungovla'mduke kunyuno kuruv Joonol yogalo amojurugolokaikono.

²⁰ Toro te Herootol Joonollu wuulo killo'mo ago puvi aulomerosokaikono. Herootol Joonollu wuulo aulomerosoka su tov ma'no ma'no sokaikono. Ma'no ma'no soka su tokwe'aro aki Herootolluro sumdomguda'ai yiuwi'nokai me'no airoungovlaiyajuko toorogai'aro tooro soullosumelokarogano.

Jisasolluro wonyo kuuvollunoka tovinokwono

²¹ To'no'gwowi a'mwo abolo ton wonyo kuuvollunyajupo toga Jisasol kwol kuruv wonyo abuuvollunokaikono. Toro uuvollunyuno sumaiyokwe subusu'nyogalo doduke toga sulugumdo tov ausodavokakwono.

²² Toro kuusoda'mduke tomuuda'ai Gooti toolluro Kuullo tool dokato sobuuro pwolbusuko wolabino sumaiyokwe Jisasollu abwolomwalokaikono. Toro bwolomwalno sumaiyokwe yogaimaguurai puruv sulugumdo tovi muunyu tomuuda'ai aro adokakwono. “Guvu moro Kwolaiyo kalo buuropino nyunodumdo tookugono. Toro tookujuno ilaiyo bwotonyo sumonoo.” Adokakwono.

Jisasolluro kwikweyago toorainokwono

²³ Toruda'ai Jisasol gamoro womdo muudu'no soka tov 30-pela kworomo tomgu'aro me'no kuuwolo'noka toga amollokaikono. Toro toolluno a'mwo abolo ton aro kuudo saullajupekono, Oo Joosepolluro kwolaiyoldeyo, kuudo saullajupekono. Aki Joosepol Heliyolluro kwolaiyekono.

²⁴ Aki Heliyol Matatolluro kwolaiyekono. Aki Matatol Livaiyolluro kwolaiyekono. Aki Livaiyol Melkiyolluro kwolaiyekono. Aki Melkiyol Janaiyolluro kwolaiyekono. Aki Janaiyol Joosepolluro kwolaiyekono.

²⁵ Aki Joosepol Matatiyasolluro kwolaiyekono. Aki Matatiyasol Emoonolluro kwolaiyekono. Aki Emoonol Nahuumolluro kwolaiyekono. Aki Nahuumol Esliyolluro kwolaiyekono. Aki Esliyol Nagaiyolluro kwolaiyekono.

²⁶ Aki Nagaiyol Matolluro kwolaiyekono. Aki Matol Matatiyasolluro kwolaiyekono. Aki Matatiyasol Semenolluro kwolaiyekono. Aki Semenol Joosekolluro kwolaiyekono. Aki Joosekol Jooda'wolluro kwolaiyekono.

²⁷ Aki Jooda'wol Joowananolluro kwolaiyekono. Aki Joowananol Resa'wolluro kwolaiyekono. Aki Resa'wol Seruubabelolluro kwolaiyekono. Aki Seruubabelol Siyaltiyololluro kwolaiyekono. Aki Siyaltiyolol Neriyolluro kwolaiyekono.

²⁸ Aki Neriyol Melkiyolluro kwolaiyekono. Aki Melkiyol Adiyolluro kwolaiyekono. Aki Adiyol Koosamolluro kwolaiyekono. Aki Koosamol Elmadamolluro kwolaiyekono. Aki Elmadamol Erolluro kwolaiyekono

²⁹ Aki Erol Joosuuwalluro kwolaiyekono. Aki Joosuuwal Eliyeserolluro kwolaiyekono. Aki Eliyeserol Joorimolluro kwolaiyekono. Aki Joorimol Matatolluro kwolaiyekono. Aki Matatol Livaiyolluro kwolaiyekono.

³⁰ Aki Livaiyol Simiyoonolluro kwolaiyekono. Aki Simiyoonol Juuda'wolluro kwolaiyekono. Aki Juuda'wol Joosepolluro kwolaiyekono. Aki Joosepol Joonamolluro kwolaiyekono. Aki Joonamol Eliyakimolluro kwolaiyekono.

³¹ Aki Eliyakimol Meleya'wolluro kwolaiyekono. Aki Meleya'wol Mena'wolluro kwolaiyekono. Aki Mena'wol Matata'wolluro kwolaiyekono. Aki Matata'wol Natanolluro kwolaiyekono. Aki Natanol Devitolluro kwolaiyekono.

³² Aki Devitol Jesiyolluro kwolaiyekono. Aki Jesiyol Oobetolluro kwolaiyekono. Aki Oobetol Boowasolluro kwolaiyekono. Aki Boowasol Salmoonolluro kwolaiyekono. Aki Salmoonol Nasoonolluro kwolaiyekono.

³³ Aki Nasoonol Aminadapolluro kwolaiyekono. Aki Aminadapol Atminolluro kwolaiyekono. Aki Atminol Arniyolluro kwolaiyekono. Aki Arniyol Hesroonolluro kwolaiyekono. Aki Hesroonol Peresolluro kwolaiyekono. Aki Peresol Juuda'wolluro kwolaiyekono.

³⁴ Aki Juuda'wol Jekoopolluro kwolaiyekono. Aki Jekoopol Aisakolluro kwolaiyekono. Aki Aisakol Eburaiyamolluro kwolaiyekono. Aki Eburaiyamol Tera'wolluro kwolaiyekono. Aki Tera'wol Nahoorolluro kwolaiyekono.

³⁵ Aki Nahoorol Seruukolluro kwolaiyekono. Aki Seruukol Reyuu'wolluro kwolaiyekono. Aki Reyuu'wol Pelekolluro kwolaiyekono. Aki Pelekol Eberolluro kwolaiyekono. Aki Eberol Sela'wolluro kwolaiyekono.

³⁶ Aki Sela'wol Kainanolluro kwolaiyekono. Aki Kainanol Arpaksatolluro kwolaiyekono. Aki Arpaksatol Semolluro kwolaiyekono. Aki Semol Noowalluro kwolaiyekono. Aki Noowal Lamekolluro kwolaiyekono.

³⁷ Aki Lamekol Metuuselolluro kwolaiyekono. Aki Metuuselol Inookolluro kwolaiyekono. Aki Inookol Jaretolluro kwolaiyekono. Aki Jaretol Mahalalelluro kwolaiyekono. Aki Mahalalel Kainanolluro kwolaiyekono.

³⁸ Aki Kainanol Enoosolluro kwolaiyekono. Aki Enoosol Setolluro kwolaiyekono. Aki Setol Adamolluro kwolaiyekono. Adamol Gooti toolluro kwolaiyekono.